Sa pagbisita nina Kristoffer Martin at Lexi Gonzales sa ‘Fast Talk with Boy Abunda,’ ikinuwento nila ang kanilang karanasan sa pagiging bahagi ng ‘Cruz vs. Cruz.’

Bumisita ang Cruz vs. Cruz stars na sina Kristoffer Martin at Lexi Gonzales sa Fast Talk with Boy Abunda kamakailan, kung saan nakapanayam sila ng “King of Talk” na si Boy Abunda.

Sa pagbisita nina Kristoffer at Lexi ay kinamusta sila ni Boy tungkol sa kanilang experience sa Cruz vs. Cruz. Labis ang tuwa at pasasalamat ng Sparkle artists dahil sa success ng pilot episode ng naturang afternoon drama series.

“Happy and I’m grateful kasi it’s a really good project. The script is very detailed, ‘yung tipong hindi na ako naghahanap ng idadagdag sa character ko kasi it’s already there. While reading, dama ko na agad, e,” ani Lexi.

Pagkatapos nito, nagkuwento sina Kristoffer at Lexi tungkol sa kanilang karanasan na nakatrabaho sina Vina Morales at Gladys Reyes sa serye. Inamin ng Sparkle actor na noong una ay akala niyang mai-intimidate siya kay Vina.

Kuwento niya, “Si Miss Gladys kasi nakatrabaho ko na po siya before. Akala ko noong una, mai-intimidate ako kay Ms. Vina, pero hindi. Storycon palang namin, sobrang approachable po.

“Walang wall e, parang siya pa ‘yung makikipag-usap sa’yo. Tapos nanay pa namin siya, so hindi kami nahihirapan. Day one po namin sa taping, hindi kami nahirapan kasi si Ms. Vina mismo ‘yung [magsasabi] sa’yo, ‘Ay anak, tara reading tayo’ gano’n.”

Dagdag pa ni Lexi, “Lahat, even si Ms. Gladys, well sa promos pa lang namin siya nakakasama so far and other stuff including the show. Wala pa kaming eksena together pero lahat mababait sa set,” aniya.

Tinanong din ni Boy sina Kristoffer at Lexi kung hindi pa ba nila nararanasan ang masampal ni Gladys.

Unang sumagot ang StarStruck Season 7 First Princess at sinabi, “Nagre-ready pa lang kami. Wino-workout ko pa lang ‘yung face ko [laughs].”

“Ako iniiwas ko na po ‘yung character ko sa character niya. Ako na nag-a-adjust [laughs],” hirit naman ni Kristoffer.