Wala pang comment sa social media ang mga anak ni Dennis Padilla tungkol sa paglalabas nito ng sama ng loob ilang oras lang matapos dumalo sa kasal ng anak na si Claudia Barretto.

Dennis, Claudia at Basti
STAR/File

Relasyon sa mga anak basag na naman

Naghimutok nga si Dennis na isa lang siyang ordinaryong bisita sa kasal ng anak at hindi siya itinuring na father of the bride.

Ikinasal si Claudia sa negosyanteng boyfriend na matagal na niyang karelasyon, si Basti Lorenzo, kapatid ng mister ni Erich Gonzales na anak ng bilyonaryong si Martin Ignacio Lorenzo.

Deleted na ang nasabing post ng komedyante na nakasulat sa isang yellow paper at nakalagay na: “Grabe kayo! Nabudol niyo [ako]! Father of the bride naging visitor! Galing niyo!”

Dagdag pa niya, “Sagad sa buto.”

Wala siyang binanggit na pangalan pero hulang-hula ng netizens na patungkol ito sa kasal ng anak at nakumpirma nang sumagot siya sa isang follower na kasal nga ni Claudia ang pinatutungkulan niya.

Doon niya rin nabanggit na hindi siya bahagi ng wedding program.

Bukod sa kanyang deleted post, nag-iwan din siya ng mensahe sa Instagram page ng anak na si Julia na kamakailan ay naging ok sila.

Ang komedyante pa lang ang may post sa nasabing kasalan.

Habang ang bride at maging sila Julia ay hindi pa pino-post na may naganap na kasalan sa kanilang pamilya.

Naalalang kahit noong ikasal si Erich sa mister na si Mateo Lorenzo na galing sa ultra rich family ay wala ring inilabas sa social media.

Member ng Opus Dei ang pamilya Lorenzo kaya diumano’y low-key ang mga ito kahit nga pamilya ng mga bilyonaryo.

Dati nang basag ang relasyon ni Dennis sa kanyang mga anak kay Marjorie Barretto noon pa man kaya’t hindi na bago ang kanyang hugot.

Agad namang pinagtanggol si Dennis ng kanyang kapatid na si Gene Padilla na kasama pa pala nilang dumalo ang ina matapos may mag-komento na ayan na naman si Dennis, nag-iingay na naman sa social media.

“Wala ka alam sa kabuuan ng mga pangyayari mulat mula wag ka sumawsaw,” unang sagot nito.

Hanggang gumawa siya ng isang post:

“Ngayon lang po ako magsasalita…by 1PM nasa church na po ako… galing bulacan going to alabang… si mama po namin 5am gumising na excited same kay kuya dennis padilla para sa kasal ng anak niya… ngayon lang ako nakawitness ng kasal na di part ng program ang ama ng bride… sa aga namin dun… na nandun mga event organizer wala man lang nagsabi na di siya part ng program…di kasama sa entourage na maglalakad sa gitna papuntang harapan ng altar…,” umpisa ng post nito.

“nagtanong kami kung san uupo ang nanay namin ang sabi kahit saan dun at yung ama dun na lang DAW sa tumabi sa mga ninong…kaya kami ni kuya dennis pumunta na lamang sa likuran…napaluha at napaiyak si kuya sa mga nangyari…

“kaya sabi ko umuwi na tayo after ng simbahan at papicture na lang sa kinasal…naawa din ako sa nanay ko kasi naiyak na rin… naramdaman ko yung sakit na naram­daman ng kapatid at nanay ko dahil ama din ako… ang tagal na panahon na nanunuyo at nahingi ng atensyon ama niyo sa inyo mga anak…yan ba itinanim ng mga nakapaligid sa inyo…. puro kayo karangyaan at kasikatan… sa inyo na lahat yan… ,” ang mabigat pa niyang paratang.

“sanay kami sa hirap at di talaga kami nababagay sa inyo… pero pinag kaiba namin sa inyo ay yung puso namin at dignidad di niyo kaya pantayan…kahit magtanong kayo sa ibang magulang tama ba o mali ang ginawa niyo sa tatay niyo???,” sabi pa ng kapatid ng komedyante na isang digital creator ang ‘work.’

Sumagot din ito sa mga namba-bash sa kapatid na “Yung iba mga nagkokomento kay dennis padilla… alamin niyo ang simulat simula baka ng kuwento at pangyayari mula 2007 baka masuklam kayo…”

Hanggang sa sinusulat namin ito ay wala pang sagot ang kampo nila Marjorie at wala silang post tungkol sa nasabing kasalan.

Ikinasal sina Claudia at Basti sa St. James the Great Parish in Muntinlupa.

Bukod sa nasabing kontrobersiya, isa pang pinag-uusapan ay naunahan pa ni Claudia ang kanyang ate Julia. Kelan na raw kaya magpo-propose si Gerald Anderson sa karelasyon?

Recently ay nagkaayus-ayos na sila, pero sandali lang pala ‘yun.