Walang mapagsidlan ang kasiyahan ng ina ng Kapamilya singer na si Klarisse de Guzman na sa wakas ay naisapubliko na ng anak na bahagi ito ng makulay na LGBTQIA+ (lesbian, gay, bisexual, transgender, queer, intersex, and asexual) community.

Sa episode ng Pinoy Big Brother (PBB) Celebrity Collab Edition noong April 2, 2025, naganap ang pag-amin ni Klarisse na siya ay bisexual.

Bukod sa pag-amin tungkol sa kanyang sexual orientation, ibinahagi rin ni Klarisse sa mga kasamahan niya sa Bahay Ni Kuya na four years na siyang nasa same-sex relationship sa partner niyang si Trina Rey.

Matapang na pahayag ni Klarisse: “Tingin ko eto na yung time para sabihin sa inyo lahat, and to tell the world that I’m not straight.

“I am bi [bisexual].”

Klarisse de Guzman: “I’m so happy and I’m so proud of myself that I’m finally out.” 
Photo/s: Star Music

 

KLARISSE’S MOTHER: “AT last nakawala na siya sa hawla niya.”

Sa eksklusibong panayam ni MJ Felipe ng ABS-CBN News sa ina ni Klarisse na si Esnobie de Guzman, noong April 4, ibinahagi nito ang saloobin sa ginawang pag-amin ng anak.

Saad nito: “Masaya po ako para sa kanya dahil at last nakawala na siya sa hawla niya.

“Nahihirapan din kasi ako na nakikita siyang hindi niya mailabas kung sino siya.”

 

Aminado si Esnobie na patung-patong na kaba at nerbiyos ang kanyang naramdaman nang malamang mag-a-out na sa publiko si Klarisse.

Kung anu-anong pagdarasal daw ang kanyang ginawa na sana’y tanggapin ng publiko ang tunay na sekswalidad ng anak.

Hindi naman daw binigo ng panalangin si Esnobie dahil nakita niyang buong-buo ang pagtanggap ng publiko kay Klarrisse matapos nitong mag-out.

Pahayag niya: “Masayang-masaya po ako, nagpapasalamat po ako sa Panginoon, pinagdasal ko po kasi iyan.

“Sinasabi ko rin po sa papa niya na, ‘Tulungan mo kami, tulungan mo yung anak mo, i-guide mo.’

“Talagang nagpapasalamat po ako kasi kagabi, bago siya nag-reveal, ang BP [blood pressure] ko po 210/110 sa sobrang nerbiyos ko.

“Natatakot po ako sa sasabihin ng ibang tao kasi hindi naman natin mapi-please ang iba, ang lahat.

“Dahil dun, natatakot ako. Yung ibang kamag-anak baka may masabi.

“Pero tanggap ko siya. Proud po ako sa kanya, sa lakas ng loob niya na umamin.

“Masayang-masaya ako kasi nalabas na niya kung sino siya, yung matagal niyang kinikimkim. Masaya po ako.

“Susuportahan ko siya. Kung saan kasi masaya, yung mga anak ko, doon ako.”

 

Esnobie Details Klarrisse’s Confession About Her Identity

Pagbabalik-tanaw ni Esnobie, apat na taon na ang nakararaan nang masinsinan silang kausaping mag-asawa ng anak nilang si Klarisse.

Patungkol daw ito sa sexual orientation ng singer.

Ngunit bago pa ang pag-amin ni Klarisse ay nakikita at nararamdaman na raw ni Esnobie na tila may iba sa anak.

 

Wala raw kasi itong ipinakikilalang manliligaw sa kanila o nakukuwentong nagugustuhang lalaki.

Kuwento ni Esnobie: “Noong una po siyang nagtapat, sa totoo lang, nakatulala kaming mag-asawa maghapon.

“[Nangyari po ito] four years ago. Kasi napapansin ko na, tinatanong ko siya, ‘Umamin ka na sa akin, kasi ako malawak naman ang pang-unawa ko anak. Para alam ko rin kung sana ako lulugar.’

“[Sabi naman niya], ‘Hindi ah.’ Pero aba, nung nakilala niya si Trina, umamin sa amin, kinausap kami sa kuwarto.

“Sabi niya, ‘Bisexual ako, Ma.’

“Yung papa niya napatulala. Maghapon kaming magkatalikuran nung papa niya na tulala.”

Matapos umamin sa kanila si Klarisse ay pinag-usapan daw nilang mag-asawa ang tungkol sa sekswalidad ng singer.

Dito raw nila napagtanto na anuman ang mangyari ay mananatili nilang anak si Klarisse, at tanggap nila ito.

“Nag-usap naman kaming mag-asawa. Sabi ko, ‘Anak natin yan, napakabait na anak, lahat ibinigay sa atin. Tapos ayan lang na kaligayahan niya hindi pa natin maibigay?’

“Ayun, [um-agree din] po yung papa niya kaya tanggap na tanggap po namin siya.

“Kinabukasan [pinakilala na si Trina].”

ESNOBIE’S RELATIONSHIP WITH KLARISSE’S PARTNER

Masasabi raw ni Esnobie na tamang-tama ang napiling karelasyon ng kanyang anak.

Matapos ipakilala sa kanila si Trina ay nakapalagayan na raw nila ito ng loob.

Bukod daw kasi sa pagiging mabait ni Trina ay nararamdaman ni Esnobie na mahal na mahal sila nito.

 

Sa katunayan, kapag wala raw si Klarisse ay si Trina ang kasa-kasama nilang mag-asawa.

Napatunayan din daw niya ang tapat na pagmamahal ni Trina kay Klarisse sa huling sandali ng buhay ng ama ng singer.

Lahad ni Esnobie: “Ako naman, tanggap ko naman agad si Trina. Mabait po si Trina.

“Yung asawa ko nga po namatay sa palad niya.

“Kasi siya lang yung kasama namin nun. Si Klang nasa It’s Showtime… naiwan si Trina.

“Siya, pinakain niya [yung papa ni Klarisse]. Tapos sabi nung papa ni Klang, ‘Paliguan mo ako kasi naiinitan ako.’ So, pinaliguan niya.

“Tapos pagkapakain niya, nahiga na. Sabi nung papa ni Klang, ‘Kunin mo yung radyo itapat mo sa akin, ilagay mo sa love song.’

“Eto naman [si Trina] lumabas, kinausap niya ako. Sabi niya, ‘Tita, bakit po ganun si Tito, ang bigat-bigat po nung pinaliguan ko?’

“Kinabahan na ako. Tapos nung binalikan niya after five minutes, wala na.”

Dagdag pa ng ina ni Klarisse, “Mabait si Trina, asikasong-asikaso niya po kami. Daig pa niya ang tunay na anak.

“Hindi siya nandidiri sa amin magkalat man kami ng ano diyan.”

 

TRINA’S REACTION TO KLARISSE’S COMING OUT

Sa nasabing panayam ni MJ sa ina ni Klarisse ay naroroon din si Trina.

Ayon kay Trina, walang katumbas na salita kung gaano siya ka-proud at kasaya sa tuluyang pagpapakatotoo ni Klarisse.

Aniya: “Super proud. Noong last night, nung napanood ko, I can’t help, naiyak po talaga ako.

“Finally, freedom, naibigay na kay Klang po after how many years.”

Pag-amin ni Trina, bago pumasok sa PBB house si Klarisse ay napag-usapan na nila ang posibleng paglantad nito ng kanyang sexual orientation.

Ang hindi raw sukat-akalain ni Trina ay mismong si Klarisse ang mag-aanunsiyo nito sa publiko.

Saad niya: “We talked about it po bago siya umalis pero hindi po clear kung mag-a-out siya totally.

“For me naman po, okay na po ako na tago kami, kasi okay naman na po sa family namin. Kasi sila naman po yung No. 1 na magsu-support sa amin.

“But then, siguro hirap na rin po siya at hirap na ring magtago.

“Kasi binabanggit niya sa akin na kapag tinatanong siya, hindi na niya alam kung ano ang isasagot. Dinadaan na lang niya sa jokes…

“The time na pumasok po si Michelle Dee, I knew it already.

“Kasi I saw Michelle po joining Miss Universe, so I know na advocate siya sa mga LGBT. Also, nakikita ko na yung photos niya before po.

“And then yung task pa nila is about being true to yourself.”

Ang pag-amin ni Klarisse ay parte ng task na iniatas sa PBB house guest noon na si Michelle.

Ang bawat housemate ay binigyan ng pagkakataong ipakilala nang lubos ang kanilang sarili.

Read: Michelle Dee: I’m Bisexual

TRINA RECALLS HOW LOVE STORY WITH KLARISSE BEGAN

Pahapyaw ring ikinuwento ni Trina kung paano nagsimula ang pagmamahalan nila ni Klarisse.

Klarisse de Guzman’s girlfriend Trina Rey on singer coming out as bisexual: “Naiyak po talaga ako.” 
Photo/s: Screengrab ABS-CBN News on YouTube

Pagbabahagi niya, nagsimula ang lahat noong 2020 nang padalhan siya ng mensahe ni Klarisse sa pamamagitan ng Instagram.

Twenty-two years old lang daw noon si Trina, habang si Klarisse naman ay 28.

Lahad niya: “It started po sa Instagram. We don’t have any mutual… pero ayun po, sa Instagram.

“Siya po [unang nag-chat] ng fire na emoji.

“Sabi ko naman, ‘Shookt. Is this real?’

“Kasi yung family ko po sa dad side ko po sa UAE [United Arab Emirates], so they’re always watching TFC [The Filipino Channel].

“So, tutok po sila sa Kapamilya.”

Ilang buwan daw magkausap sina Trina at Klarisse hanggang sa magdesisyon silang magkita nang personal.

Saad niya, “Nag-meet kami after a few months, kasi mahigpit po noon [during the pandemic lockdown].”

Makaraan ang ilang pagkikita, mas nakilala raw nina Trina at Klarisse ang isa’t isa hanggang sa magdesisyon silang maging magkasintahan.

Sa apat na taon nilang pagiging magkasintahan, masasabi raw ni Trina na marami na silang nalampasang pagsubok na magkasama.

Sa ngayon, nilu-look forward daw nila ang kanilang future na magkasama, kahit hindi pa naman nila napag-uusapan ang pagpapakasal.

Sabi ni Trina: “I can say na-test rin po talaga kung paano kami as a partner. Kasi it wasn’t easy.

“We go out normal, we don’t do super close sa labas.

“I’m happy kasi more on growth na yung gusto namin. Plans, business things.”