GORGY RULA

Nasa It’s Showtime si Maris Racal nitong Miyerkules, February 5, 2025, para mag-promote ng Netflix original movie nila ni Anthony Jennings na Sosyal Climbers.

Sa February 27 ito magsisimulang mag-streaming sa Netflix.

Naglaro si Maris sa “Hide And Sing” segment, pero bago niya hulaan kung sino ang celebrity singer, pinromote muna niya ang pelikula nila ni Anthony.

Sinabi ng aktres na may pelikula siyang Sosyal Climbers na dapat abangan sa Netflix, pero hindi nito binanggit kung sino ang katambal niya.

Sa buong appearance ni Maris sa It’s Showtime ay hindi nabanggit ang pangalan ni Anthony.

MARIS RACAL APOLOGIZES TO VICE GANDA

Nang tinanong si Maris kung sino sa tingin niya ang celebrity singer, biglang sumingit si Vice Ganda, na nakaupo sa audience section katabi ni Ogie Alcasid.

Tili ni Vice kay Maris, “Buneng, bakit sumasama ka sa usapin ng mga matatanda, Buneng!”

“Buneng” ang pangalan ng karakter ni Maris sa pelikulang And The Breadwinner Is…, na pinagbidahan ni Vice at entry sa MMFF 2024.

Napatingin si Maris kay Vice, na inulit ang dialogue niya sa kanilang pelikula.

“Kasi lipstick mo, Buneng! Sali ka lang nang sali sa usapan ng matatanda,” tili uli sa kanya ni Vice.

“Sorry, matanda ka nga! Sorry!” buwelta ni Maris sabay hagalpak ng tawa.

“Buneng! Buneng, humanda ka sa akin mamaya, Buneng!” sabi uli sa kanya ni Vice.

Biglang pumormal ang mukha ni Maris.

Aniya, “Hindi, kasi ano, e, parang… gusto ko na magsalita, Ate.”

“Huwag na, Buneng, kami na ang bahala dito,” sundot ni Vice.

“Ate, sorry hindi ako nakapag-promote!” natawang sambit ni Maris.

Ang tinutukoy ni Maris ay ang hindi niya pagpu-promote ng And The Breadwinner Is… dahil kasagsagan noon ng isyung kinasangkutan ng aktres at ni Anthony.

Inakusahan ng cheating sina Maris at Anthony ng ex-girlfriend ng aktor na si Jam Villanueva.

Seryosong sabi ni Vice kay Maris, “Okay lang, Buneng, mas mahalaga ka kesa dun sa pelikula.”

Tugon naman ni Maris, “Meme, I love you so much talaga. Totoo ‘to.”

Nagkatawanan na naman sila nang sinabi ni Vice sa kanya, “Pero gusto ko rin humingi sa iyo ng paumanhin. Wala kang bonus!

“Hindi. Mas mahalaga ka kaysa sa kung saan man at kung ano pa man. I love you, Buneng.”

Ulit ni Maris, “I love you, Meme.”

Pagkatapos ng segment ng guesting ni Maris, tumuloy siya sa It’s Showtime Online para doon uli mag-promote ng Sosyal Climbers.

Pinag-usapan muna nila ang Incognito, na sinabi pa ni Maris na siya raw ang nag-suggest sa production na kulutin ang buhok niya.

Ang Grammy winner na si Chappell Roan daw ang inspirasyon ni Maris sa bago niyang hairstyle.

Nang pinromote muli ni Maris ang Sosyal Climbers, binanggit na nito si Anthony Jennings na kasama niya sa pelikula.

NOEL FERRER

Ako, dati ko pa sinabi ito… mahal ko si Maris Racal.

At sumasang-ayon ako kay Direk Joey Reyes nang sabihin niyang, “Regardless of what you think or feel about their personal choices, there is no denying whatsoever… that these two are samples of the BEST YOUNG ACTORS in our local entertainment universe today.

“Add Kaila Estrada to the fray. They elevate their TV series far above the complexities of action scenes.

“I am their fan.”

Magkakasama sina Maris, Anthony, at Kaila sa Incognito.

Hayyyy, lilipas din ito and things will be better!!!

JERRY OLEA

Noong Enero 31, 2025, Biyernes, at Pebrero 1, Sabado, nanguna ang The Trauma Code: Heroes on Call sa Top 10 TV Shows in the Philippines sa Netflix.

Pumangalawa for two days ang Incognito, kung saan tampok ang MaThon tandem nina Maris Racal at Anthony Jennings.

Pero mula Pebrero 2, Linggo, hanggang ngayon ay nasa top spot na muli ang Incognito.

THE OTHER “MARIS RACAL”

Si Carmi Martin, inamin na naging “Maris Racal” din siya sa totoong buhay. Hindi na niya inulit ang maging third wheel sa isang love triangle.

Si Herlene Budol, ipinahiwatig sa mediacon ng Binibining Marikit na minsan din siyang naging “Maris Racal.”

Nauna si Hipon Girl sa “kain tayo” screen shot ng conversation with Rob Gomez.

Makakatulong kaya sa Binibining Marikit iyong mga hanash ni Herlene kaugnay sa “nakalipas” nila ni Rob, kung ano man iyon?

Take note na ang tunay na pangalan ni Tony Labrusca na leading man ni Herlene sa Binibining Marikit ay Anthony Angel Labrusca Jr.

Parehong may “Anthony” sina Herlene at Maris.

Between Herlene and Maris, sino ba ang mas maalindog at kahali-halina?