Hindi napigilang matawa ng viral sensation na si Grace Tanfelix, o mas kilala bilang Mommy Grace, nang kanyang alalahanin ang unang beses na makitang broken-hearted ang anak na si Miguel Tanfelix.

Sa initerview nina Mommy Grace at Miguel sa YouTube vlog ni Toni Gonzaga nitong Lingo, March 9, 2025, napag-usapan kung paano ang relasyon nila bilang mag-ina.

Ayon kay Mommy Grace, noon pa man ay malapit talaga sa kanya si Miguel, open ito sa kanya.

Suportado rin daw niya anuman ang gusto at maging desisyon ni Miguel sa kanyang sarili — mapatrabaho man o personal.

Kabilang na rito ang pagkakaroon ni Miguel ng mga kasintahan.

Tila pambubuko ni Mommy Grace sa anak: “Lover boy, mapagmahal lang talaga to.

“Though lahat naman ng naging girlfriend niya naging okay sa akin, kasi mababait naman silang lahat.

“Basta sa akin, kung sino naman ang gusto ng anak ko, gusto ko rin naman. Basta may limitation.

“Halimbawa, bawal gumimik nang sobrang gabing-gabi na, magpapaalam, mag-a-update kung nasaan ka, kung sino kasama mo.

“Hindi [naman ako strict]. Puwede naman siyang mag-girlfriend.

“Basta [ang advice ko] mag-enjoy lang kayo, gawin niyong inspiration yung isa’t isa.”

GRACE Recalls Miguel’s First Heartbreak

Dahil sa magandang relasyon nilang mag-ina, maging ang unang pagkabigo raw sa pag-ibig ni Miguel ay nasaksihan ni Mommy Grace.

Pambubuking ni Mommy Grace, katorse (14) anyos lamang noon si Miguel nang mangyari ang una nitong heartbreak.

Ito ay nang magkahiwalay ang Kapuso actor at ang kasintahan niya noong si Barbie Forteza.

Pagbabalik-tanaw ng celebrity mom: “Hay naku, natatawa ako noong unang heartbreak niya… ah, si Barbie Forteza pala.

“Batang-bata pa talaga siya noon.

“Naalala ko nagkasalubong kami sa hagdan, sabi niya, ‘Mommy, nag-break na kami.’ Umiiyak siya.

“Natatawa ako, ikinuwento ko nga agad sa mother ko, sa biyenan ko.”

Sundot na tanong ni Toni, “Ano yung sinabi mo nung nakita mong umiyak na yung anak mo?”

Natatawang sagot ni Mommy Grace, “Wala, ang sabi ko, ‘Ah talaga… Awww’ gumanun lang ako.

“Parang hindi naman kasi seryosohan, e. Kasi pagkatapos niya umiyak, naglalaro na siya ulit.”

MIGUEL’S PAST RELATIONSHIP WITH BARBIE

Noong February 9, 2023, sa kauna-unahang pagkakataon ay inamin ni Miguel sa publiko na naging magkasintahan sila ni Barbie.

Ang kanyang pag-amin ay nangyari sa live episode ng Fast Talk with Boy Abunda.

Inilabas ng host na si Boy Abunda ang tila photobook na naglalaman ng mga litratong may kinalaman sa Mga Batang Riles star.

Dito ipinakita ni Boy ang litrato ni Barbie.

Tanong ni Boy, “Alam ko na, in my research, walang admission na nanligaw… Ngayon na you have a chance, niligawan mo ba siya?”

Mabilis na sagot ni Miguel, “Yes, Tito Boy. Pini-post ko po siya dati.”

Sundot na tanong ni Boy, “Pero sinagot ka ba, naging kayo ba?”

Pag-amin ni Miguel, “Naging kami po.

“Naaalala ko po dati bumibisita po ako sa set nila. Pinu-post ko po iyon tapos yung caption ko, ‘bumisita ako,’ ganun.”

Sunod na tanong ni Boy, “Gaano [kayo] katagal?”

Nagdadalawang-isip na sagot ni Miguel, “Hindi ko na maalala, Tito Boy.”

Ayon pa kay Miguel, pagdalaw talaga sa set ang naging daan niya noon para ligawan si Barbie.

Kuwento niya: “Kasi hindi po kami magkasama ng show dati. I was doing Niño [2014] back then, tapos iba po yung show niya.

“Kapag may taping po siya, pinupuntahan ko, nagdadala po ako ng pagkain.

“Kapag malapit po yung set nila sa Cavite, kasi taga-Cavite po ako, pinupuntahan ko [siya].”

Maging ang staff na nasa studio ng Fast Talk with Boy Abunda ay tila nagulat at kinilig sa rebelasyon ni Miguel.

Pero sa ulat ng PEP.ph (Philippine Entertainment Portal) noong October 2014, itinanggi ni Miguel na may relasyon sila ni Barbie kahit kapansin-pansin na ang pagiging close nila sa isa’t isa.

Aniya noon, crush lamang niya ang aktres at magkaibigan lamang sila.

Sabi ni Miguel: “Kami po ni Barbie, una po kaming nagkasama sa Paroa [2012-2013].

“Doon pa lang po, parang naging close po kami.

“Hanggang ngayon, magkaibigan pa rin po kami ni Barbie.”

Niligawan niya ba si Barbie?

Aniya, “Yun nga po, sa Paroa, naging sweet lang kami sa isa’t isa.

“Pero hanggang doon lang po. Crush lang po. Pero marami naman po akong crush.”

Samantala, bukod kay Barbie, kumpirmadong naging nobya rin ni Miguel sina Bianca Umali at Kyline Alcantara.

Ngayon ay pareho nang masaya sina Bianca at Kyline sa kani-kanilang lovelife; si Bianca ay boyfriend si Ruru Madrid at si Kyline naman ay girlfriend na ni Kobe Paras.

MIGUEL AND YSABEL ORTEGA’S RELATIONSHIP

Sa kaso ni Miguel, nauugnay naman siya ngayon sa Kapuso actress na si Ysabel Ortega.

Sa panayam nina Miguel at Ysabel sa Fast Talk With Boy Abunda noong December 12, 2023, sinabi nilang higit pa sa magka-loveteam o magkaibigan ang turingan nila.

“Exclusively dating” na raw sila.

Hindi raw nanliligaw sa iba si Miguel at hindi rin nagpapaligaw sa iba si Ysabel.

Pagtatapat ni Miguel kay Boy: “Napag-usapan po natin kanina, may business [si Ysabel], nagpi-film school naman ako. So, hindi po kami in rush ni Ysabel.

“Alam naman natin na once na nagmadali ka sa isang relasyon ay puwedeng masayang yung isang magandang bagay.”

Mabilis naman itong sinang-ayunan ni Ysabel.

Aniya, malaki ang pasasalamat niya sa Kapuso actor dahil sa pagtitiyaga at pagmamahal nito sa kanya.

May isang segment kunsaan binigyan ng pagkakataon ni Boy sina Miguel at Ysabel na tanungin ang isa’t isa.

Tanong ni Miguel kay Ysabel, “I just wanna know kung genuinely happy ka ba sa kung anong meron tayo ngayon?”

Sagot ni Ysabel, “Honestly, yes, of course. Super.

“Hindi mo alam how much you make me happy.”

Sundot na tanong ni Boy, “Ysabel, is there a specific thing that really makes you happy?”

Sa puntong ito, naging emosyunal na si Ysabel nang isa-isahin kung paano siya napapasaya ni Miguel.

Ayon sa dalaga: “Siguro yung patience niya.

“Well, kasi halos araw-araw magkasama kami. Even kapag hindi kami magkasama, lagi niya akong kinakausap and palagi akong nagra-rant sa kanya about my problems.

“Super grateful ako na palagi siyang nandiyan para makinig sa lahat.”

Hindi rin pinalampas na tanungin ni Ysabel si Miguel.

Tanong niya sa binata: “How long are you willing to love me?”

Mabilis na sagot ni Miguel, “Ako, tama yung sinabi ni Tito Boy kanina, na yung love makes you stronger. And ako, never kong nakita yung sarili ko na ganito before.

“So, nagugustuhan ko yung version ng self ko ngayon kaya I’m willing to wait.

“Yung patience ko kahit na hindi ako pasensiyosong tao, hinahabaan ko for you.”

Noong February 9, 2023, sa Fast Talk With Boy Abunda rin, ibinunyag ni Miguel sa publiko na nililigawan niya si Ysabel, kasabay ng panliligaw niya sa ina ng aktres na si Michelle Ortega-Pimentel.