-Nakiramay ang mga netizen kay Janine Gutierrez matapos pumanaw ang kanyang dalawang lola sa magkaibang panig ng pamilya

-Unang namaalam si Pilita Corrales, kilala bilang Asia’s Queen of Songs, noong Abril 12

-Sumunod namang pumanaw si Nora Aunor, itinuturing na Superstar at Pambansang Alagad ng Sining, noong Abril 16

-Bumaha ng pakikiramay para kay Janine mula sa mga kaibigan, tagahanga, at personalidad sa social media

MAKI-TINGIN KA NAMAN: Pwede ka nang mag-comment sa mga artikulo ng KAMI! Subukan mo, madali lang!

Labis ang pagdadalamhati ng aktres na si Janine Gutierrez sa sunud-sunod na pagpanaw ng dalawang mahal niyang lola—ang mga haligi ng industriya ng musika at pelikulang Pilipino, na sina Pilita Corrales at Nora Aunor.

Noong Sabado, Abril 12, namaalam ang Asia’s Queen of Songs na si Pilita Corrales sa edad na 85. Ayon kay Jackie Lou Blanco, anak ni Pilita at isa ring aktres, wala namang malubhang iniindang karamdaman ang ina, kundi hindi na lamang ito nagising mula sa pagkakatulog. Si Pilita ang ina ng aktor na si Ramon “Monching” Gutierrez, na ama ni Janine.

Ilang araw lamang ang nakalipas, muling nabalot ng lungkot ang showbiz nang kumpirmahin ni Ian De Leon ang pagpanaw ng kanyang ina na si Nora Aunor, National Artist for Film and Broadcast Arts at kilala bilang Superstar ng pelikulang Pilipino.

Pumanaw si Aunor sa edad na 71 noong Miyerkules Santo, Abril 16. Hindi na ibinahagi pa ni Ian ang sanhi ng kamatayan ng ina ngunit inaasahan umano ang isang state funeral bilang pagkilala sa kanyang naiambag sa sining at kultura ng bansa.

Si Nora Aunor ang umampon sa aktres na si Lotlot De Leon, na siyang ina naman ni Janine. Sa loob lamang ng apat na araw, parehong nawala sa buhay ng aktres ang kanyang mga lola sa magkabilang panig ng kanyang pamilya.

Bumuhos ang simpatya mula sa mga celebrity, fans, at social media personalities para kay Janine. Sa social media, napuno ng mga mensahe ng pakikiramay ang mga tribute post para kina Corrales at Aunor. Isang netizen sa X (dating Twitter) ang nagsabing, “Just realized Janine Gutierrez lost both her grandmothers (father’s and mother’s side) on the same week. Our deepest condolences,” kasabay ng pagbabahagi ng mga larawan ng dalawang yumaong alamat.

Nagbibigay ng opisyal na pahayag si Janine tungkol sa pagpanaw ni Nora Aunor at sa kanyang Instagram ay nagbahagi na siya ng mga tribute para sa parehong yumaong lola. Ipinahayag niya roon ang kanyang pasasalamat, pagmamahal, at kalungkutan sa biglaang pagkawala ng mga babaeng hinahangaan at minahal niya mula pagkabata.

Si Janine Gutierrez ay anak nina Ramon Christopher “Monching” Gutierrez at Lotlot de Leon. Parehong galing sa kilalang showbiz family ang mga magulang niya. Kilala si Janine bilang isa sa mga pinakamahusay na aktres sa kanyang henerasyon at nakatanggap na ng mga prestihiyosong acting awards sa bansa at sa ibang bansa.

Noong Marso 23, 2025, ginawaran si Janine ng Best Supporting Actress para sa kanyang pagganap bilang Iris sa seryeng “Lavender Fields” sa 38th PMPC Star Awards for Television. Ibinahagi ni Jericho Rosales, rumored boyfriend ni Janine, ang kanyang suporta at pagmamalaki sa tagumpay ng aktres sa pamamagitan ng Instagram Stories.

Ikinatuwa ni Janine matapos siyang isama ng Netflix Philippines sa isang gallery post na tampok ang mga kilalang aktres at ang kanilang mga pelikula. Ang pagkilalang ito ay nagpapakita ng patuloy na pag-angat ng kanyang karera sa industriya ng pelikula at telebisyon