Tila napaamin sa programang Fast Talk with Boy Abunda si BB Gandanghari na nagkaroon umano ng karelasyong aktor.

Pinaalalahan din ni Boy na huwag na lamang pangalanan ni BB ang naturang aktor.

Isa rin sa mga natanong kay BB ay kung “single” ito o “ready to mingle” aniya, “ready to mingle” na siya.

Tila handa na rin umano siya sa “very serious relationship.” Guilty rin ang kanyang naisagot kung may nagpapakilig ba sa kanya ngayon.

Samantala, kasalukuyang nasa bansa si BB na naglaan talaga ng oras upang makapiling muli ang kanyang Mama Eva kahit tila hindi na raw siya nito agad na nakikilala.

Narito ang kabuuan ng talakayan nila ni Boy sa programa nitong Fast Talk with Boy Abunda.

Si BB Gandanghari ay kapatid ni Senator Robin Padilla. Una siyang nakilala sa mundo ng showbiz bilang si Rustom Padilla.

Bago pa man ilantad sa publiko ukol sa kanyang kasarian, matatandaang ikinasal siya noon kay Carmina Villaroel hanggang sa tuluyang na silang magkahiwalay.

Gumulantang sa publiko noon ang pag-amin ni Rustom tungkol sa kanyang kasarian sa loob ng bahay ni Kuya sa unang celebrity edition ng Pinoy Big brother noong 2006.

Sa lahat ng mga housemates, ang naging big winner nila noon na si Keanna Reeves ang kanyang masinsinang nakausap ukol sa kanyang rebelasyon.

Taong 2009 nang lumabas na sa publiko si BB bilang isang transgender woman. Sa ngayon, bumibisita na lamang siya sa bansa gayung sa Amerika na siya naglalagi.

Abala rin ngayon si BB sa kanyang pag-aaral.