Patuloy ang pakikiisa ni Vice Ganda sa mga empleyado ng ABS-CBN na mawawalan ng kabuhayan.

Ito’y matapos na “patayin” ng Kongreso ang franchise renewal application ng Kapamilya network.

Nitong Miyerkules, June 15, 2020, sa kanilang townhall meeting, inanunsyo ng Kapamilya network ang mga departamentong mabibilang sa mass lay-off.

Kasama sa listahan ang channels na Studio 23, ABS-CBN Sports + Action, O Shopping, at ang FM radio station na MOR 101.9.

Dahil dito, naglabas ng tweet si Vice Ganda kahapon, July 17, para sa mga nagpasara ng kanilang istasyon.

Sabi ng It’s Showtime host, “Sa pagpapasara ng ABS-CBN mawawalan ng malaking pagkakakitaan ang mga Lopez.

“Pero sigurado akong di sila maghihirap. Napakayaman na nila para maghirap.

“Ang totoong magdudusa dito ay ang mga pangkaraniwang manggagawa na nawalan ng trabaho.

“Sila ang maghihirap.”

Dagdag pa ng box-office star, “Kaya kung inaakala nyong nagtagumpay kayo e nagkakamali kayo.

“Mali ang natarget nyo. Mali ang pinatay ninyo. At lahat yan ay mumultuhin at gagambalain kayo.

“Alam niyo kung sino kayo!

Who is vice ganda alluding to?

Walang diretsahang binanggit si Vice kung sino ang pinapatamaan niya sa tweets, pero para sa kanyang followers, tugon ito ng TV personality sa naging speech ni Pangulong Rodrigo Duterte noong Lunes, Hulyo 13.

Doon, pagmamalaki ng Pangulo: “Without declaring martial law, I dismantled the oligarchy that controlled the economy of the Philippines.

“Without declaring martial law, sinira ko iyang mga tao na humahawak sa ekonomiya, hindi nagbabayad [ng tax].”

Dagdag pa ng chief executive, “They take advantage of their political power every election. Isang kuwarto lang iyan, nag-uusap, ‘Sinong kandidato natin ngayon?’ Isang pamilya lang nag-uusap.”

Marami ang nagpapalagay na ang pamilya Lopez at ang pagmamay-ari nitong ABS-CBN ang tinutukoy ng Presidente sa speech niya.

Gaya ng inaasahan, itinanggi ito ni Presidential Spokesperson Harry Roque sa kanyang press briefing noong July 14.

“Hindi po obvious yun. He was referring to the oligarchs which he named and he actually threatened to destroy but reconsidered,” sabi ni Secretary Roque.

“He’s referring po to the oligarchies that he has dealt with personally, nandiyan po yung unang away niya with Lucio Tan, pero nagbayad po ng pagkakautang sa airport si Lucio.”

Samantala, sa episode ng It’s Showtime nitong July 13 ay nagpatutsada si Vice sa 70 miyembro ng Kongreso na bumoto ng “Yes” sa pagkansela ng renewal ng prangkisa ng ABS-CBN.

Kanya namang binati ang labing-isang mambabatas na bumotong ituloy ito.

“Gusto lang ho naming linawin sa mga manonood natin, lahat po ng pumasok dito na galing sa iba’t ibang barangay at galing sa distrito ay tsinek namin kung ang kanilang mga congressmen ay pasok dun sa Top 11 na kaibigan namin.

“Charot lang!

“Mabuhay ang labing-isang mambabatas! Habambuhay namin kayong ipagdiriwang!

“Dun sa seventy, ituluy-tuloy natin ang palabas,” sambit ni Vice.