Excited na si Shaira Diaz sa nalalapit nilang kasal ng kanyang longtime fiancé na si Edgar Allan “EA” Guzman.

Mangyayari na ito ngayong 2025.

Ito rin ang ika-12 anibersaryo nila bilang magkarelasyon, at na-engage sila noon pang 2021.

SHAIRA DIAZ ON CELIBACY FOR 12 YEARS

Lumabas sa ilang panayam noong 2024 na sa loob ng labing-isang taon, masusi nilang sinusunod ang sexual abstinence o celibacy.

Ito ang panahon na hindi nila sinubukang magtalik.

Ayon kay Shaira, mahigpit pa rin nilang sinusunod ni EA ang kasunduang ito hanggang ngayong nasa ika-12 taon na ang kanilang relasyon at malapit na silang ikasal.

“Oo. May mga ganun, may mga ganun talaga,” saad ng actress-TV host sa eksklusibong panayam ng PEP.ph (Philippine Entertainment Portal) sa grand mediacon ng Lolong: Bayani ng Bayan nitong Lunes, Enero 13, 2025.

Pagpapatuloy ni Shaira, “At siguro, alam mo, hindi naman talaga… unexpected actually yung story na yun. Hindi naman para i-brag ko siya.

“So, just to be clear once and for all, hindi naman para i-brag ko talaga.

“It’s just yung mga headlines lang din, na hindi naman nanggaling talaga sa bibig namin, pero na-headline na ganun.

“Pero happy naman ako kasi, somehow, naging good example ako sa mga kabataan.”

Pag-uusisa namin, “Hindi niyo talaga sinubukan kahit minsan?

Umiiling ngunit nakangiting sabi ni Shaira, “Yung mga parents… hindi ako haharap sa media kung di totoo yung sinasabi ko.

“Ayoko naman ipapahiya yung sarili ko kung di naman totoo. At anong makukuha ko?

“Anyway, yung parents, happy na lang ako na maraming parents na natuwa, mga bata na parang, yun nga, naging role model ako para sa kanila.

“Parang wini-wish nila sa anak nila, na ganun din yung ma-instill nila. So, yun lang.”

Wala na raw magagawa si Shaira kung may mga taong hindi naniniwala sa sinasabi niya.

“Hindi ko na sila… wala na akong magagawa dun, bahala na sila. No comment,” pakli niya.

SHAIRA DIAZ-EA GUZMAN CHURCH WEDDING IN SILANG CAVITE

Sa February 17, 2025, ipagdiriwang nina Shaira at EA ang ika-12 anibersaryo nila bilang magkasintahan.

Ayaw mang sabihin ni Shaira ang eksaktong petsa ng kanilang kasal, baka itaon daw nila ito sa kanilang anibersaryo.

Sabi ng Unang Hirit co-host, “This year. Lapit na.”

Anong pakiramdam na malapit na silang ikasal?

Sagot niyang nakangiti, “So happy. At the same time, natsa-challenge dahil may Lolong, mukhang mag-o-overlap, baka sasabay.

“Tapos may business din kami bubuksan ni Baba. Siyempre may wedding, pero overall okay naman.

“Di naman ako masyadong stress. Wala, wala.”

Anong klaseng wedding ang pinaghahandaan nila?

“Church wedding siya, very intimate lang, family, close friends,” pagbabahagi ni Shaira.

Saan ito gaganapin?

Kaunting pagbibigay niya ng clue, “Dito lang din. Parang bandang Silang [Cavite], pa-Tagaytay para at least medyo malamig.

“May church doon na sobrang gustung-gusto ko talaga.

Leading-lady muli si Shaira ng bidang si Ruru Madrid sa Book 2 ng Lolong.

Ruru Madrid and Shaira Diaz at Lolong: Bayani ng Bayan grand media conference

Mapapanood na ito sa GMA Prime simula January 20, pagkatapos ng 24 Oras.