Ito ay matapos silang pag-usapan dahil sa sorpresang pagsipot ni Mark sa album launch ng singer na binansagang “The Revival King.”

Binigyan ng malisya ang pagdating ni Mark at ang pagbibigay niya ng bulaklak kay Jojo habang kinakanta nito ang bagong single niyang “Nandito Lang Ako” sa media conference na ginanap sa isang restaurant sa Quezon City, noong Pebrero 17, 2025.

Nauna nang pinabulaanan ni Jojo ang malisyosong isyu na nag-ugat nang makita silang magkasama sa isang casino-hotel sa Parañaque City noong February 5, 2025.

Ayon kay Jojo nang usisain tungkol dito, “Siguro kung makita ninyo siya [Mark], puwede ninyo siyang tanungin.”

MARK HERRAS SPEAKS UP ON BEING LINKED TO JOJO MENDREZ

Hindi na nagkaroon ng oportunidad ang entertainment press na marinig ang panig ni Mark dahil umalis kaagad ito matapos bigyan ng bulaklak si Jojo.

Tumanggi na ring magsalita si Jojo nang biglang sumama ang kanyang pakiramdam sa mediacon.

Sa panayam ni MJ Marfori ng TV5 kay Mark sa story conference ng horror film na Tag-Ulan noong Lunes, Pebrero 24, tinapos ng aktor ang isyu tungkol sa kanila ni Jojo .

Paliwanag niya: “Baka kasi nakakalimutan nila na I was raised by gay parents so hindi…

“Kumbaga, kung sa kanila parang malaswa, sa akin, hindi siya masamang tingnan kasi pinalaki ako ng gay parents.

“So, magaling at malaki ang respeto ko sa mga kapwa LGBTQ.”

Pareho nang pumanaw ang adoptive parents ni Mark na sina Claudio Herras Jr. (Daddy Jun) at Herminigildo Santos (Tito Hermie).

Pumanaw si Daddy Jun noong 2014, at si Tito Hermie ay pumanaw noong 2016.

Pinagtatawanan na lamang ni Mark ang mga sunud-sunod na kontrobersiyang kinasasangkutan.

Pero siya ang higit na nakikinabang dahil dumami ang mga trabaho niya mula nang pagpistahan ang balita tungkol sa kanyang pagtatanghal sa isang gaybar.

Saad niya: “Yung mga tao na parang nagpapalaki ng isyu, thank you, ang dami kong trabaho.

“Yung mga nangba-bash, actually, twenty-one years na ako sa showbiz so wala nang epekto sa akin yon.

“Kumbaga, kung ako mismo, hindi ko na binabasa or hindi ko na pinapanood yung videos or kung anuman.

“Yung asawa ko po yung actually nagbabasa. Sabi ko, ‘Huwag mo nang basahin, huwag ka nang mag-aksaya ng oras actually.’”

Nakatuon ngayon ang pansin ni Mark sa bahay na ipinagagawa nila ng kanyang misis na si Nicole Donesa, na nakatakdang magsilang sa kanilang anak na babae sa Hunyo 2025.