Muling hinirang ang It’s Showtime host na si Vice Ganda bilang isa sa Top Taxpayers ng Quezon City para sa taong 2024.

Iginawad ng Bureau of Internal Revenue (BIR) kay Vice ang parangal sa isang mall sa Quezon City, kahapon, March 4, 2025.

Vice Ganda during the Top Taxpayers in Quezon City 2024 awarding ceremony

Sa kanyang talumpati, sinabi ni Vice na tila pagpapatunay itong may nagawa siyang tama sa lipunan.

Saad niya: “Maraming-maraming salamat po dito sa pagkilalang ito.

“Nakakatawa, nakakataba ng puso, nakakakilig pag narinig mo top taxpayer ka.

“Parang pag sinabing top taxpayer ka, parang may nagawa kang tama para sa bansang ito at mayroon kang naiambag sa bansang ito

“Parang pag top taxpayer ka, parang, ‘Ay, ang saya kasi bilang Pilipino, sumunod ako sa batas. May nagawa akong tama para sa lipunan natin.’”

VICE GANDA ON TAXPAYERS’ RIGHT TO ASK WHERE THEIR TAXES GO

Ayon pa kay Vice, obligasyon ng bawat isa sa atin ang magbayad ng buwis.

Kaalinsabay ng obligasyon ng mga mamamayang magbayad ng buwis, obligasyon din ng mga nasa pamahalaan na sagutin ang tanong kung saan napupunta ang ibinabayad na buwis ng taxpayers na kagaya niya.

Aniya: “Magbayad po tayo ng buwis, obligado tayong magbayad ng buwis at dapat natin gawin yun.

“At pagkatapos natin magbayad ng buwis, karapatan din nating obligahin ang mga hahawak ng mga buwis na ibinabayad natin, tama?

“Kung inoobliga nila tayo, dapat talaga tayong tumupad kasi obligasyon iyan.

“Pag obligasyon, pag sinabing obligasyon, wala kang magagawa, kailangan kong gawin kasi obligasyon ito.

“Hindi ito pribilehiyo, ito ay obligasyon.

“Kaya kung obligasyon nating magbayad, karapatan din natin obligahin ang mga tatanggap at gagamit ng perang ibinabayad natin dahil hindi madali kung paano natin kinita ang ipambabayad natin ng buwis…”

Sabi pa ng It’s Showtime host, halos lahat ng kino-consume natin ay may katumbas na buwis.

“Kung inaakala natin, ‘Hindi naman ako nagbabayad ka ng buwis.’

“Pag gumagamit ka ng shampoo, nagbabayad ka ng buwis. Pag kumakain naman, nagbabayad ka ng buwis, di ba?

“Sa bawat kilos natin, nagbabayad tayo ng buwis. Hindi niyo lang alam na nagbabayad ka ng buwis.”

Paalala niya: “Obligado tayong magbayad ng buwis at dapat natin gawin yon…

“At dahil nagbabayad tayo ng buwis, meron tayong karapatan na tanungin din, ‘Nasaan yung ibinayad nating buwis?’

“Kasi misyon ng BIR, di ba po, gamitin ang mga pera for nation building and to uplift the lives of the Filipino people.

“Tama po ba?” tanong pa ni Vice sa mga opisyales ng BIR Quezon City na kasama niya sa entablado.

Patuloy ng TV host-comedian: “Yun ang misyon. Kaya tayo kinukunan ng buwis kasi yun ang kanilang misyon.

“Kaya pagkatapos nating magbayad ng buwis, tatanungin natin, ‘Nasaan na po yung quality of life? Nasaan na po yung projects?

“‘Nasaan na po yung yung tulay? Bakit po bumagsak ang tulay sa Isabela?’

“Karapatan po natin yon. Tama po ba?” muli niyang tanong sa BIR officials.

Saad naman ni Vice sa mga taong nasa audience: “Karapatan nating kumuwestiyon at magsalita at bumoses dahil pera po natin ang ginamit dun.

“Lahat po tayo obligasyon nating magbayad ng buwis dahil tayo rin naman ang makikinabang diyan.

“At obligasyon din ng BIR na maningil kaya, sa ayaw at gusto natin, kailangan nating magbayad.

“Kasi gagamitin nila yon to uplift the lives of the Filipino people.

“At pagkatapos nating magbayad ng buwis, tayo naman ang magtatanong, ‘Nasaan na po ang ibinayad nating buwis?’”