SB19’s Stell and Pablo out, Zak and Ben&Ben in.
Zack Tabudlo (left) and twins Paolo and Benjamin Guico of Ben&Ben (right) will join Julie Anne San Jose and Billy Crawford as coaches in the seventh season of GMA-7 reality talent competition The Voice Kids.
PHOTO/S: Instagram
Nagsimula na ang taping ng Season 7 ng reality talent competition na The Voice Kids Philippines.
Si Dingdong Dantes pa rin ang host ng reality competition show ng GMA-7 na mapapanood simula sa Setyembre 2025.
Nananatiling mga coach ng The Voice Kids Philippines sina Julie Anne San Jose at Billy Crawford.
Hindi na nila makakasama bilang coach ang SB19 members na sina Stell at Pablo.
Sa halip, ipakikilala bilang mga bagong coach ng programa ang singer-songwriter na si Zack Tabudlo at ang kambal na sina Paolo at Benjamin Guico ng Ben&Ben.
Inaasahang malaki ang maitutulong ng popularidad ni Zack at ng Ben&Ben para lalong madagdagan ang mga susubaybay at tatangkilik sa The Voice Kids ng Kapuso Network.
ZACK TABUDLO WAS PART OF THE VOICE KIDS SEASON 1
May espesyal na puwang sa puso ni Zack ang The Voice Kids dahil sa edad na labindalawa, naging contestant siya ng Season 1 (Mayo 24, 2014-Hulyo 27, 2014) noong napapanood pa ito sa ABS-CBN.
Naranasan din ni Zack na sumali sa Talentadong Pinoy noong sampung taon pa lamang siya.
Ang Talentadong Pinoy ang reality competition show ng TV5.
Sina Lyca Gairanod, Darren Espanto, at Juan Karlos Labajo ang mga kasabayan ni Zack sa Season 1 ng The Voice Kids.
Hindi pinalad si Zack na magwagi pero naging matagumpay naman ang kanyang career bilang mang-aawit at songwriter.
Si Bamboo Mañalac ang coach noon ni Zack sa The Voice Kids.
Makalipas ang labing-isang taon, siya na ang nagsisilbi bilang coach ng mga batang kalahok sa The Voice Kids ng GMA-7, isang patunay na malayo na ang kanyang narating bilang singer-songwriter.