Piolo Pascual, Dingdong Dantes, Coco Martin meet the press in one special day

Sa isang pambihirang pagkakataon ay nakapiling ng entertainment press ang tatlo sa top leading men ng Pilipinas nitong Lunes, October 6.

Naka-brunch—o late breakfast at early lunch—ng media ang Kapamilya Drama King na si Coco Martin sa Mom and Tina’s Bakery & Café sa Sgt. Esguerra, Quezon City.

Humarap sa media si Coco, 32, para personal na humingi ng paumanhin sa iba’t ibang women’s group na tumuligsa sa kanyang pagrampa sa The Naked Truth denim and underwear fashion show ng Bench noong September 20.

Hindi nagustuhan ng Gabriela at ng iba pang women’s organizations ang konsepto ng segment ni Coco, kung saan gumanap siya bilang circus master, habang hawak-hawak ang isang lubid na nakatali sa leeg ng isang foreign female model, na gumaganap naman bilang isang circus cat.

Nakaharap ni Coco nitong Lunes ang mga lider ng women’s organization upang ipaliwanag ang kanyang panig at humingi na rin ng paumanhin sa kanila.

Lunchtime naman ay nakapiling ng entertainment press ang Ultimate Heartthrob na si Piolo Pascual para sa launch ng SunPiology Run ng Sun Life, na ginanap sa Max’s restaurant sa Roces Avenue, Quezon City.

Bukod sa taunang run-for-a-cause event na ito, inusisa rin ng press si Piolo, 37, tungkol sa pagsabak sa showbiz ng kanyang anak na si Iñigo at ang relasyon nilang mag-ama.

Kinagabihan naman ay nakasama ng press ang Kapuso Primetime King na si Dingdong Dantes para sa send-off party cum stag party na inihanda para sa kanya ng talent manager niyang si Perry Lansigan.

Ginanap ang salu-salo sa Cerchio restaurant sa may Tomas Morato, Quezon City.

Napag-usapan naman dito ang preparations sa nalalapit na pag-iisang dibdib ni Dingdong at ng kanyang fiancée na si Marian Rivera, ang magandang relasyon ng 34-year-old actor sa entertainment press mula pa noon, at ilang isyu na may kinalaman sa kanya.

Dahil sa pambihirang pagkakataon na ito, maging ang ilang entertainment press ay tila namangha na nakasalamuha nila sa iisang araw sina Coco, Piolo, at Dingdong.

Kaya naman nag-post sila ng messages at mga larawan kasama ang tatlong aktor sa kani-kanilang social media accounts. — Erwin Santiago