GORGY RULA

Ang dami nang nagpu-post sa social media na ang mga uupong judge sa pagbabalik ng Pilipinas Got Talent ay sina Mr. Freddie Garcia, Eugene Domingo, Donny Pangilinan, at Kathryn Bernardo.

Ang dami tuloy nagtatanong sa amin kung totoo bang si Donny na ang susunod na ipa-partner kay Kathryn.

Kasi, talagang hopia pa rin ang KathDen fans kung may kasunod na project ba ang loveteam nina Kathryn at Alden Richards pagkatapos ng Hello, Love, Again.

GOODBYE KATHDEN, HELLO KATHDON?

Tapos na nga kaya ang KathDen at papalitan na ito ng KathDon?

Di ba, binabanggit na sa ilang vlogs na hindi na raw itinuloy ni Alden ang panliligaw kay Kathryn?

Sa isang vlog ni Dolly Ann Carvajal, sandali niyang nakatsikahan si Alden sa birthday celebration ni Boots Anson Roa-Rodrigo.

Dito ay nabanggit ng Kapuso actor ang pagpanaw ng kanyang lolo.

Tinanong ni Dolly Ann si Alden kung naipakilala ba niya si Kathryn sa lolo niya bago ito pumanaw.

“Hindi na po. Kasi supposedly, before, we planned to go to the house to meet also the family, but hindi na po nagkaroon ng chance, e. Hindi na po umabot,” sabi ni Alden.

NOEL FERRER

Mukhang malapit pa rin namang magkaibigan sina Kathryn at Alden, pero wala pang makapagsabi kung meron pa rin bang ligawan.

Pareho silang rarampa sa Bench Body of Work sa Marso 21, 2025, sa SM Mall of Asia Arena.

Magsasabay kaya ang KathDen? Ano kaya kung kasali rin sa show si Donny?

Tapos, mapapagitnaan si Kathryn nina Donny at Alden na parang ipinahihiwatig…

Goodbye, Alden! Hello, Donny!

Malaking WHAT IF lang iyan, ha?!

Ako, gusto ko pa ring makita ang KathNiel na magkasama ulit sa isang project.

OK pa rin sila sa akin.

Sa kanilang dalawa kaya, ok pa rin kaya kina Kath at Daniel Padilla na magkasamang muli sa isang project?

Sana talaga.

JERRY OLEA

Matapos ilunsad ng Regal Entertainment ang FranSeth tandem sa MMFF 2024 entry na My Future You, balak ng Regal executive producer na si Roselle Monteverde na “paghiwalayin” sina Francine Diaz at Seth Fedelin sa susunod na movie projects.

Dahil pinakamalakas na pelikulang Pinoy sa kasaysayan ang reunion movie nina Kathryn Bernardo at Alden Richards na Hello, Love, Again, kabilang tayo sa mga hopia’t asado na magtatambal sila sa teleserye.

Nakikini-kinita nating bagay sila sa Pinoy adaptation ng K-dramang Queen of Tears.

WHAT ABOUT BELLE?

SAKALING kay Donny Pangilinan naman itatambal si Kathryn, paano na si Belle Mariano?

Tama ba ang naulinigan nating baka ipareha si Belle sa newbie na si Robbie Jaworski?

Take note na before Belle, ang ka-loveteam ni Donny ay si Kisses Delavin.

And before Daniel Padilla, ang ka-loveteam ni Kathryn ay si Albie Casiño.

May mga nagsusulong din para magsama sa isang project sina Kathryn at Enrique Gil.

Abangan natin kung mag-a-align ang mga bituin sa kalawakan para sa mga tambalang KathDon at RoBelle!!!