Netizen: “Saludo sa ating mga journalist na nagbabalita…”

ABS-CBN reporter Izzy Lee apologizes for on-air blunder during flood coverage: “Sorry po, wala pang kain at tulog. Next time kakain muna ako para hindi na hanggang binti ang tuhod.”
PHOTO/S: Screengrab ABS-CBN News on YouTube

Humingi ng paumanhin sa publiko ang ABS-CBN reporter na si Izzy Lee nang magkamali siya sa kanyang live report tungkol sa baha.

Nitong Lunes, July 21, 2025, nang mag-viral at pag-usapan online ang video clip ng pagbabalita ni Izzy sa TV Patrol Express habang siya ay nasa kahabaan ng Taft Avenue sa Maynila.

Sa video makikita si Izzy na noo’y nakatayo sa bahang kalsada ng Taft Avenue nang kumustahin siya ng kapwa ABS-CBN reporter na si Jeff Canoy patungkol sa sitwasyon ng lugar.

Noong mga panahong iyon ay nasa ABS-CBN newsroom si Jeff.

Photo/s: Screengrab ABS-CBN News on YouTube

Sa una ay maayos namang naiulat ni Izzy na patuloy ang pabugso-bugsong pag-ulan sa Lungsod ng Maynila na siyang dahilan ng pagbaha sa ilang mga mababang lugar.

Para mapatunayan, minarapat na ni Izzy na ipakita ang bahang kalsada sa kanyang kinatatayuan.

Dito na rin niya nasambit ang linyang “hanggang binti na yung tuhod” habang inilalarawan ang taas ng tubig sa lansangan

Saad niya, “Jeff, kanina pang umaga, pabugso-bugso yung ulan dito sa Maynila kaya nakikita niyo naman ay medyo hanggang binti na yung tuhod dito sa may kahabaan ng Taft Avenue, maging doon sa mga pangunahing kalsada dito sa lungsod.”

Agad na nag-viral ang video clip na ito ni Izzy, kunsaan maraming netizens ang kinaaliwan ito.

Tweet ng isang netizen (published as is), “checking some news coverage tonight mula nung sa hapon tapos unang bungad ng balita eh ‘hanggang binti na ang tuhod…’

“sorry natawa kasi ako. saludo sa ating mga journalist na nagbabalita sa kabila ng masamang panahon. ingat po kayo!”

Hirit pa ng isa (published as is), “#AngOANgUlan hanggang binti na yung tuhod.”

Sabi pa ng isa (published as is), “May bago nang idadagdag sa PH Reporter core HAHAHAHHAHAHAHA ALIW!!!”

Bagamat marami ang napasaya sa live report blooper ni Izzy ay hindi naman nawala ang mga bumatikos sa kanya.

Saad ng isang netizen (published as is), “Sinadya nya yun napangiti pa nga sya e, gusto ata talagang mag-viral.”

“Mali-mali namang mag-report,” dagdag pa ng isa.

Izzy Lee addresses viral on-air blundeR

Dahil sa magkakahalong reaksiyon ng publiko, minarapat na ni Izzy na magsalita para ipaliwanag kung ano ang nangyari sa kanyang viral blooper.

Nitong Martes, July 22, nagpost si Izzy sa X (dating Twitter) para humingi ng paumanhin sa nagawa niyang pagkakamali.

Depensa ng mamamahayag, dahil sa puyat at gutom kaya siya nablangko at namali.

Pahayag niya, “Sorry po, wala pang kain at tulog.

“Next time kakain muna ako para hindi na hanggang binti ang tuhod. Ingat sa baha, mga Kapamilya!”

 

Samantala, sa comments section ng post ni Izzy ay maraming netizens ang pinapurihan siya dahil sa kanyang pagiging totoo at humble na harapin ang kanyang pagkakamali.

Komento ng isang netizen (published as is), “no need to apologize. napasaya mo kami and that line will be iconic. ingat palagi and thank you for your service.”

Sabi ng isa (published as is), “I felt genuinely proud, this wasn’t just a slip of the tongue it was a moment that showed the reality many field reporters face ‘exhaustion, hunger, and harsh conditions’ all while remaining committed to their duty.

“We should be celebrating this kind of dedication, not turning it into a joke.

“Thank you, Ma’am Izzy Lee, for showing up with courage and grace even in the middle of a storm, your work matters and so do you.”

Sentimiyento pa ng isa (published as is), “Minsan talaga kahit gaano ka pa kasanay sa trabaho mo, may mga sandali talagang nadudulas ka o nauutal, lalo na kung live ka on-air…

“Hindi naman porket may ganitong blooper, ibig sabihin wala nang kredibilidad ang reporter.

“Tao lang din sila at may tendency magkamali lalo na kung nasa gitna ng mabilis na pangyayari.”

Hindi ito ang unang beses na mag-viral online si Izzy.

Matatandaan noong April 28, 2022, ay isang live report din ni Izzy ang pinag-usapan nang hagkan siya ng isang palaboy sa kasagsagan ng kanyang pag-uulat.