Photo by: esnyrrr IG
Alamin ang buong komento ni Esnyr tungkol sa reaksyon ng fans sa kaniya at ng PBB boys.
Hindi maitatangging marami talagang iconic moments ang content creator na si Esnyr sa Pinoy Big Brother Celebrity Collab Edition.
Isa sa mga kinaaliwan ng mga manonood ay ang kaniyang bonding moments kasama ang mga guwapong PBB boys. Mula sa kulitan hanggang sa heartwarming moments, madalas napapa-“sana all” na lang ang fans tuwing napapanood si Esnyr kasama ang boys sa Bahay ni Kuya.
Gayunpaman, may ilang netizens na tila nakakahalata ng “something” sa closeness ni Esnyr sa boys–na para bang masyado raw niyang na-e-enjoy ang kanilang bonding moments.
Sa isang panayam kasama si Ogie Diaz, diretsahang nilinaw ni Esnyr ang mga komento tungkol sa kaniyang closeness sa boy housemates.
Inamin niya na minsan ay natakot siya sa reaksyon ng ibang fans sa tuwing magkakasama sila. Pero malinaw niyang sinabi na hindi ang pagiging malapit sa mga guwapong housemates ang naging dahilan ng pagsali niya sa PBB.
“Pumasok po talaga ako para ilaban ko po talaga ‘yung pamilya ko. Ilaban ko ‘yung istorya ko. Gusto ko po na maipakilala sa kanila ‘yung tunay na Esnyr,” aniya.
“Kaya ayun po, siguro blessed. Happy po ako na meron pa po akong mas nakuhang more meaningful at more valuable po, more than their pretty face. Kumbaga ‘yung tunay na friendship po na somehow I feel loved and I feel welcomed po lalo na sa boys bedroom. Tini-treat po talaga nila ako kasi na prinsesa-prinsesa du’n.”
Para kay Esnyr, isa talagang blessing ang pagkakaibigang nabuo nila sa loob ng bahay. Bilang miyembro ng LGBTQIA+ community, ang ganitong klase ng pagtanggap at respeto ay isang pangarap na natupad para sa kaniya.
“Sana one day meron din kaming mga boy best friend ganyan. At ‘yun po ‘yung nakuha ko po du’n na ite-treasure ko po talaga ‘yung friendship po namin at how they also give respect to me po as much as I give respect to the boys po.”
Malinaw rin ang mensahe ng PBB star na buong respeto ang ibinibigay niya sa kaniyang mga kaibigan, on-cam man o off-cam. Nilinaw rin niyang wala siyang na-develop na romantic feelings sa sinuman sa kanila.
“Ayokong ma-stereotype sa ganyan. Kasi it’s basic human decency to respect them din po. To respect begets respect. So narirespeto ko po sila du’n sa loob. Hindi ko sila binabastos. Hindi ko sila ino-objectify in a way. Kaya siguro sobrang comfy lang po talaga namin.”
Ngayon at nasa outside world, patuloy pinahahalagahan ni Esnyr at ng iba pang housemates ang kanilang pagkakaibigan na nabuo sa loob ng PBB house.
Sa ngayon naka-focus ang housemates sa paghahanda sa kanilang upcoming The Big ColLove Fancon na gaganapin ngayong August 10.
