Tila hindi pa rin humuhupa ang sama ng loob ni Dennis Padilla sa “pambubudol” sa kanya sa ginanap na kasal ng anak niyang si Claudia Barretto sa longtime boyfriend nitong si Basti Lorenzo.

Martes ng gabi, April 8, 2025, habang nagkakasiyahan sa wedding reception nina Claudia at Basti, naglabas ng hinanakit si Dennis sa social media dahil sa pakiramdam niya’y pambabalewala sa kanya bilang “father of the bride.”

Ngunit makalipas lamang ang ilang oras ay binura rin ni Dennis ang post niyang ito, na mabilis na-pickup na ng media at netizens.

Bukod sa kanyang “budol” post, binura na rin ni Dennis ang larawan ng muling pagkikita nila ng kanyang tatlong anak kay Marjorie Barretto na sina Julia, Claudia, at Leon Barretto.

In-upload ni Dennis ang reconciliation photo nilang mag-aama sa Instagram noong Linggo, April 6, 2025.

Kasama rin nila sa larawan ang ina ni Dennis at lola nina Julia, Claudia, at Leon na si Catalina Baldivia.

Maiksing mensahe ni Dennis sa caption: “Miss you mga anak”

Hindi binanggit sa post kung kailan kuha ang larawan ng mag-aama.

Dennis Padilla with children (L to R) Leon, Claudia, and Julia, with Dennis’s mother, Catalina Baldivia.

DENNIS PADILLA HURT AFTER BEING TREATED AS “VISITOR” AT CLAUDIA’S WEDDING

Mabilis na nag-viral ang post ni Dennis sa Instagram matapos niyang dumalo sa kasal ni Claudia.

Sa burado nang post, naglabas siya ng hinaing dahil sa naging pagtrato umano sa kanya sa kasal ni Julia kay Basti.

Himutok ni Dennis: “GRABE KAYO!! NABUDOL NYO AKO! FATHER OF THE BRIDE NAGING VISITOR. GALING NYO!”

Dalawang beses itong ipinost ni Dennis.

Sa una, naka-superimpose ang mga salitang “Sagad Sa Buto…”

Sa ikalawang post niya ay nilagyan niya naman ito ng “Budol…”

Makahulugang caption ni Dennis sa parehong posts: “FINISH [broken heart emoji]”

Makalipas ang ilang sandali, parehong binura ni Dennis ang nasabing post sa di pa malamang dahilan.

Hanggang ngayon ay wala pang reaksiyon si Claudia sa naging post ng kanyang ama.