Tuluyan nang kinalimutan nina Lani Mercado at Cristy Fermin ang hidwaang namagitan sa kanilang dalawa nang dalawin ng una ang nanay ng nasabing TV/radio host-columnist sa isang ospital. Matatandaang sa January 7 episode ng The Buzz ay malungkot na ibinalita ni Cristy na ang kanyang ina ay nasa ospital at may malubhang karamdaman.

Lubos ang pasasalamat ni Cristy sa hakbang na ito na ginawa ng asawa ni Senador Bong Revilla. Ayon kay Cristy, “Kaninong puso ang hindi maso-sorpresa kapag ang nanay mo na minamahal mo ay binigyan ng extension ng pagmamahal ng mga taong nakasamaan mo ng loob?”

Dagdag pa ng kilalang entertainment columnist-TV host-radio host sa isang taped interview ng Startalk noong Enero 20, “Nagpapasalamat ako sa mag-asawang Senador Bong at Lani dahil hindi nila binigyang halaga yung mga salitang nabitiwan ko noon at nasulat ko.”

Pinaulanan ni Cristy noon ng batikos ang pamilya Revilla, partikular sina Lani at ang anak niyang si Jolo Revilla. Mula sa paggamit diumano ng ecstacy ng panganay ni Lani na si Bryan, hanggang sa pagkakaroon daw ng kabit ng senador, at pati na sa diumano’y pambubugbog ni Jolo sa ina ng kanyang baby at anak ni Rosanna Roces na si Grace Adriano—ang mga ito ay ilan lang sa mga isinulat sa mga kolum at inihayag sa radyo ni Cristy.

Ang batikos ay nakaabot sa marami. Ang programang Showbiz Mismo ni Cristy sa DZMM ay limang beses isang linggo kung umere. Kaya sirang-sira ang mga Revilla mula Lunes hanggang Biyernes, pagdating ng 2:30-4:00 ng hapon. Sa mga tabloid naman ay merong tatlong kolum si Cristy: ang “Most Wanted” sa Bulgar, ang “Chika!” sa Bandera, at ang “Iskandalosa” sa PM. Tuloy, pati sa print ay nasiraan nang husto ang pamilyang Revilla.

Winika ni Lani sa isang taped interview sa S-Files noong January 14, “Alam kong binabatikos niya nang husto ang pamilya ko, ako at si Jolo. Siguro sa pamamagitan no’n, maging hakbang ito para magkaroon na rin ng peace.”At nang magkita sina Lani at Cristy sa ospital, tila nawala lahat sa isip ng aktres ang mga batikos na natanggap niya mula sa kolumnista.

Dagdag pa ni Lani, “Hindi na kailangan siguro magkapaliwanagan. Hindi na kailangan humingi ng paumanhin. Yung mere fact na tinanggap niya ako nang bumisita ako sa nanay niya, na sana magaling na ngayon, is one big thing for me.”

Ang lahat ng nakaalam sa gesture ni Lani ay bumilib dito. Ni hindi ito humingi ng paumanhin o paliwanag man lang, gayo’t tinira nang husto ang asawa at mga anak niya. Inaasahan na lang nila na may natutunan dito si Cristy.