May ilang kaibigang nagparating sa amin ng video at pictures na spotted sa isang casino na magkasama sina Mark Herras at ang businessman/singer na si Jojo Mendrez.

May malisya ang pag-post ng ilang nagkalat nito na pinapalabas na may namamagitan kina Mark at Jojo na naglalaro sa casino.

Nag-text kami kay Mark para linawin ito sa kanya, pero as of this writing ay hindi pa siya sumasagot.

Kilala naman ng PEP Troika si Jojo kaya tinawagan na namin para sagutin kung ano ba talaga ang totoo.

Sabi ni Jojo, magkakilala daw sila ni Mark, pero hindi naman daw sila ganun ka-close. Nagkita lang daw sila sa Starbucks sa may Okada kasama ang handler at manager ni Jojo na si David Cabawatan ng Aqueous Entertainment.

“Nagkita kami sa Starbucks sa Okada, pero doon kami sa bandang madilim, kasi nga siyempre iniiwasan ko na nga yung usapan na galing nga si Mark Herras sa pagsasayaw sa bar, di ba?

“Siyempre, pinag-uusapan yung gay-gay issue na yan. Kaya ang ginawa namin, dun kami sa may gilid na madilim sa Starbucks,” simulang kuwento ni Jojo.

Ang napag-usapan daw nila roon ay kukunan daw nila ng video si Mark na sasayawan ang latest single na ni-record niya, ang “Somewhere In My Past.”

Ito yung kantang pinasikat ng namayapang child star na si Julie Vega. Ni-revive ito ni Jojo, at sinisimulan na nilang i-promote.

Nagkasundo silang kunan nila ng video na sumasayaw si Mark sa kantang iyon kaya naghanap sila ng magandang location na hindi matao at maingay. Hindi lang nilinaw kung gagamitin ba iyon sa TikTok o kung saan mang social media account.

Sabi pa ni Jojo may kuwarto raw sa Okada ang manager niyang si David at ilan pa nilang kasamahan. Kaya nag-decide daw silang umakyat na lang para doon sa kuwarto kunan si Mark.

“Pinalabas na nag-check-in kami ni Mark Herras,” pakli ni Jojo.

“Nang dumaan kami sa lobby, siyempre na-recogize siya [Mark] na nakitang magkasama kami. Nagpunta kami dun sa kuwarto. Kumbaga, walang malisya yun.

“Parang ginawan lang ng content yung sa ‘Somewhere in My Past’ ko, na nagsayaw siya,” dagdag niyang pahayag. Pagkatapos ng shoot kay Mark, naiwan ba silang dalawa sa kuwarto o naglaro na lang sila sa casino?

Ang dagdag na kuwento ni Jojo, aalis na raw ang manager niya, pero hindi raw siya pumayag na maiwan silang dalawa ni Mark sa kuwarto.

“Pagkatapos niyang sumayaw, dapat maiwan ako dun, pero ayoko. Sinabi ko kina David, baka mamaya mangyari yung dati kay Sandro Muhlach, natakot ako, pag maiwan kami dun ni Mark, e. Nagkukuwentuhan lang naman kami dun. Alam mo na, baka may isyung ganun, di ba? Mahirap na. Kaya, nagkayayaan kami sa casino.

“Habang nagpi-play kami, dami nagpapa-picture [kay Mark]. ‘Tapos, kahit nasa casino, nagpi-play, may mga nagpi-picture pa rin sa kanya. Kaya paano ka makakaiwas? Iyon yung nilagyan nila ng kulay,” patuloy na salaysay ni Jojo.

Nauna na raw siyang umuwi, at iniwan na raw niya si Mark na patuloy na naglalaro.

“Nanalo pa si Mark ng 60 thousand, pero wala na ako dun nung nanalo siya. Nauna na akong umalis,” sabi pa ni Jojo.

Nahihiya raw siyang maisyuhan nang ganun si Mark na mabait sa kanya.

Pero kung hindi pa rin daw maiwasang may mga nagdududa at minalisyahan ang nakitang magkasama silang dalawa, wala na raw siyang magagawa.

Pero wala na raw siyang pakialam sa sinasabi ng iba.

“Ang dami na ngang nagtatanong sa akin. Bahala sila kung ano ang iniisip nila,” sabi pa ni Jojo.

Gayunpaman, naglabas naman ng statement ang management niyang Aqueous Entertainment tungkol dito sa pamamagitan ng official Facebook page ni Jojo:

“Statement from AQUEOUS ENTERTAINMENT Management:

“The post showing the photos of our artist Jojo Mendrez and Mr. Mark Herras together is purely a malicious content. Jojo and Mark are good friends. Nothing more. Nothing less.”

NOEL FERRER

Kahit si Mark ay wala namang pakialam sa ganung malisyosong isyu.

Sinabi niya sa interview sa kanya ni Toni Gonzaga at sa Fast Talk With Boy Abunda, hindi na raw siya naaapektuhan sa sinasabi ng mga tao.

Ang sa kanya ay trabaho lang at wala na siyang iniisip na makakasira sa kanyang imahe. Ang mahalaga sa kanya ngayon ay trabaho. Wala na raw siyang hiya-hiya basta para kumita para sa kanyang pamilya.

Sa latest na in-upload sa YouTube channel ng mag-asawang Mark Herras at Nicole Donesa, in-update nila ang ipinapagawa nilang bahay, na tinawag nilang Casa Corky, sunod sa pangalan ng panganay nilang anak.

Ito yung dati pang bahay ni Mark sa Quezon City, na talagang binago nila ang structure. Malapit na itong matapos at unti-unti nang napupuno ng mga bagong gamit.

Talagang tinututukan nilang mag-asawa ang lahat ng detalye sa bahay. Sa YT channel nilang mag-asawa, idinetalye ni Nicole ang ipinapagawang kusina, pati ang kuwarto ng panganay nilang anak na si Corky hanggang sa guest rooms.

Ipinakita rin doon ang ipinagawa nilang swimming pool na nilagyan nila ng harang para hindi agad-agad mapuntahan ng kanilang mga anak sakaling maglilikot ang mga ito.

Sabi ni Nicole, titiyakin nilang makapag-swimming lessons si Corky at ang pangalawang anak nilang ipinagbubuntis pa niya.