Walang direktang pahayag sina Kim Chiu, 34, at Paulo Avelino, 36, sa estado ng kanilang relasyon.

Pero panay ang tukso sa kanila ng kanilang co-stars na kinikilig daw sa chemistry ng dalawa sa pelikulang My Love Will Make You Disappear.

Humarap sa press sina Kim, Paulo, at ibang cast members ng pelikula noong Miyerkules, February 19, 2025.

Kasama sa cast sina Wilma Doesnt, Lovely Abella, Benj Manalo, Migs Almendras, Martin Escudero, at Karina Bautista.

Napag-usapan dito ang napabalitang pambubuking umano ni Wilma na may “relasyon” sina Kim at Paulo.

Sabi ni Kim, “Buti pa siya alam niya!”

Biro ni Wilma, ang totoong headline ay “Wilma Doesn’t Give Hint At Kim and Paulo’s Relationship.”

Ibig daw sabihin ay di siya nagbigay ng hint.

Biro ulit ni Wilma, “O, bakit niyo ako kinukuwestiyon ngayon?”

Singit ni Kim, “Eto naman ang damot, ayaw magbigay ng hint!”

Nainterbyu kasi si Wilma tungkol dito.

Paliwanag ni Wilma: “Okay, nung tinanong ako, ‘Sila ba?’ ‘Lagi sila nasa tent, e.’ Masama ba yun?

“Tapos, ‘Sila ba?’ ‘Parang.’

“So nung na-headline, ‘Wilma Doesn’t Give Hint.’ So, di yun totoo!’”

Komento ni Kim, “Doesn’t nga, di ba?

“Actually, si Miss Wilma, siya talaga yung push na push. Gusto nga niya gumawa ng GC [group chat], di ba?”

Paglilinaw ni Wilma, si Lovely Abella raw ang may gustong gumawa ng GC.

Sabi naman ni Lovely, usapan nilang gagawa sila ng GC kung saan magbibigay ng “update” si Kim kung sila na ni Paulo.

Singit ni Kim, “Pero wala pang GC.”

Salo ni Lovely, “So, wala pa kaming maa-update.”

PAULO AVELINO SENDS FLOWERS TO KIM CHIU

Dito ay kinumpirma ni Paulo na nagpadala siya ng bouquet of flowers kay Kim noong Araw ng mga Puso.

“Yeah, may pinadala akong flowers,” nakangiting pag-amin ni Paulo.

Ibinahagi ni Kim ang litrato ng red, pink, and yellow roses na galing kay Paulo. May note card ding may pangalang “Kimberly.”

Kimberly Sue Yap Chiu ang buong pangalan ni Kim.

Kuwento ni Kim, umaga niya natanggap ang mga bulaklak.

“Siyempre paggising mo, ‘Uy, Kim, may flowers ka daw.’ ‘Saan galing?’” lahad ng actress-TV host.

Akala pa raw ni Kim noong una ay galing ito kay Laurenti Dyogi, head ng ABS-CBN TV Production at Star Magic.

Sabi raw sa note card, “Happy Valentine’s Day. From Paulo.”

Kinilig daw si Kim nang makita niyang galing iyon kay Paulo.

“Yiiii,” panunukso ni Kim sa sarili.

Sabay kanta ni Kim ng mga linya ng awiting “Dilaw” ni Maki: “Alam mo ba muntikan na / Sumuko ang puso ko / Sa paulit-ulit na pagkakataon / Na nasaktan nabigo / Mukhang delikado na naman ako…”

Natawa si Kim sa panunukso sa sarili at paglagay niya ng “musical scoring” para sa sarili.

Pangiti-ngiti lang si Paulo.

KIM ON KILIG MOMENTS WITH PAULO

Sa isang punto ng presscon, tinanong ang cast ng My Love Will Make You Disappear kung kailan sila huling kinilig sa tunay na buhay.

Sumagot si Kim na bago ang mediacon ay kinilig siya.

“Binigyan niya ako ng tinapay kanina,” tukoy ni Kim kay Paulo.

Sabay natatawang hirit ni Kim, “Yes, tinapay lang pala! Mahina si Ate ko! Mahinang nilalang siya.”

Dugtong pa niya patungkol kay Paulo, “Dinalhan niya ako ng pasalubong after Showtime.”

Sabay itinuro ni Paulo ang ilang staff ng Star Cinema na nasa audience area ng Dolphy Theater.

“Yung mga nasa office sa Star nagre-react din sila. Binigyan ko rin sila,” ani Paulo.

Sang-ayon ni Kim, “Lahat kami binigyan.”

Hindi naman isyu kay Kim na hindi lang siya ang binigyan ng tinapay ni Paulo.

Pagpapatawa ni Kim, “At least, di sa ihi kinilig.”

Sa parte ni Paulo, nag-isip muna siya kung kailan siya huling kinilig.

“Sa amin kasing mga lalaki, di ko alam paano i-explain yung kilig.

“Ewan ko. Siguro… Ngayon. Haha!” pasakalye muna niya.

Dagdag ng aktor, “Ano ba? Siguro pag nakikita ko sa baunan ni Kim na may gulay, ta’s walang halong karne. Uy, medyo kinikilig.”

Biro ni Kim, “Kinilig siya sa cook namin.”

Tatlong klaseng ulam daw kasi madalas ang baon ni Kim, at tinutukso siya ng co-stars nila na sadyang inilalaan ni Kim ang isang baon niyang ulam para kay Paulo.

CLOSER AFTER THREE PROJECTS

Sa huli, ang tanging inamin nina Kim at Paulo ay mas close na sila sa isa’t isa ngayon.

Ayon kay Paulo, pangatlong proyekto na nila ni Kim ang My Love Will Make You Disappear kaya masasabi niyang close na sila.

Una silang nagkatrabaho sa hit drama series na Linlang (2023), at sinundan ng Pinoy adaptation ng K-drama na What’s Wrong With Secretary Kim? (2024).

Sabi pa ng aktor: “Di ko alam na makakatrabaho ko si Kim. I wanted to work with her.

“Pero hindi ko in-expect kasi, after a while, iba na rin tahak na gusto ko gawin [sa showbiz career].

“Di ko alam na kay Kim pala bagsak ko.”

Napatili si Kim sa kilig, “Puwede wala na further question?!”

Naalala naman ni Kim na sabay sila ni Paulo na sumabak sa showbiz.

Mas matanda nga lang daw sa kanya si Paulo, pero pareho silang produkto ng reality show.

Si Paulo ay finalist ng StarStruck ng GMA-7, habang si Kim ay Big Winner ng Pinoy Big Brother ng ABS-CBN noong 2006.

Nagbiro si Kim na ibinoto pa raw niya noon si Paulo.

Ayon kay Kim, hindi niya akalaing magiging close sila ni Paulo dahil polar opposites sila.

Kung siya ay madaldal, si Paulo naman ay tahimik.

“Di ko alam papano siya kakausapin,” ani Kim.

Pero ngayon ay aminado si Kim na “minsan” ay nakakasama niyang mag-workout si Paulo.

Minsan nang naiulat na matchy-matchy ang kanilang black and pink bikes.

Sa March 26 ipalalabas sa mga sinehan ang My Love Will Make You Disappear.

Ang direktor ay si Chad Vidanes, habang ang screenplay ay isinulat ni Prime Cruz.