Kasama sa concert nina Andy Byron at Kristin Cabot, kinilala na rin.

The Kiss Cam moment of (left photo) Astronomer CEO Andy Byron and his employee Kristin Cabot at the Coldplay concert exposed their alleged affair. Right photo shows the reaction of Alyssa Stoddard, also an employee in Astronomer, who is believed to be aware of Byron and Cabot’s relationship.
PHOTO/S: X (Twitter)

Dalawang taon nang naninirahan sa Amerika si Grace Gonzales McMorrow na tubong-Lipa City, Batangas.

Kabilang siya sa mga nanood sa kontrobersiyal na Music of the Spheres World Tour concert ng popular British rockband na Coldplay sa Gillette Stadium, Foxborough, Massachusetts, USA, noong Hulyo 16, 2025.

Personal niyang nasaksihan ang eskandalong kinasasangkutan ng Astronomer CEO na si Andy Byron at ng empleyado nitong si Kristin Cabot, ang Chief People Officer ng nabanggit na kompanya.

Napuno ng manonood ang 60,000-seater stadium sa concert ng Coldplay.

Ayon kay Grace, nag-umpisa ng 8:45 P.M. at natapos ng 11 P.M. ang pagtatanghal ng Coldplay.

“It was indeed a wonderful concert last night. A one of a kind concert and experience,” sabi ni Grace nang makausap siya ng Cabinet Files ngayong Biyernes, Hulyo 18.

KISS CAM THAT EXPOSED AN ALLEGED AFFAIR

Nakipag-ugnayan ang Cabinet Files kay Grace upang ibahagi nito ang kanyang nasaksihan sa pinagpipistahang Kiss Cam moment na nagdulot ng kahihiyan kina Byron at Cabot, na parehong may asawa.

Nakunan ng kamera ang dalawa habang magkayakap. Pero bigla silang nataranta, naghiwalay, at tumalikod nang mapagtanto nilang nakikita sila sa giant screen monitor sa loob ng Gillette Stadium.

The Kiss Cam moment of Astronomer CEO Andy Byron and his employee Kristin Cabot. 
Photo/s: X (Twitter)

Malapit ang puwesto ni Grace sa entablado na pinagtatanghalan ng Coldplay, base sa video na ipinadala niya sa Cabinet Files.

Lahad ni Grace: “Regarding sa Kiss Cam incident na pini-feature sa big screen ang shot ng cameraman sa mga couple then pinagki-kiss sila ni Chris, nag-hide sila.

“Sinabi ni Chris na, ‘Either they’re having an affair or they’re just shy!’

“Nagtawanan kami sa loob ng stadium, hindi kasi nila akalain na ma-caught on cam sila.”

Nalaman ni Grace na malaking eskandalo ang eksena na kanyang nasaksihan at parehong may mga asawa ang mga sangkot sa video nang magising siya kinabukasan, Huwebes, Hulyo 17.

Nakita niyang trending sa Facebook at mainit na pinag-uusapan sa Amerika ang hindi sinasadyang pagbubulgar ni Chris sa pinaghihinalaang bawal na relasyon nina Byron at Cabot.

THE ACCOMPLICE

Nadamay rin sa isyu ang female concertgoer na nakangiti at katabi nina Byron at Cabot nang matutukan ang mga ito ng camera.

Agad na nakilala ang babae na si Alyssa Stoddard, ang senior director of people ng Astronomer.

Kasama si Stoddard nina Byron at Cabot sa panonood ng concert ng Coldplay, at kasali siya sa mga binabatikos dahil sa diumano’y pangungunsinti niya sa bawal na relasyon ng kanyang mga amo.

Alyssa Stoddard 
Photo/s: X (Twitter)

Sa pamamagitan ng LinkedIn profile ni Stoddard, napag-alamang nagsimulang magtrabaho si Stoddard sa Astronomer noong Enero 2025 bilang Sr. Director of People.

Pero noong nakaraang linggo lamang, iprinomote siya ni Cabot bilang Vice President of People ng kompanyang pinaglilingkuran niya.