Marian Rivera looks back on “selosa” days

Marian Rivera on overcoming jealousy: “Ang punto ko kasi sa buhay, sobrang happy ako sa ibinigay ni Lord sa akin, wala nang dahilan para yung bitterness ko, nandito pa. Ni-let go ko na iyan…”
PHOTO/S: Courtesy of Marian Rivera

Aminado si Marian Rivera na napakaselosa niya noon.

Pero klinaro niyang nasa lugar ang kanyang pagseselos.

Halimbawa, kung may nakikita at nararamdaman siyang hindi kaaya-aya sa babaeng kausap o kasalamuha ng kanyang mister na si Dingdong Dantes, hindi raw siya yung tipong magkikibit-balikat lamang.

Ito ang inamin ni Marian sa panayam ni Karen Davila para sa Women’s Month Special vlog ng Kapamilya newscaster na in-upload sa YouTube noong March 20, 2025.

Marian Rivera’S “SELOSA” PHASE

Diretsahang tanong ni Karen, “Selosa ka ba?”

Mabilis na sagot ng Kapuso actress, “Nasa lugar. Very transparent. Sayang nga, e, kung puwede ko lang i-rewind, di ba?”

Sundot na tanong ng broadcast journalist, “So selosa ka noon?”

Depensa ni Marian, hindi siya nagseselos kung walang rason.

Aniya: “E, kasi may dahilan. Ang babae, hindi magseselos kung walang dahilan. Nature ng babae iyan.

ADVERTISEMENT – CONTINUE READING BELOW ↓

“Kapag may nakita kang alanganin na ginagawa ng babae doon sa partner mo, alangan naman na [palakpakan mo at sabihing], ‘Ang galing, ang sweet nila together, o, kinikilig ako.’

“My God napaka-ipokrita non. No, no, no for me.

“Kapag may sitwasyon na nakikita mong alanganin, magre-react ka talaga.”

Ang na-realize ni Marian na pagkakamali niya noon ay nagre-react siya agad sa babaeng kanyang pinagseselosan na hindi man lang kinakausap si Dingdong.

Natatawa niyang sabi, “Ayun lang, nagre-react agad ako doon sa babae. Dapat pala [kay Dong] ako nagre-react.”

Sabi pa ni Marian, malaking bagay na naging nanay siya kaya nabago ang ilang pananaw niya sa buhay.

Malaking tulong din na ipinapaunawa ni Dingdong ang mga bagay na hindi niya noon lubos na naiintindihan.

Ito raw ang isang dahilan kung bakit mas naging matatag ang kanilang relasyon.

Hindi na pinangalanan ni Marian ang mga babaeng pinagselosan niya noon.

Matagal na raw siyang naka-let go at pinili niyang huwag mabuhay nang may bitterness sa puso.

Pahayag niya: “Kapag nakikita ko sila, naiilang sila kasi alam nila yung sitwasyon kung bakit ko ginawa iyon sa kanila.

“Pero ngayon, kapag nakikita ko, I’ll try to be civil. May isa ngang pagkakataon, ako na yung nag-initiate na [nagsabing], ‘Pinapatawad na kita.’ Tapos naloka siya.

“Ang punto ko kasi sa buhay, sobrang happy ako sa ibinigay ni Lord sa akin, wala nang dahilan para yung bitterness ko, nandito pa. Ni-let go ko na iyan.

“Sa isip-isip ko na lang, ‘Learn your lesson girl, ha, huwag mo nang gawin iyon sa iba.’

“Pero ayun nga, mas masarap pa rin na wala kang kaaway, pinapatawad mo yung mga taong nakagawa sa iyo ng kasalanan.”

THE LADIES MARIAN RIVERA HAD RIFTs WITH

MARIAN RIVERA VERSUS HEART EVANGELISTA

Isa sa mga most publicized rifts ni Marian ay yung kay Heart Evangelista, na nakatrabaho niya sa pelikulang Temptation Island noong 2011.

ADVERTISEMENT – CONTINUE READING BELOW ↓

Nagsimula ito sa ilang alingasngas noon sa X (dating Twitter) at mga blind items.

Pero kaagad itong pinabulaanan ni Heart sa kanyang tweet noong June 11, 2011.

Saad ni Heart noon, “Let’s not make a big fuss. Marian and I are okay. Showbiz is showbiz so, Heartworld, wag na tayo mag-away-away.”

Ngunit kinumpirma ng isang report na may nangyari talagang insidente sa airport sa Manila noong June 13, 2011, kung saan sangkot pa raw ang ina ni Heart na si Cecile Ongpauco.

Galing sina Heart at Marian, kasama ang iba pang cast at crew ng Temptation Island, sa Paoay, Ilocos Norte, kung saan kinunan ang mga natitirang eksena ng kanilang pelikula.

Ayon sa report ng veteran columnist na si Mario Bautista sa People’s Journal noong June 14, 2011, pagdating sa Manila airport ay lalapit sana si Marian kay Heart para magpaalam.

ADVERTISEMENT – CONTINUE READING BELOW ↓

Pero bigla raw siyang sinigawan ng ina ni Heart, na naroon upang sunduin ang anak.

Ang linya pa nga raw ni Mrs. Ongpauco, “Stay away from my daughter!”

Napaiyak daw si Marian sa mga narinig.

Ayon sa ilang sources ng PEP.ph (Philippine Entertainment Portal), tila nagsimula ang gusot habang nasa set sila ng Temptation Islands.

Paulit-ulit daw kasi na nagparinig si Heart na excited na siyang maka-partner sa isang project si Dingdong, na boyfriend pa lang ni Marian at that time.

Napikon daw si Marian at kinumpronta si Heart, na nagsumbong naman sa kanyang mommy.

Kaya nung dumating sa airport si Heart, may mga sumalubong pa raw sa kanya na mga bodyguards.

Ang iringan nina Marian at Heart ay tumagal ng mahigit isang dekada.

Nagkabati lamang sila noong 2023.

MARIAN’S RIFT WITH BELA PADILLA

Isa pa sa napabalitang nakaalitan ni Marian ay ang Kapamilya actress na si Bela Padilla.

Ito’y matapos nilang magsama sa seryeng Endless Love, kunsaan leading man dito ni Marian si Dingdong.

Ayon sa mga lumabas na ulat noon, nagalit si Marian kay Bela dahil kapag may eksena raw si Bela na kayakap si Dingdong ay sadyang idinidikit nito sa aktor ang kanyang dibdib.

Mariing itinanggi ito ni Bela sa naging panayam niya noong August 2010.

Saad noon ng dalaga:

“Hindi ko po alam kung saan nanggaling ang balitang iyon. But how can you hug a person without touching him?

“Ako naman po, ginagawa ko lang kung ano ang utos sa akin nina Direk Mac Alejandre at Direk Andoy Ranay.

“Minsan nga kapag nakikita nilang parang naaalangan ako, sinasabi nilang yakapin ko si Dingdong.

ADVERTISEMENT – CONTINUE READING BELOW ↓

“Hindi naman kasi kami bago lang nagkakakilala sa story, fiancée ako ni Johnny at malapit na kaming ikasal.”

Johnny ang pangalan ng karakter na ginagampanan noon ni Dingdong.

Dagdag pa ni Bela, “I’m just playing what the role asks of me. Kaya naman after ng aming take, lumalayo na ako kay Dingdong. Hindi na ako nakikipag-usap sa kanya.”

Katulad ni Heart, all good na rin ngayon sina Marian at Bela.

MARIAN’S RIFT WITH ANDREA TORRES

Selos din ang dahilan ng hindi pagkakaunawaan nina Marian at Andrea Torres, na nakasama ni Dingdong sa primetime series na Alyas Robin Hood noong 2016.

Kinausap diumano ni Marian si Andrea sa set ng Alyas Robin Hood dahil sa matindi raw nitong pagseselos.

Ngunit nilinaw ni Andrea sa isang panayam noon na wala pa siya sa set nang dumating si Marian para dalawin si Dingdong. In short, hindi raw sila nakapag-usap.

ADVERTISEMENT – CONTINUE READING BELOW ↓

Noong May 2017, iniulat ng PEP ang isnaban nina Marian at Andrea sa backstage ng Kapuso variety show na Sunday Pinasaya.

Hanggang sa makapanayam noon ng PEP sa isang event si Andrea, nanindigan siyang, “Wala, walang issue.”

Pero ayon naman sa mga nakapaligid sa dalaga, ayaw lang daw niyang magsalita.

In fact, life-changing ang rift na yun para kay Andrea to the point na umalis siya sa poder ng Triple A Management, na siya ring nagma-manage sa career ni Marian.

MARIAN’S RIFT WITH RHIAN RAMOS

Isa pang leading lady ni Dingdong ang napabalitang pinagselosan ni Marian ay si Rhian Ramos.

Si Dingdong ang leading man ni Rhian sa defunct GMA-7 series na Genesis.

Bago nito ay nagkasama rin sila sa teleseryeng Stairway to Heaven (2009).

Katulad ni Andrea, nagdedmahan daw sina Rhian at Marian nang bumisita ang huli sa set ng Genesis.

ADVERTISEMENT – CONTINUE READING BELOW ↓

Pero pareho nilang pinabulaanan ito.

Hanggang sa nagtagpo ang mga landas ng dalawang leading ladies sa isang event noong 2013.

Dito nila napag-usapan ang mga intrigang lumalabas sa kanilang dalawa.

Buong puso raw na sinabi ni Rhian na walang dapat ikabahala at ipagselos si Marian sa tambalan nila ni Dingdong.

Matapos makapag-usap nang masinsinan ay nakapag-ayos sila.

Back to the vlog interview, bukod sa selos, napag-usapan din nina Marian at Karen ang pagiging anak, maybahay, at ina ni Marian sa dalawa niyang anak na sina Zia, 9, at Sixto, 5.

Marian Rivera’s “number one” priority: her family. She is a dutiful wife to her husband Dingdong Dantes (back) and a hands-on mom to Zia (R) and Sixto (middle, seated).