Mixed emotions si Ai-Ai dela Alas sa mga balitang nakararating sa kanya tungkol sa pagtataksil ng estranged husband niyang si Gerald Sibayan.

“Masakit nang kaunti pero masaya ako dahil valid pala ang lahat ng mga nararamdaman ko tungkol kay Gerald, hindi tamang hinala lang.

“Hindi ako nagha-hallucinate,” pahayag ni Ai-Ai delas Alas sa eksklusibong panayam ng Cabinet Files ngayong Miyerkules, Enero 22, 2025.

Ilang Pilipino sa Amerika ang nagpapaabot kay Ai-Ai ng mga kuwento tungkol sa “sighting” nila kay Gerald.

Ayon sa impormasyong nakarating kay Ai-Ai, kasama raw ni Gerald ang isang babae at magkahawak-kamay sila sa magkahiwalay na petsa at lugar na nangyari noong Marso 2024 at Hunyo 2024, sa San Francisco, California.

Sinabi ni Ai-Ai na imbes na masaktan, nagpasalamat siya sa mga taong naghatid sa kanya ng mga balita.

Nakatutulong daw ito para mas mabilis ang “pag-move on” niya mula sa isang malungkot na karanasan.

ON SPECIFIC INCIDENTS WHERE AI-AI CAUGHT GERALD

Inilahad din ni Ai-Ai s Cabinet Files ang mga insidente kung saan nagduda siyang may ibang babae ang asawa.

Saad ni Ai-Ai: “Wala pala talaga akong dapat panghinayangan dahil napagtagpi-tagpi ko ang mga insidenteng nagpapatunay na may babae siya.

“Dalawang beses niya akong tinawag na ‘Bhe,’ e, ‘Darl’ ang tawagan namin.

“Minsan, tinawag niya ako sa ibang pangalan. Hindi ko lang matandaan ang pangalan.

“Pero ipinagpilitan niya sa akin na ‘Darl’ ang narinig ko, hindi ibang pangalan.”

Lahad pa ni Ai-Ai, “Nagigising ako sa umaga, 7 A.M., naririnig ko na nagsasalita siya ng Ingles at may kausap.

“Nang tanungin ko siya kung sino ang kausap niya, wala raw. Nanonood daw siya ng TV, baka yun daw ang naririnig ko.

“May pagkakataon ding nagsasalita siya sa sarili, paulit-ulit na sinasabi niya na ‘Magiging citizen ako.’

“Nagtataka ako noon pero hindi ko masyadong pinapansin. Pero nang hiwalayan niya ako, saka ko napagdugtung-dugtong ang mga insidente.

“Tama pala ang pakiramdam at ang nararamdaman ko sa kanya, hindi tamang hinala.

“Pumasok din sa isip ko na talagang nagplano siya para makarating sa Amerika.”

Ang tinutukoy ni Ai-Ai ay ang petisyon ni Gerald para magkaroon ito ng green card at maging legal ang paninirahan nito sa Amerika.

Magaan na raw ngayon ang kalooban ni Ai-Ai dahil kusa nang dumarating sa kanya ang mga impormasyon kaya hindi na niya kailangang mag-imbestiga para malaman ang tunay na dahilan ng desisyon ni Gerald na wakasan ang kanilang relasyon.

Bukas ang PEP.ph (Philippine Entertainment Portal) sa panig ni Gerald tungkol sa mga pahayag ni Ai-Ai.