– Humingi ng tawad si Jam Ignacio kay Jellie Aw at sinabi niyang nais niyang ayusin ang kanilang relasyon sa pribadong paraan

– Nagpahayag ng pagtutol ang kapatid ni Jellie na si Jo Aw at nagbabala laban sa posibilidad ng muling pagbabalikan ng dalawa

– Naglabas si Jellie ng mga larawan ng kanyang duguan at may pasang mukha at itinuro si Ignacio bilang responsable sa insidente

– Patuloy na inaabangan ng publiko ang magiging legal na hakbang ni Jellie laban kay Ignacio

Muling naging usap-usapan sa social media ang relasyon nina DJ Jellie Aw at Jam Ignacio matapos ang naging pahayag ni Ignacio sa GMA News, kung saan humingi siya ng tawad kay Jellie at sa mga taong naapektuhan ng isyu.

Ayon kay Ignacio, nais niyang ayusin ang kanilang relasyon sa pribadong paraan at umaasa siyang mabibigyan ng pagkakataon na itama ang kanyang pagkakamali. “Pangarap ko pa rin ang magkaroon ng masayang pamilya kasama si Jellie,” ani Ignacio.

Ngunit, hindi ikinatuwa ng kapatid ni Jellie na si Jo Aw ang naging pahayag ni Ignacio. Sa isang matapang na post sa social media, nagbabala siya kay Jellie hinggil sa posibilidad ng muling pagbabalikan nila ni Ignacio. “Magiging kwento ka na lang talaga pag binalikan mo pa ‘to Jellie Aw 🙂,” saad ni Jo Aw.

Sa kabila nito, sumagot si Jellie sa paalala ng kanyang kapatid sa simpleng mensahe: “Ok Master Jo Aw.”

Matatandaang naglabas si Jellie ng mga larawan sa social media kung saan makikita ang kanyang duguan at may pasang mukha.

Sa kanyang post, direkta niyang itinuro si Jam Ignacio bilang responsable sa umano’y pananakit sa kanya. Kinumpirma rin ni Jo Aw ang insidente at iginiit nilang ipaglalaban nila ang hustisya para kay Jellie.

Matapos ang insidente, nagtungo si Jellie sa ospital upang ipagamot ang tinamong pinsala at nakatakda ring magsampa ng pormal na reklamo laban kay Ignacio.

Sa kanyang pinakabagong pahayag, nagpasalamat siya sa mga sumusuporta sa kanya. “Lubos po akong nagpapasalamat sa mga nag-message sa akin na nagpaparating ng kanilang suporta at panalangin. Sa ngayon po ay kailangan ko muna magpahinga. Maraming salamat pong muli,” ani Jellie.

Samantala, patuloy na inaabangan ng publiko ang mga susunod na hakbang ni Jellie Aw, lalo na sa aspetong legal, at kung paano ito makakaapekto kay Jam Ignacio.

Si DJ Jellie Aw ay isang Pilipinang disc jockey, mananayaw, mang-aawit, at vlogger na kilala sa kanyang masiglang presensya sa industriya ng entertainment. Nakamit niya ang malaking kasikatan sa mga social media platform, partikular sa TikTok, kung saan ibinabahagi niya ang kanyang mga performance at lifestyle content. Sa TikTok, mayroon siyang mahigit 238,900 followers at 704,100 likes.

May matapang na pahayag si Ogie Diaz matapos akusahan ng pananakit sa kanyang fiancée na si Jellie Aw si Jam Ignacio.

Naglabas ng pahayag si Jellie Aw matapos ang insidente ng umano’y pananakit sa kanya ng fiancé na si Jam Ignacio at sinabi niyang kailangan niya munang magpahinga. Ibinahagi niya sa social media ang mga larawan ng kanyang duguan at may pasang mukha at direkta niyang itinuro si Jam bilang responsable sa pangyayari.