Matagal nang umiikot ang pangalan ng pamilya ni Nora Aunor sa mga kontrobersiya, lalo na pagdating sa mga hidwaan sa loob ng kanilang tahanan.

Hindi na rin lingid sa kaalaman ng publiko ang tila “love-hate relationship” ng Superstar sa kanyang mga anak na sina Lotlot, Ian, Matet, Kiko, at Kenneth.

Isa sa mga pinakamatunog na isyu ay ang tampuhan noon ni Matet kay Nora matapos umanong makipagkompetensiya ang aktres sa negosyo niyang gourmet tuyo. Ayon kay Matet, labis siyang nasaktan nang malaman niya mula sa ibang tao na tila tinatraydor siya ng ina na itinuturing niyang mahal na mahal niya.

Aniya, tila pinaramdam daw sa kanya ni Nora Aunor na ampon lamang siya, lalo na’t hindi man lang siya kinausap bago magsimula ng parehong negosyo ang aktres.

Nadagdagan pa ang tensyon nang magsalita si Ian at pinayuhan si Matet na huwag na lang palakihin ang isyu. Hinimok pa siya ng kapatid na maging reseller na lang ng produkto ng kanilang ina upang maiwasan ang kumpetisyon.

Sa kabilang banda, naging kapansin-pansin din ang tila paglayo ni Lotlot kay Nora. Hindi siya nakikitang present sa ilang mga family events, dahilan para umani ng batikos mula sa ilan na nagsasabing tila walang utang na loob si Lotlot sa kanyang adoptive mother.

Ngunit sa kabila ng lahat ng mga hindi pagkakaunawaan, isang nakakagulat at emosyonal na tagpo ang naganap sa advance 70th birthday celebration ni Nora Aunor.

Ginanap ito sa Seda Vertis North sa Quezon City, at laking tuwa ng Superstar nang makita niyang kumpleto ang lahat ng kanyang anak. Nandoon din ang kani-kanilang pamilya, na lalo pang nagpasaya kay Ate Guy.

Unang dumating sa venue si Matet De Leon at hindi na ito umalis sa tabi ng kanyang ina. Marami ang nakapansin na tila nalimutan na niya ang mga alitan ng nakaraan, at mas pinili ang pagmamahal para sa kanilang ina.

Kapansin-pansin din ang pagiging masaya ng magkakapatid habang magkakasama sa mga larawan kasama si Nora Aunor.

Ang huling pagkakataon na nakita silang magkakasama nang buo ay noong naospital si Ate Guy.

Sa naturang selebrasyon, ipinakita rin nila ang isang video presentation na naglalaman ng kanilang mga larawan mula pagkabata hanggang sa kasalukuyan, kung saan makikitang isa-isa na silang may sariling pamilya.

Isa sa mga pinakatumatak ay ang mensahe ni Ian:
“Mommy, happy, happy birthday po. Mahal na mahal ka namin! Sobra, sobra, kahit anong mangyari sa mundo. Kahit maging square ang mundo, nandito pa rin kami para sa inyo ma.”

Tunay ngang emosyonal at makabuluhan ang okasyong ito para kay Nora Aunor. Sa mga larawang kumalat sa social media, kitang-kita ang tuwa at pasasalamat niya sa pagkakabuo ng kanilang pamilya—even just for a special day.