Sunud-sunod ang pagre-repost ni Julia Barretto ng quotes sa kanyang Instagram Stories patungkol sa isang magulang na “narcissist.”

Ayon sa webMD.com ang narcissist ay tumutukoy sa taong mataas ang tingin sa sarili, self-centered, makasarili, at madalas ay hindi iniintindi ang damdamin o pangangailangan ng iba.

Nitong Huwebes, April 10, 2025, sunud-sunod na nagpakawala si Julia ng makahulugang quote sa kanyang Instagram Story na animo’y may pinatamaan.

Nakasaad sa unang quote na kanyang inirepost (published as is), “A narcissist doesn’t care about being a good parent—they just care about looking like one.”

Photo/s: Screengrab Julia Barretto on Instagram

Wala pa ang limang minuto sinundan na niya ito ng isa pang quote na (published as is), “To a narcissist, the kids are just pawns in their war to break you.”

Photo/s: Screengrab Julia Barretto on Instagram

Isa pang quote ang kanyang ini-repost, kunsaan mababasa dito na ang paboritong role ng narcissist ay magkunwaring biktima sa nagawan niya ng kasalanan.

Mababasa dito (published as is), “A narcissist’s favorite role? The victim. Because it distracts from the damage they caused.”

Photo/s: Screengrab Julia Barretto on Instagram

Wala mang sinabi si Julia kung sino ang kanyang pinapatamaan, marami sa netizens ang naghinalang ang post na ito ay para sa kanyang ama na si Dennis Padilla.

Lalo pa’t ibinahagi ito ni Julia sa gitna ng paglabas ng sama ng loob ni Dennis nang balewalain siya sa kasal ng kanyang anak na si Claudia Barretto.

Si Julia at Claudia ay anak ni Dennis sa dati nitong asawa na si Marjorie Barretto. Ang isa pa nilang anak ay si Leon Barretto.

CLAUDIA’S CONTROVERSIAL WEDDING

Noong April 8, 2025 nang ikasal si Claudia sa longtime boyfriend nitong si Basti Lorenzo.

Dumalo naman dito si Dennis, kasama pa ang kanyang ina na si Catalina Dominguez at kapatid na si Gene Barretto.

Gene Padilla (left), Catalina Baldivia (center), and Dennis Padilla (right) take a photo together before at the start of Claudia and Basti’s wedding ceremony. 
Photo/s: Courtesy: Gene Padilla on Facebook

Habang ang iba ang nagsasaya sa reception ng kasal, si Dennis naman ay nag-post sa kanyang social media account para ilabas ang matinding sama ng loob sa aniya’y “pambubudol” sa kanya.

Sa halip daw na “father of the bride” ay naging “visitor” ang trato sa kanya sa kasalan.

Tanging si Marjorie lang kasi ang naghatid sa altar kay Claudia.

Buong post ni Dennis: (published as is): “GRABE KAYO!! NABUDOL NYO AKO! FATHER OF THE BRIDE NAGING VISITOR! GALING NYO!”

Just hours after attending the wedding of daughter Claudia Barretto, Dennis Padilla aired his dismay at being treated as a “visitor” and not as the “father of the bride.”

Dalawang beses itong ipinost ng aktor sa kanyang social media accounts na kalaunan’y dinelete din niya.

DENNIS leaves comment on Julia’s Instagram post

Lumalabas na hindi lang kay Claudia may sama ng loob si Dennis.

Dahil kinabukasan, April 9, nagkomento si Dennis sa isang post ni Julia sa Instagram.

Bagamat wala kakune-konekta ang nasabing post ni Julia sa kasal ng kapatid na si Claudia, dito napiling ilabas ni Dennis ang himutok sa kanyang mga anak.

Maanghang na komento ng aktor (published as is): “Kapal nyo.”

Agad din itong binura ni Dennis, ngunit marami na sa followers ni Julia ang nakapag-screenshoot nito at ni-repost sa social media.

DENNIS ON NOT BEING PART OF THE ENTOURAGE

Sa gitna ng matinding sama ng loob at hinanakit ni Dennis sa pande-dedma sa kanya ng mga anak, nagpaunlak siya ng panayam kay Ogie Diaz sa YouTube para idetalye ang nangyari.

Ayon kay Dennis, ni isa sa kanyang mga anak ay walang nagsabi sa kanya na wala siyang partisipasyon sa wedding entourage.

Tatlong linggo bago maganap ang kasalanan ay nagkipagkita si Dennis sa tatlo niyang anak para sa isang dinner date.

Dito siya personal na inaya ni Claudia na dumalo sa kasal, kaya umasa siya na kasama siya sa wedding entourage.

Paliwanag ni Dennis: “Ang feeling ko doon sa March 18 dinner, akala ko that was the reunion of love. Ang feeling ko, feeling to, ha?

“The welcome I had doon sa dinner na iyon was so lively and maganda, masarap.

“And then sabi ni Claui, ‘I want you to look good.’ So, ang feeling ko doon sa ‘I want you to look good Papa that day,’ kahit ikaw sabihan ka ng anak mo non, anong ibig sabihin non? You look good as a guest ba ang dating sa yo?

“Because of those words” inakala ni Dennis na may parte siya sa wedding ng anak.

Claudia Barretto and longtime boyfriend Basti Lorenzo exchange “I dos” in an intimate ceremony witnessed by family and friends. 
Photo/s: @mindclouds on Tiktok

Ang isa pa sa labis na ikinasasama ng loob ni Dennis, walang binanggit sa kanya si Claudia nang magkausap sila sa telepono noong araw ng kasal.

Nakatanggap ng tawag si Dennis kay Claudia para sabihin nitong hindi na matutuloy ang kasal.

Ngunit makaraan ang halos isang oras, muli itong tumawag kay Dennis para bawiin ang sinabi nitong hindi na matutuloy ang kasal nila ni Basti.

Hindi na nakapagtanong si Dennis sa biglaang pagbawi ni Claudia dahil nagmamadali na itong nagbihis at bumiyahe papuntang St. James The Great Parish sa Ayala Alabang Village sa Muntinlupa City, kunsaan gaganapin ang kasal.

Giit ni Dennis, matatanggap naman niya ang pagiging bisita lang kung nasabihan siya nang maaga.

“Para I can decide if I want to still go o huwag na lang.

“Nasa akin na yon, di ba? Wala na silang carry doon. Kung hindi ako dumating, ‘E, in-invite ka namin, e. Sinabi naman namin na hindi ka part ng entourage.’

“At least, mayroon silang katuwiran, may reasoning sila. Hindi ako puwedeng mag-vent out, kasi sinabihan ka nang wala ka e.”

O kaya ay hindi na lang daw sana siya inimbita, at siya na lang ang boluntaryong pumunta sa kasal para aasahan na niya sakaling hindi siya tratuhing “father of the bride.”

Sa huli, masama ang loob na sinabi ni Dennis na suko na siya sa pakikipaglapit sa mga anak.

Lalo pa’t ilang beses naman na raw siyang sumubok na makipag-ayos sa mga ito.

Hindi na rin daw niya bibigyan ng tsansa ang mga anak na kausapin o makita siya kailanman.

“This is a permanent goodbye,” pinal na sabi pa ni Dennis sa panayam ni Ogie.

“Maybe the last time that you will see me, sa loob na ng kabaong ko yun. Di na ako makakaiwas,” emosyonal na dagdag ni Dennis.

Sabay sabi rin niya, “Di ko naman kayo iba-ban dun. Anak ko kayo, e. Kung gusto niyo mag-donate ng biscuit, puwede rin naman yun.”

Samantala, habang isinusulat ang artikulong ito ay wala pang nagsasalita sa kampo ni Claudia ukol sa isyu.