Piolo Pascual reveals getting rejected by Toni Gonzaga in the past.

Nananatiling single ang itinuturing na isa sa pinakaguwapong aktor sa Pilipinas, si Piolo Pascual, sa edad na 47.

Pagbabahagi ni Piolo, labintatlong taon na siyang single. At sa loob ng mahabang panahon na ito ay nae-enjoy niya raw ang mag-isa.

Ito ang isiniwalat ng aktor nang makapanayam siya ni Toni Gonzaga sa vlog nito sa YouTube nitong Linggo, January 5, 2025.

Nagsimulang ibahagi ni Piolo ang relationship status nang matanong siya ni Toni kung paano nito hina-handle ang mga isyu pagdating sa kanyang lovelife.

Gayong hindi naman daw maikakaila na maging si Piolo ay hindi nakakaligtas na maisyu sa mga nakakatrabaho niyang babaeng artista.

Habang sumasagot ay natatawa si Piolo dahil ni isa man daw sa mga iniisyu sa kanya ay hindi totoo.

Aniya, “Wala naman e. May lovelife ba ako? Ang tagal na rin, e, hindi ko na alam yung lovelife.

“Napaisip ako doon, ah!”

PIOLO PASCUAL EXPLAINS WHY HE CHOOSES TO BE SINGLE

Paliwanag ni Piolo, sa mahabang panahon na pagiging single ay hindi siya naghanap ng girlfriend dahil nae-enjoy naman daw niyang mag-isa na walang ibang iniisip.

Dumating na rin daw sa puntong nasanay na siyang walang karelasyon, kaya ngayon ay prayoridad na lang niya ang trabaho at pamilya.

Saad ni Piolo, “[Naalala ko] sinabi sa akin ni Pastor Julius, the more you stay single, the more you’re gonna enjoy it, the more you’re not going to look for it.

“For thirteen years [single ako]. Lovelife ko talaga yung trabaho ko e.”

Sundot na tanong ni Toni sa kanya, “Ayaw mo na ng full-on commitment?”

Sagot ng aktor: “Not for now. I mean, you know, I’m at a point in my life… busy pa ako sa career ko.

“Totoo kasi, you know, I love being single. I don’t see the point of being with someone, especially now, because I’m so busy with work.

“I’m always with friends. I’m always with my family.

“And it’s not something that, you know, I look for because nasanay na, e.”

PIOLO ON QUALITIES HE LOOKS FOR IN NEXT GIRLFRIEND

Ganunpaman, hindi naman daw ibig sabihin na isinasara na ni Piolo ang kanyang puso sa posibilidad na makahanap ng babaeng habambuhay niyang mamahalin.

Anu-ano ba ang qualities na hinahanap niya sa isang babae?

Pagbubunyag ni Piolo, “Christian muna. Dapat Kristiyano ka.

“[Dapat] family-oriented. Tapos siyempre dapat mabait, hindi yung full of herself, hindi rin yung me, myself and I.”

Pagdating naman daw sa physical, may hirit si Piolo na mas naa-attract siya sa mga kagaya ni Toni.

Dito na rin nabuking na noon pala ay niligawan niya ang TV host-actress, ngunit sa kasamaang palad ay binasted siya nito.

Toni Gonzaga (right) and Piolo Pascual (left) 
Photo/s: Screengrab Toni Gonzaga Studio on YouTube

PIOLO’S RUMORED ROMANCE WITH SHAINA MAGDAYAO

Samantala, ang aktres na si Shaina Magdayao ang huling na-link kay Piolo.

Ito’y matapos nilang maispatang magkasama sa isang bakasyon sa Bohol noon pang October 2021.

Sa kanilang viral photo noon, kitang-kita ang public display of affection nina Piolo at Shaina — gaya ng yakapan, holding hands, at nakahiga pa sila sa isa’t isa.

Sa mga kuhang larawan ay makikitang kasama rin nila ang real-life couple na sina Jodi Sta. Maria at Raymart Santiago.

“I think things got a little out of hand because of some photos that went around,” sabi ni Piolo tungkol sa mga kumalat na larawan nila ni Shaina.

Ayaw na rin daw niyang pahabain ang tungkol sa tanong kung ano ang real score sa kanila ng aktres.

Wala rin daw bago at gusto na lang niyang hayaang mamatay ang isyu.

Sabi ni Piolo, “It’s just the same. I guess, it’s better not to talk about it.

“Let it just die down because it’s been how many years, and we always say the same thing.

“I guess, for now, wala… yun na iyon. What you see is what you get, as simple as that.”

Bago ito, matagal nang palaisipan kung ano talaga ang real score nina Piolo at Shaina sa nakalipas na mga taon.

Gayunpaman, hindi makapagbigay ng tiyak na sagot ang dalawa dahil hindi pareho ang kanilang mga pahayag na wala silang espesyal na relasyon.

February 13, 2017, sinabi ni Piolo sa PEP interview na exclusively dating sila ni Shaina.

Sa hiwalay na interview naman kay Shaina noong February 15, 2017, kinumpirma niyang “very present” sa buhay niya si Piolo at nagkikita sila nang madalas.

Pero nilinaw ng aktres na walang commitment sa pagitan nila ng aktor.

Hanggang sa ngayon ay hindi pa rin mamatay-matay ang pagkakalink sa dalawa, gayong si Shaina ay kagaya rin ni Piolo na single.