Nagpaunlak ng ilang katanungan si Pambansang Bae Alden Richards sa inuugnay sa kanya ngayong si Asia’s Box Office Star Kathryn Bernardo.

Si Alden ang cover for May 2024 ng Preview Philippines.

Samu’t saring bagay ang pinag-usapan sa feature, kabilang na ang maraming sightings nila ni Kathryn.

Isa na rito ang kinakiligang video ng maraming netizens — ang sorpresang pagdating ni Alden sa post-birthday celebration ni Kathryn noong April 2, 2024.

Kasunod nito ang housewarming party ni Kathryn para sa kanyang bagong residence noong April 11, 2024, kung saan dumalo rin si Alden.

Kaya naman duda ng netizens, more than friends na ang koneksiyon ng dalawa.

Ayon kay Alden, matapos nilang gawin ang box-office hit na Hello, Love, Goodbye noong 2019 ay nagtuluy-tuloy lamang ang pagkakaibigan nila ni Kathryn.

Lahad niya sa Preview, “The friendship never ended. Naging solid din talaga yung samahan naming lahat [when we were filming].

“And right now, I’m just quite overwhelmed. Whatever is happening between Kath and I, I really want it to be personal.”

Hindi naman kinumpirma ni Alden kung may sequel ba ang kanilang pelikulang Hello, Love, Goodbye.

Patok ang tambalang Alden at Kathryn sa big screen, at tumabo ang Hello, Love, Goodbye ng PHP880M.

Record-holder ito bilang highest-grossing Filipino film of all time, mula nang ipalabas ito noong 2019, hanggang sa maungusan ito Rewind noong 2023.

Entry ang Rewind sa 2023 Metro Manila Film Festival, tampok ang Kapuso Primetime King and Queen ng mag-asawang Dingdong Dantes at Marian Rivera.

KATHRYN BERNARDO SUITORS?

Lagpas friendship level na umano ang pagkakamabutihan nina Alden at Kathryn.

Ito ay ayon sa nakalap na impormasyon ng PEP.ph (Philippine Entertainment Portal). Sabi ng isang source, walang kinalaman sa trabaho ang private parties ni Kathryn na dinaluhan ni Alden, at makikita roong nag-e-enjoy ang mga ito sa company ng isa’t isa.

Time will tell kung mauuwi sa higit sa pagiging magkaibigan at onscreen partners ang ugnayan ng dalawa.

Kinilig nang husto ang netizens sa interactions nina Kathryn at Alden sa Palawan.

Kumalat sa social media ang videos at photos ng mga pagkakataong silang dalawa lang ang magkausap habang kita sa background ang sunset at dagat.

Komento pa ng shippers ng Kathryn-Alden o KathDen, bakas sa sigla at mga tawa ni Kathryn na “naka-recover” na raw ang aktres sa breakup nila ni Daniel Padilla at puwede nang maligawan uli.

May mga nag-udyok pa kay Alden na “i-push mo na yan” at “bakuran mo na” dahil may naamoy raw ang netizens na ibang umaaligid-aligid kay Kathryn.

Hindi nabigo ang fans ng KathDen.

Nasundan ang sighting sa dalawa nang maimbitahan si Alden sa intimate post-birthday celebration para kay Kathryn na inorganisa ng kanyang glam team noong April 2.

Isang private dinner ito na kakaunti at piling-pili lamang ang bisita, kabilang ang ina ni Kathryn na si Min Bernardo.

Bakas ang gulat at kasiyahan sa mukha ni Kathryn nang dumating si Alden na may dozen red roses at luxury brand paper bag na parehong inabot nito kay Kathryn.

Bukod-tanging si Alden ang artistang bisita, kaya hindi maiwasang mabigyan ng kulay ng netizens ang presensiya ng binata.

Lalong umugong ang pag-uugnay sa dalawa nang dumalo si Alden sa housewarming party ni Kathryn.

Kita sa videos mula sa mga dumalo sa party na lubos na nag-e-enjoy sina Alden at Kathryn sa company ng isa’t isa.

Namataan silang magkatuwang sa pagkuha ng shot glasses sa bar, at hindi nila napansing kinukunan na pala sila ng glam team ni Kathryn.

Pagbaling nila sa gawi ng mga kasama ay sabay sina Kathryn at Alden na nag-serve ng shots sa mga ito.

Bukod sa kulitan nila noong gabing iyon ay mahahalatang todo-alalay si Alden kay Kathryn kaya lalong kinilig ang kanilang mga tagahanga.

Noong gabi ring iyon ay imbitado si Alden sa PH Esports Awards kunsaan nanalo siya para sa dalawang kategorya—Esports and Gaming Positive Influencer of The Year at Esports Event of The Year.

Ang huli ay para sa kumpanya ni Alden na Myriad Esports dahil sa paglunsad nito ng Myriad Esports Cup at Myriad MLBB Masters S1.

Usap-usapan ng KathDen fans na big deal na pinili ni Alden dumalo sa party ni Kathryn kaysa sa awards night, dahil kilalang avid gamer ang Kapuso actor at passion project nito ang itinayong esports company.

Natandaan pa ng fans ang TV interview kina Alden at Kathryn noong nagpro-promote sila ng pelikulang Hello, Love, Goodbye noong 2019.

Sinabi roon ni Kathryn na isang bagay na natuklasan niya kay Alden ay ang hilig nito sa paglalaro ng Mobile Legends na minsan ay hindi raw niya ito makausap dahil sa sobrang tutok sa mobile game.

Kaya komento ng KathDen fans, may pagtatangi si Alden kay Kathryn dahil todo-effort at oras ang ibinibigay nito sa dalaga ngayon.

Sabi naman ni Alden, base sa panayam ni Nelson Canlas ng 24 Oras noong April 10: “What you see is what you get.”