Inalala ni Ivana Alawi na minsan na siyang naging “sugar mommy” sa dating karelasyon.

Ito ang ibinahagi niya sa panayam sa kanya ni Boy Abunda sa Fast Talk with Boy Abunda, noong Miyerkules, Abril 9, 2025.

Ipinagtapat ni Ivana na naranasan nito noon na magbigay ng mga regalo at pera sa mga lalake, pero hindi na siya nagbanggit ng pangalan.

“Hindi ko nilalahat ang lahat ng artista. Alam ko maraming mabait diyan, alam kong maraming iba.

“Pero opo, proud sugar mama. Baklang-bakla ‘to. Yes!” ang pag-amin ni Ivana tungkol sa nangyari sa kanya noon.

Kaya nasabi ni Ivana na “sugar mama” ang dating niya dahil todo gastos daw siya sa lalaking di pinangalanan.

Lahad pa ni Ivana: “Hindi ko naging dyowa. Yun nga, e, masama. Pero okay naman ako kasi mapagbigay talaga ako. Mapag-regalo ako.

“Yung relo kasi hindi ko na iniregalo. Kasi parang, ‘Sobra ka naman. Kapatid ko muna ang unahin ko bigyan ng relo bago ikaw.’”

Nang tanungin tungkol sa mga naibigay niya, “Mga branded, ganyan…

“Pero yung dati naman, yung ex-ex na parang landian and all, more on pagkain, gas, ganyan, pera, pang-allowance.

“O, di mo kaya, allowance!”

Hindi raw guwapo ang aniya’y nakalandian niyang iyon.

“Akala ko kasi mapuputulan siya ng kuryente.Akala ko may mangyayari sa kanya kapag hindi ko nabigyan ng allowance,” sabay paliwanag ni Ivana.

Dugtong niya: “Hindi naman monthly, ha? Minsan-minsan lang, mga every three months. O, di ubos ang pera ko.

“Yung isa kasi hindi artista.”

IVANA ALAWI ON DATING MYSTERY ACTOR

May detalyeng ikinuwento si Ivana tungkol sa idine-date niyang artistang humihirit ng relo.

“Ito po artista, yung nanghihingi ng parang watch, tapos mga regalo.

“Hindi naman yung parang ‘Ang ganda ng watch na ’to, no?’ ‘Titingin-tingin ka pa sa akin. Akala mo bibigyan kita?’

“Tapos yung mga ‘Sa iyo ba ito galing? Itong branded na paper bag?’ Sabi ko, ‘Hindi! Hindi ako bibili ng branded na paper bag. Hindi pa nga tayo, bibilhan kita?’

“Tapos mga hotel, lahat ako ang nagbabayad, ganyan. Minsan naman, dinner ako rin. Ano ito, pati wine namin. Lahat ako,” himutok ni Ivana.

Hanggang sa nawalan daw siya ng gana sa mystery actor na kanyang tinutukoy.

“Yung pinakamasama ang loob ko, hotdog na nga lang. Mahilig ako sa hotdog na sandwich, ha?

“Tapos siyempre, kaya kong ubusin yung isa kasi gutom ako. Hinatian pa ako kasi daw kulang yung budget.

“‘Bakeet?! Pero hotdog, hotdog ko ito!’ Yun po, masama talaga ang loob ko, yung hotdog ko po hinatian.”

Naghiwalay sila dahil sa hotdog?

Sagot ni Ivana, “Hindi naman po kami. Hindi kami. Hindi kami naging kami.

“Bayad ko naman iyon, tapos hindi siya um-order, tapos humati sa akin.”

IVANA ALAWI on setting boundaries

Nahinto ang kanyang kahibangan dahil sa kanyang mga napagtanto.

“Na-realize ko maganda naman ako. Hindi naman ako chaka. At saka na-realize ko, bagets naman ako. Hindi naman ako matanda. Bakit mo pineperahan?” diin ni Ivana.

Naniniwala raw si Ivana na hindi tamang perahan ang kahit sinong karelasyon.

“Pero dapat hindi mo rin peperahan ang matatanda at ang mga bagets, ha? I am matanda…whatever.

“Dapat in general, huwag ka nang mamera! Nasa relasyon ka, e. Nasa relasyon ka para sa pag-ibig, hindi para sa pera!”

Hindi raw nasabi ni Ivana ang saloobin niya sa mystery actor.

“E, di panoorin na lang niya. O, eto, para sa iyo iyan,” saad ni Ivana.

Paano siya nakakalas sa naka-date niyang aktor?

“Pinaiyak ko muna siya. Binawian ko yung hotdog ko, why not? Nilaro-laro ko na lang kasi alam ko kasi na hindi magwo-work, e,” pagtatapos ni Ivana.