Inihayag ni Rufa Mae Quinto na nakaramdam pa siya nang awa noong una sa kompanyang Dermacare nang sabihin sa kaniya na nalulugi ito kaya hindi makapagbayad sa kaniya. Ngunit nadismaya siya nang matuklasan niya ang totoo.

“Pinilit nilang magbayad. Tapos sabi nila, hindi na nila kaya. Hindi ko na rin pinilit na ihulog ‘yung mga tseke,” sabi ni Rufa kay Tito Boy sa episode ng “Fast Talk with Boy Abunda” nitong Biyernes.

“Kasi akala ko nga mabait eh. So parang sabi ko po nga, ‘Kawawa naman. O basta good luck sa inyo.’ Pinasabi ko lang, ‘di naman ako ‘yung kausap sa manager ko. Sabi ko, ‘Ay, ganu’n ba? Okay na rin,’” kuwento niya.

“Kasi nga hindi, laging talbog nga eh, ‘di ba? So parang obvious naman na walang wala na rin silang pambayad. Ewan ko kung manloloko talaga o walang pambayad,” pagpapatuloy pa ni Rufa.

Naawa umano si Rufa noong una nang malamang palugi ng kompanya. Hanggang sa matuklasan niyang nakatatanggap ito ng mga reklamo.

“Naawa pa ako. Sabi ko, kawawa naman, baka na-swindle. ‘Yun pala sila na ‘yung nagsu-swindle. ‘Di ba? Kaya dapat ang hanapin ‘yung may-ari,” saad niya.

“Minsan, mahirap masyadong mabait. Kasi parang, pagtitripan ka na lang,” ani Rufa tungkol sa kaniyang natutunang leksyon sa pangyayari.

Sa parehong panayam, muling nilinaw ni Rufa na wala siyang kinalaman sa kompanyang Dermacare, na nasasangkot sa isyu matapos sabihin ng Securities and Exchange Commission (SEC) na hindi ito nakarehistro.

Sinabi ng aktres na sumailalim lamang siya sa photoshoot at video nang kunin siya noon bilang endorser.

“Tapos sila na rin nagsabi na sorry na daw, hindi na nga raw tuloy kasi nga, hindi na rin gagamitin ang mga materials ko. Photoshoot, video, lahat. Kasi wala na raw, may problema na sila,” anang aktres.

Kalaunan, hindi siya nabayaran at tumalbog pa ang mga tsekeng inisyu sa kaniya ng Dermacare.

Nasa Amerika si Rufa Mae nang maglabas ng arrest warrant laban sa kaniya ang korte batay sa kasong isinampa ng mga taong naglagay ng puhunan sa kompanya.

Pagkabalik niya sa Pilipinas, kaagad ding humarap si Rufa Mae, nakipag-ugnayan ang kaniyang kampo sa National Bureau of Investigation para sa kaniyang pagsuko.

Umaabot sa P1.7 milyon ang halaga ng piyansa ni Rufa upang pansamantalang makalaya habang dinidinig sa korte ang kaniyang kaso.

Ang Dermacare ang kaparehong kompanya na dahilan sa pagkakaaresto at ilang araw na pagkakadetine sa actress-entrepreneur na si Neri Naig noong Disyembre.

Parehong ini-endorso ng dalawang aktres ang Dermacare.

Nahaharap si Rufa Mae sa 14 counts ng paglabag sa Section 8 ng Securities Regulation Code, na nagsasaad na ang securities gaya ng shares at mga investment ay hindi maaaring ibenta sa Pilipinas nang walang registration statement na isinumite at inaprubahan ng Securities and Exchange Commission (SEC).

Nilinaw din ng abogado na hindi kinasuhan ng large-scale estafa si Rufa Mae.

Noong Setyembre 2023, naglabas ang SEC ng advisory tungkol sa Dermacare-Beyond Skin Care Solutions, na nagsasabi na hindi awtorisado ang kumpanya na humingi ng mga investment dahil hindi sila rehistrado at walang lisensya para magbenta ng securities.

Sa parehong advisory, sinabi ng komisyon na maaaring kasuhan ang mga salesman, broker, dealer, ahente, promoter, influencer, at endorser ng Dermacare.