Mainit na pinag-usapan nitong araw ng Huwebes, April 10, 2025, ang larawan ni Erich Gonzales at ng asawang si Mateo Lorenzo.

Sumulpot ito matapos hanapin ng fans si Erich sa kasal ng kaibigang si Claudia Barretto kay Basti Lorenzo, na younger brother ni Mateo.

Sabik silang makita ang dating Kapamilya aktres kaya may mga naghanap ng larawan niya, pero no-show siya sa wedding, ayon sa report ng PEP (Philippine Entertainment Portal).

Tila nahalungkat ang isang larawan na ipinost noon pang June 28, 2023.

Makikitang nakaputi pareho sina Erich at Mateo, at malinaw na nasa loob ng simbahan.

Kasama nila ang mga magulang ni Mateo na sina Martin Ignacio Lorenzo at Maria Leah De Leon, isang pari, at isang bata.

Pero ang nakapukaw sa atensiyon ng netizens ay si Erich na may karga-kargang sanggol.

Screenshots of some of the vlogs and netizens that reposted the post of a priest who claimed he baptized the baby of Erich Gonzales and Mateo Lorenzo.

Mabilis na kumalat ang larawan na ni-repost ng tsismis blogs, entertainment sites, at mga fans.

Libu-libo na ang reactions sa mga reposts at daan-daan na ang shares at comments.

THE PRIEST’S POST

Ang nag-post ay ang paring nasa larawan.

Sa Facebook caption, binanggit niya kung sino ang sanggol na bininyagan: “He is the son of Mateo Lorenzo and Erich Gonzales Lorenzo.”

Sabi pa ng pari, siya rin ang nagbinyag sa asawa ni Erich noong 1992, at sa labing-isa (11) pa nitong mga kapatid.

Siya rin ang nagkasal sa mga magulang ni Mateo.

Lumalabas na lehitimo ang Facebook account ng pari, dahil may mga Facebook posts ang ilang netizens na kakilala siya at naka-tag ang account niya.

Pero bago mag-10 P.M., ang public post niya ukol kay Erich ay hindi na makikita sa kanyang feed. Pero kumalat na ang screenshots nito sa social media.

ERICH AND HER MARITAL LIFE

Si Erich ay ikinasal kay Mateo sa St. James the Great Parish sa Alabang, Muntinlupa, noong March 23, 2022.

Napaulat na 2017 nang magsimula ang kanilang pagkakaibigan.

Sa sumunod na taon, pinag-usapan ang estado ng kanilang relasyon nang kumalat sa social media ang travel photo ng aktres kasama si Mateo.

Binanggit noon ni Erich sa PEP interview na ang larawang iyon ay kuha sa Japan, kung saan nagkaroon ng art exhibit ang kanyang kapatid na painter at naka-based sa Japan.

Sinabi pa ni Erich na inimbitahan din ng kanyang kapatid si Mateo.

Taong 2019 ay sinabi ni Erich sa kanyang vlog na masaya ang estado ng kanyang puso, subalit naging matipid sa detalye.

Ang sabi lang niya noon: “I don’t wanna ruin it, so sa akin na lang yun.”

Gayunpaman, may mga lumabas siyang ilang larawan kasama si Mateo.

ERICH AND HER RISE TO STARDOM

Si Erich ay produkto ng ABS-CBN talent search na Star Circle Quest (SCQ) Season 2 noong 2005. Siya ang itinanghal na SCQ Grand Questor.

Ito ang naging tiket ni Erich para makapasok sa showbiz.

Kinontrata siya bilang artist ng Star Magic, ang talent-management company ng ABS-CBN.

Nagsimula siya sa mga support roles sa mga series na Mga Anghel na Walang Langit (2005), Calla Lily (2006), Sana Maulit Muli (2007), at marami pang iba.

Ang kanyang launching teleserye ay ang Katorse (2009), katambal sina Enchong Dee, Ejay Falcon, at Xian Lim.

Dito na nagsimulang umalagwa ang career ni Erich at naging isa sa mga Kapamilya leading ladies.

Kabilang sa mga nakilalang teleserye niya ay ang Magkaribal (2010), Maria la del Barrio (2011), Two Wives (2014-2015), Be My Lady (2016), at The Blood Sisters (2018).

Sa mga pelikula naman, nagbida siya sa I Do (2010), Corazon: Ang Unang Aswang (2012), Suddenly It’s Magic (2012), Once a Princess (2014), at Siargao (2017).

Ang pinakahuling proyektong ginawa ni Erich ay ang ABS-CBN teleseryeng La Vida Lena (2020-2022).

Nung tumama ang pandemic at tinanggalan ng prangkisa ang ABS-CBN sa panunungkulan ni dating Pangulong Rodrigo Duterte, nag-venture si Erich sa paggawa ng content para sa kanyang YouTube channel.

Subalit kalaunan ay hindi na rin niya ito itinuloy.

Hindi na rin aktibo ngayon si Erich sa kanyang showbiz career.

Panaka-nakang nasisilayan siya ng fans sa social media.

Bago natapos ang 2024, naitampok siya sa YouTube channel ng celebrity beauty doctor na si Dr. Aivee Teo.

Ang pinakahuling post naman ni Erich sa Instagram at Facebook ay noon pang January 12, 2025.

WHO IS MATEO LORENZO, ERICH’S HUSBAND?

Ang asawa ni Erich na si Mateo ay isang businessman.

Siya ang kasalukuyang chairman ng RestaurantConcepts Group Inc., na siyang nag-o-operate ng mga restaurant chains na Barcino, Bluesmith Coffee and Kitchen, Meat Depot, at Single Origin.

Ang kanyang ama ay chairman, president, and CEO ng tinatayang 18 companies.

Kabilang sa mga kumpanyang ito ay ang First Lucky Agro-Industrial Corp., Macondray Philippines Co. Inc., First Lucky Holdings Corp., Central Azucarera de Tarlac Inc, (CAT) Resource & Asset Holdings Inc., at RestaurantConcepts Group Inc.

Dati ring pagmamay-ari ng kanilang pamilya ang Pancake House at Dencio’s.

Ayon sa Instagram account ni Mateo, nagtapos siya ng Management Engineering mula sa Ateneo de Manila University noong 2014.

Taong 2021 naman nang makumpleto niya ang kanyang master’s degree in Business Administration mula sa Wharton Graduate School of the University of Pennsylvania sa U.S.

Batay rin sa kanyang social-media posts, mahilig siya sa golf, traveling, mga kotse, show jumping, at agriculture.