Ryan Bang, Paola Huyong at Vice Ganda kasama ang kani-kanilang pamilya

PURING-PURI ng Phenomenal Box-office Star na si Vice Ganda ang mga magulang ng fiancée ni Ryan Bang na si Paola Huyong.

Naikuwento ng TV host-comedian sa madlang pipol ang inspiring at kilig-kiligang kuwento nang makasama niya si Paola at ang parents nito.

Sa segment ng “It’s Showtime” na “Step In The Name of Love” nabanggit ni Vice na nag-treat si Ryan sa kanyang pamilya, pati na sa family ni Paola noong Mother’s Day sa isang restaurant.

Natuwa raw si Vice Ganda sa ginawa ng tatay ni Paola sa asawa nito, “Magka-back-to-back ‘yung table namin nu’ng family ng girlfriend ni Ryan.”

“Tapos biglang narinig ko ‘yung tatay, bago bumati ng Happy Mother’s Day du’n sa mommy ni Paola, may speech muna siya. Ang dami niyang sinabing magaganda, parang biglang may renewal of vows.

“Parang, ‘we’ve been together for…’ ganu’n, tapos may sinasabi siyang magagandang katangian nu’ng asawa niya.

“Tapos nagpapasalamat siya sa mga magagandang pinagsamahan nila. Tapos binigyan niya ng bulaklak ‘yung asawa niya, tapos nag-kiss sila sa lips, tapos nagpalakpakan kami,” tuluy-tuloy na chika ni Vice.

Sey ng komedyante, nakakatuwang malaman na may mga tao pa rin na hindi nagbabago sa pagpaparamdam ng kanilang pagmamahal sa kanilang mga partner.

Dagdag pang pahayag ni Vice, “Ang ganda. Magandang makita na hindi binabago ng edad o ng panahon ang pag-ibig.

“May mga taong, they will make sure na kahit tumanda sila, hindi mababago ‘yung pamamaraan nila ng pagpaparamdam ng pag-ibig sa isa’t isa,” saad pa ni Vice Ganda.