Pinabulaanan ni Sam Milby ang kumakalat na espekulasyong may kaugnayan si Moira dela Torre sa breakup nila ng longtime girlfriend at fiancée niyang si Catriona Gray.

Nitong Martes, February 18, 2025, direktang inamin ni Sam na hiwalay na sila ni Catriona.

Ang pag-amin ni Sam sa matagal nang usap-usapang estado ng relasyon nila ni Catriona ay nangyari sa eksklusibong panayam niya kay MJ Felipe ng ABS-CBN News.

Dito diretsahang tinanong ni MJ si Sam kung sila pa ni Catriona.

Diretsong sagot ni Sam, “No.”

Nilinaw rin ni Sam na hindi third party ang dahilan ng breakup nila ni Catriona.

Diin ng Kapamilya actor: “There was never a third party sa amin ni Cat. That needs to be cleared. There is no truth to it at all.

“It makes me sad, may babala ako sa mga tao. Please mag-ingat kayo sa mga nakikita niyo sa online.

“If there’s no evidence, huwag niyong paniwalaan yung nakikita niyo because in this incident, there’s absolutely no truth to it at all.”

Si Moira ang iniisyung dahilan umano ng hiwalayan nina Sam at Catriona.

Bukas noon sina Sam at Moira sa pagsasabing malapit silang magkaibigan, bukod sa nasa ilalim sila ng parehong talent management, ang Cornerstone Entertainment.

Pero mariing itinanggi ni Sam na may romantiko silang ugnayan ni Moira.

Paliwanag ni Sam: “Sobrang close kami before [ni Moira], and I guess people wanted to connect our closeness to may nangyari sa amin.”

Sundot na tanong ni MJ: “Magkaibigan pa rin ba kayo ngayon ni Moira?”

Malamang sagot ni Sam: “We are not friends anymore.”

Sa puntong ito ay tumanggi na ang aktor na idetalye pa kung anong nangyari sa pagkakaibigan nila ni Moira.

Sabi lang ni Sam, “It’s an issue that’s really sensitive.”

MOIRA AS RUMORED THIRD PARTY

Nag-ugat ang isyung pag-uugnay kina Moira at Sam nang i-unfollow ni Sam si Moira noong huling bahagi ng January 2025.

Bukod kay Sam, in-unfollow rin umano nina Yeng Constantino, Erik Santos, TJ Monterde, at ilan pang music artists ang Instagram account ni Moira.

Nangyari ito isang buwan mula nang iulat ni Ogie Diaz sa kanyang vlog na binitawan na umano ng Cornerstone Entertainment si Moira bilang artist.

Sinasabing may “attitude problem” umano si Moira.

Pagdating ng February 4, ang pagkikita naman nina Catriona at Moira ang pinag-usapan online.

Ito’y matapos isnabin umano ni Catriona si Moira nang pareho silang dumalo sa Urban Smiles Congress 2025, kunsaan pareho silang brand ambassador.

Sa mga video online na kuha sa nasabing event, makikita ang pagpanhik sa entablado ni Catriona nang ipakilala siyang bagong ambassador ng isang dental clinic.

Bumeso si Catriona sa executives ng brand na katabi ni Moira.

Kapansin-pansing nilampasan, hindi bineso, at hindi binati ni Catriona si Moira.

Makikitang dumiretso si Catriona kina Maricel Soriano at Pinoy Big Brother (PBB) Gen 11 housemate Kai Montinola na kanyang nginitian at binati.

Katabi rin ni Moira sina Maricel at Kai.

Dahil sa video na ito, samu’t saring espekulasyon ang naglutangan na may gusot sa pagitan nina Catriona at Moira.

Moira-Sam friendship

Sa kabilang banda, hindi kaila sa publiko ang dati’y malalim na pagkakaibigan nina Sam at Catriona.

Noong March 2021, sa vlog sa YouTube ni Toni Gonzaga, ikinuwento ni Moira na tumira siya sa condo unit ni Sam noong newbie pa lang ang “Malaya” singer.

Noong panahong iyon ay sa U.S. pa nakabase ang nakatatandang kapatid ni Sam na si Ada.

Hiwalay naman ang mga magulang ni Moira—ang ina niya ay naninirahan sa Olongapo, habang ang kanyang ama ay nasa Las Vegas, Nevada.

Bilang magkapatid na ang turingan nila, ayaw raw ni Sam na mapag-isa si Moira na dumadanas noon ng matinding depression.

Kuwento noon ni Moira: “Si Kuya Sam, he’s really protective since wala akong family sa Manila, tapos wala yung family niya sa Manila at that time.

“Kami yung naging family.”

Sabi pa noon ni Moira: “Ako yung wing man niya sa lahat ng mga naging ex niya.”

Maging noong nahiwalay si Moira sa estranged husband niyang si Jason Hernandez noong March 21, 2022, ay nanatili si Sam sa tabi ng kanyang malapit na kaibigan.