Katakut-takot na pang-aasar ang inabot ng Kapuso actor na si Jak Roberto nang mapag-alamang wala siyang ka-date sa Valentine’s Day.

Nitong Huwebes, February 14, 2025, nang magsilbing hurado sa segment ng “Sexy Babe” ng It’s Showtime si Jak.

Kasama niya sina Jameson Blake at Chie Filomeno.

Dahil Araw ng mga Puso, natanong ng host na si Vice Ganda kung anu-ano ang plano ng tatlong hurado sa Valentine’s Day.

Unang sumagot si Chie na sinundan naman ni Jameson.

Panghuling tinanong ni Vice si Jak kung ano ang plano nito sa Valentine’s Day.

“Jak, kumusta ang Valentine’s Day? Mayroon ka bang pinagkakaabalahan today na magaganap tonight? Mayroon ka bang pagkakabisihan?” tanong ni Vice sa Kapuso actor.

Napakamot muna sa ulo si Jak bago ito sumagot ng, “Valentine’s pala ngayon, akala ko me-time day.”

Sabay bawi ni Jak, “Hindi, joke lang.”

Sundot na tanong ni Vice sa kanya, “So, wala kang date tonight?”

Mabilis na sagot ni Jak, “Wala, wala.”

JAK ROBERTO’S PAST CELEBRATION OF VALENTINE’S DAY

Kilala ng marami si Jak na may ka-date tuwing Valentine’s Day, lalo na noong sila pa ni Barbie Forteza.

Noong 2020, sorpresang nag-set up ng romantic “movie-like” dinner date si Jak sa bahay mismo ni Barbie sa Biñan City, Laguna.

Noong 2020 naman sorpresang pinuntahan ni Jak si Barbie sa set ng defunct primetime series nitong Anak ni Waray vs. Anak ni Biday para makasama itong magdiwang ng Valentine’s Day.

Hindi rin pinalampas ni Jak ang taong 2021 nang mag-set up siya ng movie at dinner date nila ni Barbie sa pick-up truck.

Taong 2022 unang beses na hindi nakapag-celebrate na magkasamang pisikal sina Jak at Barbie dahil sa naka-quarantine siya noon dahil sa COVID-19 protocol.

Gayunpaman, siniguro pa rin ni Jak na magiging memorable ang kanilang araw nang padalhan niya si Barbie ng dinner habang magka-video call silang kumakain.

Taong 2023 nang sunduin ni Jak si Barbie sa kanilang bahay para pumunta sa ipina-reserve nitong steak restaurant.

Gaya noong 2023, sa isang restaurant din noong 2024 ipinagdiwang nina Jak at Barbie ang huli nilang Valentine’s Day na magkasama bago sila tuluyang maghiwalay.

JAK roberto-BARBIE forteza BREAKUP

Noong January 2, 2025, nag-post si Barbie sa Instagram upang ipaalam sa publiko ang pagtatapos ng pitong taong relasyon nila ni Jak.

Sa kanyang madamdaming post, mahihinuhang tila walang sama ng loob si Barbie sa paghihiwalay nila ng aktor.

Pinuri pa ng aktres ang dating kasintahan nang sabihin nitong naging masaya siya sa kanilang naging pagsasama sa loob ng mahabang panahon.

Sinimulan ni Barbie ang kanyang breakup announcement sa pamamagitan ng isang quote mula sa American children’s author na si Theodor Seuss Geisel a.k.a. Dr. Seuss.

Bungad ng Kapuso actress, “’Don’t cry because it’s over. Smile because it happened’ – Dr. Seuss.”

Kasunod nito ay ang pagbabalik-tanaw ni Barbie sa seven-year relationship nila ni Jak.

Papuri ng aktres sa dating nobyo: “Having you in my life was the happiest I had ever been. Seven wonderful years. A lot of laughs, a lot of ramen and so much love.

“Your love was exceptional.

“But sometimes, good things fall apart so better things can come together.

“Beautiful goodbye, @jakroberto”

Dagdag pa ni Barbie, “Thank you for loving me the way you did. I am excited for what’s to come for the both of us. You take care of yourself. May you find the love you deserve.

“I hope for everyone’s understanding and I wish you can help us put this matter to rest.”

Habang sinusulat ang artikulong ito ay wala pang sinasabi sina Jak at Barbie sa dahilan ng kanilang paghihiwalay.