Studio ng mga programa ni Willie Revillame sa TV5, under construction pa.

TV Chairman Manny V. Pangilinan (center) with Eat Bulaga! hosts (from left) Tito Sotto, Vic Sotto, and Joey de Leon and Wowowin host Willie Revillame in a rare photo op taken in 2024.

Lumutang ang balitang magiging ka-back-to-back program umano ng Eat Bulaga! ng Tito, Vic & Joey ang Wowowin ni Willie Revillame sa TV5.

Pansamantalang inihinto ang game show ni Willie noong Abril 25, 2025, habang nangangampanya siya para sa kanyang senatorial bid para sa Mayo 12, 2025 elections.

Wil To Win ang pamagat ng programa ni Willie sa Kapatid Network, pero Wowowin na ang gagamiting titulo ng game show kapag ibinalik ito bago matapos ang 2025.

Iginiit ng isang production insider sa Cabinet Files na napakaaga pa para palutangin ang balita tungkol sa back-to-back program ng Eat Bulaga! at ng Wowowin dahil ginagawa pa lamang ang W Studio na pagtatanghalan ng mga TV show ni Willie.

“Mga” dahil dalawa agad ang programa ni Willie na mapapanood sa TV5 — ang Wowowin at Wilyonaryo.

Sinabi ng production insider na puro haka-haka pa lamang ang mga balitang lumalabas kaya makabubuting hintayin ang opisyal na pahayag ng pamunuan ng TV5 para maiwasan ang pagkalat ng fake news.

WILLIE REVILLAME’S RETURN TO TELEVISION

Kung meron umanong sigurado, ito ay ang pagbabalik ni Willie sa telebisyon bago sumapit ang Pasko dahil sa kagustuhan niya umanong mabigyan ng maagang pamasko ang lahat ng mga tagasuporta at naghihintay sa pagpapabalik ng kanyang game show.

Inaasahang matatapos ang konstruksiyon ng gusali sa TV5 compound na magiging studio ng mga programa ni Willie sa Oktubre 2025.

Sina TV5 Chairman Manny V. Pangilinan, former Galing sa Puso Party-list Representative GP Padiernos, at Willie ang magkakasosyo sa gusali na kanilang ipinatatayo.