Charlie and Esnyr address Fyang’s “best PBB batch” comment.
Charlie Fleming (left) on being compared to Fyang Smith (right): “Nagugulat po talaga ako, natatakot po talaga ako, because I really don’t want to be compared to other artists, especially po in a derogatory way.”
PHOTO/S: Charlie Fleming/Fyang Smith on Instagram
Napatili ang Kapuso teen actress na si Charlie Fleming nang mabanggit ang pangalan ng Kapamilya artist na si Fyang Smith na madalas ikinukumpara sa kanya.
Sina Charlie at Fyang ay dating housemates sa reality show na Pinoy Big Brother (PBB) sa magkaibang edisyon.
Si Fyang ay Big Winner sa PBB Gen 11 noong 2024.
Si Charlie naman ay Third Big Placer, kasama ang ka-duo na si Esnyr Ranollo, sa katatapos lamang na PBB: Celebrity Collab Edition.
Sa pagbisita nina Charlie at Esnyr sa Fast Talk With Boy Abunda noong Huwebes, July 17, 2025, tinanong si Charlie tungkol sa pagkukumpara sa kanila ni Fyang.
Charlie Fleming (left) and her PBB: Celebrity Collab Edition duo Esnyr Ranollo (right).
Photo/s: Screengrab GMA Network on YouTube
Pareho kasing teenagers sina Charlie at Fyang nang pumasok sa PBB. Eighteen years old noon si Fyang, at 16 naman si Charlie.
Bagamat dalawang taon ang agwat ng kanilang mga edad, hindi maalis na pagkumparahin sila batay sa kanilang ugali at personalidad.
Maraming netizens ang nagsasabing mas mature gumalaw, malawak umintindi, at may wisdom si Charlie kumpara kay Fyang.
Pagtatapat ni Charlie, matagal na niyang alam at nababasa online ang pagkukumpara sa kanya kay Fyang.
Hangga’t maaari ay ayaw niyang maikumpara sa iba, pero wala raw siyang magagawa sa sinasabi ng iba.
Saad ni Charlie: “Actually po, nagugulat po talaga ako, natatakot po talaga ako because I really don’t want to be compared to other artists, especially po in a derogatory way.
“Yung pag wisdom and being mature [na sinasabi nila], it comes from experience–– it comes from understanding.
“Hindi po talaga siya sinasadya.
“I’ve totally no control and I haven’t spoken up about it because it’s definitely not something that I want to put myself in din.”
Bagamat hindi sila personal na magkakilala ni Fyang, minsan na raw silang nagkita at nagkabatian.
Pagbabalik-tanaw ni Charlie, “We’ve met once only. I’ve said ‘Hello,’ and I’ve introduced myself.
“But we don’t actually follow each other [on social media].”
Charlie shares that she has only met Fyang in passing and has not been in contact with her since.
Photo/s: Screengrab GMA Network on YouTube
Sundot na tanong ni Boy, “You’re not acquaintances? You’re not friends yet?”
Mabilis na sagot ni Charlie, “Hindi rin po, not yet.”
THE BATTLE OF PBB BEST BATCH
Sa panayam kina Charlie at Esnyr sa Fast Talk With Boy Abunda ay nahingan din sila ng reaksiyon tungkol sa viral na pahayag ni Fyang tungkol sa kanilang PBB batch.
Pabirong sinabi ni Fyang na kahit ilang edisyon pa ng PBB ang dumaan ay wala raw makakatalo sa batch nila.
Pahayag niya: “Alam mo, kahit ilang batch pa yan, walang makakatalo sa batch namin. Hello, Gen 11. Breaking, highest [concurrent views], hello?
“Hindi, joke lang. Kaya walang makakatalo sa batch namin kasi lahat kami very genuine, very authentic.
“Akala nga namin walang nanonood, kaya lahat kami ganun mga ugali namin, di ba, pagpasensiyahan niyo na.
“Well, para sa amin lang yun na walang [makakatalo], siyempre batch namin yun, e.”
Komento rito ni Esnyr, naniniwala siyang walang best at kulelet na batch sa lahat ng edisyong nagdaan sa PBB.
Kada batch daw na pumapasok sa PBB ay may kanya-kanyang galing at kuwento na minamahal at tinatangkilik ng manonood.
Saad ng content creator: “Hindi naman po ito competition. Pero feeling ko, Tito Boy, yung iba’t ibang season, may iba’t ibang taste.
“Yung sa amin po, we can say na unique din po talaga yung season namin at tinangkilik po talaga naman ng mga tao.”
Pagsang-ayon naman ni Charlie, “Our seasons are different. This is the first GMA and ABS-CBN collab. So it’s completely different from what batch they have.”
Dagdag pa ni Esynr, “Iba-iba kami ng amats. At I love their season too.”
