Life must go on.

Isa itong kasabihan na nangangahulugang tuloy ang buhay sa kabila ng pinagdaanang masaklap na karanasan.

Tulad na lamang ni Andi Eigenmann at partner nitong surfer na si Philmar Alipayo.

Gayundin si Pernilla Sjoo na inakusahang third party umano sa away nina Andi at Philmar noong Pebrero 2025.

Nagkaroon ng hidwaan sina Andi at Philmar matapos patutsadahan ng aktres si Philmar dahil sa pagpapalagay nito ng matching tattoo kasama ang isang female friend.

Hindi nagtagal, pinangalanan at kinilala ang female friend ni Philmar — ang Swedish marine photographer na si Pernilla.

Pinagpiyestahan sa social media ang away nina Andi at Philmar.

Matinding bashing ang inabot nina Philmar at Pernilla dahil sa mga paratang ni Andi na tinangka umanong ahasin ni Pernilla si Philmar.

Nagkabati sina Andi at Philmar makalipas ang isang linggong awayan.

Pero hindi tumigil ang batikos kay Pernilla, na hindi pa nagre-reactivate ng kanyang Instagram account hanggang ngayon.

WHERE IS PERNILLA SJOO NOW?

Batay sa ilang naglabasang social media pictures at posts, nakakabangon na si Pernilla matapos ang isyu.

Bago magtapos ang February, pinabinyagan nina Derek at Ellen ang kanilang anak na si Liana.

Makikita sa group picture na isa si Pernilla sa mga dumalo, at posible ring isa sa mga ninang ng anak nina Derek at Ellen.

Ipinost ni Derek ang picture sa kanyang Instagram Story.

Ni-repost naman ni Ellen sa kanyang Instagram Story ang IG post ng fellow trail runner ni Pernilla, kung saan kasama nila si Atty. Lorna Kapunan sa larawan.

Naging palaisipan pa sa netizens ang inilagay na caption dito ni Ellen: “Kill the mosquito with an atomic bomb [laughing emoji]”

Walang paliwanag si Ellen sa matalinhaga niyang caption.

Mukhang bumalik na rin si Pernilla sa pagsali sa sports activities.

Recently, sunud-sunod ang Instagram posts ng Siargao Runners tungkol sa pagsali ni Pernilla sa isang trail competition sa Mt. Kalatungan sa Bukidnon.

Ayon sa IG account nito, ang Siargao Runners ang kauna-unahang runners club ng Siargao. Si Pernilla ang founder nito.

Sa isang IG post, makahulugan ang caption ng runners club tungkol sa pagiging first runner-up ni Pernilla sa trail competition nitong March 2, 2025.

Ipinost ang photos ni Pernilla nang makarating sa finish line at itinanghal na first runner-up.

Caption dito (published as is): “FROM SETBACKS TO PODIUM!!!!!!

“COMEBACK IS REALLLL!

“Our running club founder, PERNILLA SJOO, conquered Mt. Kalatungan and finished 1st runner-up as her redemption—proving that RESILIENCE and HARD WORK always pay off!”

Kasunod nito ay video ng ilang highlights ng pagsabak ni Pernilla at kanyang fellow runners sa kumpetisyon.

PERNILLA DRAGGED INTO ANDI-PHILMAR BREAKUP ISSUE

Si Pernilla ay long-time friend ni Philmar na nakabase sa Siargao, kunsaan din nakatira sina Philmar at Andi.

Sa mga Instagram post ni Andi noong February, tinawag niyang “snake” ang isang female friend, na matutukoy na si Pernilla.

Pakiramdam daw ng aktres ay tinraydor siya nito.

Inakusahan ni Andi si Pernilla ng pagkakaroon ng interes kay Philmar. At gumawa raw ng move si Pernilla kay Philmar nang mag-away ang surfer at si Andi.

Dahil sa parunggit ni Andi, matinding bashing online ang natanggap nina Philmar at Pernilla. Dahil dito nag-deactivate ng Instagram account si Pernilla.

Makalipas ang isang linggo, nagkabati sina Andi at Philmar.

Tulad ng kanilang pag-aaway, idinaan din ng dalawa sa social media ang anunsiyo tungkol sa kanilang pagbabati.

Si Pernilla naman ay hindi na bumalik sa social media ngunit patuloy pa ring binabatikos.

Ang naging tagapagtanggol niya ay ang kaibigang showbiz couple na sina Derek Ramsay at Ellen Adarna.

DEREK ON DEFENDING PERNILLA AT THE HEIGHT OF ISSUE

Si Derek ay naglabas ng Instagram Story para pasinungalingan ang kumalat na IG screenshot na reaksiyon umano ni Pernilla hinggil sa pagkakadawit nito sa isyu nina Andi at Philmar.

Ipinagtanggol din ni Derek si Pernilla sa interview sa kanya ng entertainment writer at vlogger na si Ogie Diaz.

Tahasang pinuna ni Derek si Philmar dahil hindi raw nito ipinagtanggol si Pernilla, na inulan ng bashing dahil sa away ng surfer at ni Andi.

Parte ng pahayag ni Derek: “I’m not trying to cause a fight between me, my family, Andi, and Philmar. Nandun lang ulit ako sa tama at sa mali.

“And I wish Philmar… excuse me for using this term, would have the balls to be a man. Magpakalalaki ka.

“Ayusin mo ang problema mo sa asawa mo. Unahin mo yan, tama ka diyan.

“Pero huwag mong bastusin yung taong tumulong sa yo, sa lahat ng problema mo. Ipagtanggol mo yung tao,” pagtukoy kay Pernilla.

“Ikaw okay ka na, di ba? Paano si Pern na umiiyak kasi puro paninira?”

Hindi sumagot si Philmar sa naging pahayag sa kanya ni Derek.

Hindi rin pinalampas ni Derek ang batikos ng ilang netizens kay Pernilla.

May IG post si Derek ukol sa kanyang daddy duties, at sa comment section ay nag-iwan ng mga komento ang netizens ukol sa isyung Andi-Philmar-Pernilla.

Isa sa punto ng mga kritiko, lumalabas daw na guilty si Pernilla dahil hindi raw ito sumagot nang mag-reach out sa kanya si Andi.

Sinabi kasi ni Andi sa kanyang post na dinedma siya ni Pernilla nang tanungin siya ng aktres tungkol sa pagpapalagay nila ni Philmar ng matching tattoo.

Parte ng IG Story post ni Andi: “I REACHED OUT TO HER, TO GET ANY BUT OF EXPLANATION FROM HER FOR THINKING THIS IS A GOOD IDEA, AND SHE CHOSE TO COMPLETELY IGNORE ME.”

Pero kinontra ni Derek ang paratang ng netizen na dinedma daw ni Pernilla si Andi.

Pagtatanggol ni Derek (published as is), “”who said di sumagot si pern? I’ve seen the messages”

Sa sagot na ito ni Derek, may posibilidad na ipinakita sa kanya ni Pernilla ang replies nito kay Andi nang i-message siya ng aktres ukol sa pagpapa-tattoo nila ni Philmar.

Sa ngayon, humupa na ang isyu.

Magkasundo na muli sina Andi at Philmar.

Si Pernilla naman ay tuloy sa pamumuhay ng kanyang active lifestyle, tulad ng pagiging trail runner.

Life goes on para kina Andi, Philmar, at Pernilla after the issue.