OPM icon Freddie Aguilar dead at 72

Rest in peace, Ka Freddie.

freddie aguilar death

Legendary singer Freddie Aguilar has passed away at the age of 72 on May 27, 2025.
PHOTO/S: Facebook

Muli na namang nagluluksa ang entertainment industry dahil sa pagpanaw ng legendary OPM (Original Pilipino Music) singer na si Freddie Aguilar.

Pumanaw si Freddie nitong Martes ng madaling-araw, Mayo 27, 2025.

Siya ay 72.

Kinumpirma ng general counsel ng Partido Federal ng Pilipinas (PFP) na si Atty. George Briones ang malungkot na balita sa GMA News.

Si Freddie Aguilar ay dating nagsilbing national executive vice-president ng PFP.

Bago ang kanyang pagpanaw, na-confine si Freddie sa Philippine Heart Center, base sa social media posts ng kanyang asawang si Jovie Albao.

WHO WAS FREDDIE AGUILAR?

Si Freddie ay isinilang sa Santo Tomas, Isabela, noong February 5, 1953.

Siya ay kinikilala bilang isa sa mga haligi ng folk music sa Pilipinas.

Nakilala siya nang husto sa kantang “Anak,” na naging finalist sa kauna-unahang Metropop Song Festival noong 1978.

Ang mga nagwagi sa taong iyon ay: First Prize: “Kay Ganda ng Ating Musika” na kinanta ni Hajji Alejandro at kumpusisyon ng ngayo’y National Artist Ryan Cayabyab. Second Prize: “Pagdating Mo” na kinanta ni Celeste Legaspi at kumpusisyon ni Nonoy Gallardo. Third Prize: “Narito Ako” na kinanta ni Maricris Bermont at kumpusisyon ni Nonong Pedero. Fourth prize: “Ibig Kong Ibigin Ka” na kinanta ni Anthony Castelo at kumpusisyon nina Vic Villafuerte at Rolando Tinio.

Lahat ng sumali sa Metropop ng taong iyon ay sumikat. Ngunit ang isinalin sa iba’t ibang lengguwahe ay “Anak,” na naging malaking hit hindi lamang sa Pilipinas kundi lalo na sa Japan.

Ang iba pang sikat na kanta ni Freddie ay ang patriotic song na “Bayan Ko”; “Bulag, Pipi at Bingi”; “Magdalena”; at “Ipaglalaban Ko.”

Sumabak din si Freddie sa pulitika. Tumakbo siya bilang senador noong 2019 elections, ngunit nabigong mahalal.

FREDDIE AGUILAR’S MARITAL RECORD

Tatlong beses ikinasal si Freddie.

Si Josephine Quiepo ang una niyang pinakasalan noong 1973. May anim silang anak, kabilang ang magaling na singer na si Maegan Aguilar. Nauwi ang pagsasama nila sa hiwalayan.

Ang pangalawang asawa niya ay si Antonette Martinez. Nauwi rin sa hiwalayan ang kanilang pagsasama.

Noong November 22, 2013, ikinasal si Freddie sa kasalukuyan niyang asawa na si Jovie Albao sa isang Muslim wedding ceremony sa Buluan, Maguindanao.

Naging kontrobersiyal ang pag-iisang dibdib nila dahil 16-anyos lamang noon si Jovie, habang si Freddie ay 60-anyos.

Ilang araw bago nito ay nagpa-convert sa relihiyong Muslim ang legendary singer.