Dating Kaklase Ni Marian Rivera Lumutang, Isiniwalat Pananabunot Ng Aktres at Pambubuhos ng Softdrinks

Umani ng atensyon sa social media ang paglalantad ni Ivy Manzon-Bo ukol sa diumano’y hindi kanais-nais nilang karanasan ng kanyang dating kaklaseng si Marian Rivera, bago pa man ito sumikat at kilalaning “Primetime Queen” ng GMA Network.

Ang isyu ay muling nabuhay matapos ang panayam ni Karen Davila, isang kilalang mamamahayag ng ABS-CBN, kay Marian. Sa naturang interview, napag-usapan ang tungkol sa mga taong nakaalitan ni Marian noong kabataan niya. Dito nagsimulang mag-ingay ang social media matapos maiugnay ang pangalan ni Ivy sa kwento ng nakaraang ‘sigalot.’

Ayon sa lumaganap na post ni Ivy sa Facebook, may pagkakataong nabuhusan daw siya ng softdrinks at sabunutan ni Marian noong sila ay nasa high school pa lamang. Ang insidente umano ay nagsimula dahil sa isang maling impormasyon na naiparating kay Marian, dahilan upang mapagbuntunan si Ivy ng galit. Kalaunan, pareho raw silang dinala sa Guidance Office, sinuspinde, at tinanggal mula sa kanilang varsity team.

Bagaman hindi naging maganda ang karanasan, nilinaw ni Ivy na pinatawad na niya si Marian sa naging aksyon nito. Ayon sa kanya, naging magkaibigan sila ni Marian noong mga panahong iyon, ngunit mabilis daw itong napaniwala sa tsismis na ipinasa ng isang kaklase nila. Dagdag pa niya, hindi na raw siya nagtanim ng sama ng loob at matagal na niyang kinalimutan ang nangyari.

Hindi lang isang beses nangyari ang gusot nila. Ibinahagi ni Ivy na kahit noong sila ay nasa kolehiyo na, muling lumutang ang isyu. Sinita raw niya si Marian noon, at sinabing, “High school pa lang issue na ‘yan, ngayon dala-dala mo pa rin?” Bagamat tila matindi ang naging tensyon sa pagitan nila noon, naging malinaw sa pahayag ni Ivy na wala siyang layuning siraan si Marian.

Dahil sa naging viral ang kanyang mga sinabi, nakatanggap si Ivy ng maraming reaksiyon mula sa publiko. Sa kanyang kasunod na post, ipinaliwanag niyang hindi niya intensyon na pabagsakin si Marian o gumawa ng kontrobersya para sa pansariling kapakinabangan.

Aniya, “Ok last na to. Para sa ikatatahimik ng magulong mundo ng soc med. Sana daw di na ako nagshare, sana di ko na daw pinost, it is never my intention na manira lalo pa ng isang Marian Rivera, pader na yan sa showbiz hindi na yan kahit kailan mapapabagsak ng kahit ano pa man. My applogies if nasaktan kayo. If naging fame whore ok baka nga ciempre tangapin natin kung ano pang gusto niyo sabihin. Isang pribilehiyo ang masabunutan ni Marian no. Saka un nga tapos na un napagkwentuhan lang wag na kayong magalit kasi di naman ikakasira ng tao ung nakaraan na. Pero wala akong balak sumikat para lang sa ganyan para saan? Pacencia na sa mga nagalit at natrigger sa post. Ang dami nang chats and comments. Hindi ko na din mabasa lahat.”

Bilang pagtatapos ng kanyang pahayag, sinabi ni Ivy na matagal na ang insidenteng iyon at bahagi na lamang ng nakaraan. Ayon sa kanya, hindi na dapat palakihin ang bagay na hindi naman nakasasama sa kasalukuyang imahe ni Marian, lalo na’t kilalang-kilala na ito sa industriya at hindi na matitinag pa ng anumang kontrobersya. Nagpasalamat siya sa mga nakakaunawa at humingi ng pang-unawa sa mga na-trigger ng kanyang mga salaysay.

Sa kabila ng lahat, malinaw sa naging tugon ni Ivy na nais lamang niyang ikuwento ang bahagi ng kanyang kabataan, hindi upang magdulot ng intriga, kundi para maipahayag na kahit ang mga sikat ngayon ay may pinagdaanang karaniwang karanasan tulad ng iba.