Ipinahiwatig ni Ai-Ai delas Alas na ang third party sa hiwalayan nila ng estranged husband na si Gerald Sibayan ay isa ring Pilipina.

Sa kanyang verified Facebook at Instagram account ngayong hapon ng Martes, January 21, 2025, nag-post si Ai-Ai ng isang makahulugang quote tugkol sa “cheater.”

Nakalagay dito, “NO WOMAN COULD LOVE A CHEATER AND NOT PAY THE PRICE OF IT”

Sa caption, binanggit ni Ai-Ai ang mga petsa at lugar sa Amerika kung saan namataan umano ang “cheater” at ang “mistress” nitong “Pilipinas.”

Ayon pa kay Ai-Ai, “puro filipino establishments” sa California ang mga lugar kung saan spotted ang mga hindi niya tinukoy na mga tao.

Sabi ng komedyana sa caption (published as is), “Hahaha ang Balita nga naman kahit akoy nana himik bongga!! Take note si mistress ay PILIPINA

“MARCH 2024 …. Gerrys Grill si mistress naka hilig pa yung ulo sa balikat ni Cheater ( wow sweet )

“JUNE 2024 … malapit sa jollibee ( malapit sa fremont yesss iba din malapit pa bahay namin ahhhh) holding hands si cheater and si mistress ( wow sweet ulit)

“Lalakas ng loob ahhh puro filipino establishments at california IDOL!!! GOAT!( greatest of all time )”

Ang “Fremont” ay isang siyudad sa San Francisco, California.

AI-AI DELAS ALAS ANSWERS NETIZENS’ COMMENTS

Sa Instagram, paisa-isang sinagot ni Ai-Ai ang ilang komento ng netizens.

Wala ring pangalang binanggit ang netizens na nagkomento, ngunit mahihinuhang ang tinutukoy nila ay ang estranged husband ni Ai-Ai na si Gerald Sibayan base sa clues na ibinigay ng mga ito.

Ayon sa isa, dapat daw bawiin na ni Ai-Ai ang green card (GC) ng “cheater” para bumalik na ito sa Pilipinas.

Komento ng netizen, “pabalikin mo ng Pinas at bawiin ang GC tignan ntin kakapit pa ba c mistress kay cheater.. kakapal mglandi sa jumerika kala nmn walang mga Pinoy doon “na din nkakakilala..”

Tugon ni Ai-Ai, “natawa ka sa jumerika haha”

Sabi naman ng isa, “Next post yung screenshots naman, abangers kaming mga suporters mong marites”

Tugon ni Ai-Ai, “cute natawa ako .. abang abang lang tayo hehe”

Komento ng isa, “palakpakan bigyan nga jaket yarn”

Biro ni Ai-Ai, “hahahaha madaming jacket!!!”

Ayon naman sa isa pa, “Tagal k n p Ing niloloko ng mga hayop n yan.”

Sagot ni Ai-Ai, “kaya nga hero.. shook ako”

AI-AI DELAS ALAS-GERALD SIBAYAN BREAKUP

Sa mismong ika-60 kaarawan ni Ai-Ai noong November 11, 2024, kinumpirma ng Comedy Queen ang masalimuot na kinahantungan ng sampung taon nilang relasyon ni Gerald.

Ayon kay Ai-Ai, nakipaghiwalay sa kanya si Gerald via text message habang ito ay nasa Amerika at siya naman ay nasa Pilipinas.

Katuwiran umano ni Gerald, gusto niyang magkaroon ng anak at hindi na siya masaya sa piling ni Ai-Ai.

Mula noon, hindi na sila nagkita o nagkausap nang personal.

Nang matanong siya kung may third party, saad niya, “Aahhh, bilang asawa, di ba ang mga asawa malalakas ang [pakiramdam]? Ako, ramdam ko meron. Ramdam ko. Gut feel.

“Pero it doesn’t matter kung meron o wala. Kasi nung sinabi niya na firm na siya sa decision, wala na naman akong ilalaban, di ba?

“Kapag lumaban pa kasi ako, kunyari nag-stay ako, alam ko naman ang magiging ending. Yung dignity at self-worth ko, mawawala na yon.

“Nagtira naman ako kasi alam ko na mangyayari uli yon. Kasi nung 2019, nag-cheat na rin siya noon.”

Dagdag niya, “So, parang may trust issues na ako. At siguro, isa yon sa minsan hindi ko alam na pagtalak ko sa kanya.

“O minsan, yung hindi naman mahigpit, pero yung tanong na, ‘Nasaan ka na? Sabi mo, 12 midnight nandito ka na.’”

Noong November 13, 2024, nagpasalamat si Ai-Ai sa suporta ng netizens sa kanya sa gitna ng kanyang pag-aming hiwalay na sila ni Gerald.

Sa pamamagitan ng Facebook, pinasalamatan ni Ai-Ai ang mga taong nagmamalasakit at nangangumusta sa kanya, kabilang na rito ang ilan sa malalapit niyang kaibigan at masusugid na tagahanga.

Ani Ai-Ai, malaking bagay sa kanyang pagmu-move on ang natatanggap niyang pagmamahal sa mga ito.

Mensahe niya, “Thanks to all of you who supported me. My friends and my fans are the real heroes of this story. I appreciate every one of you. Been reading all your posts and messages.”

Para hindi na mag-alala pa ang mga ito ay siniguro rin ng aktres na nasa mabuti siyang kalagayan, at naniniwala siyang kaya niyang malagpasan ang sakit at pangungulila na kanya ngayong pinagdaraanan.

Saad niya (published as is), “i will be fine. All these shall pass… God bless us all!”