Hindi pinalampas ni Derek Ramsay ang komento ng isang netizen na nabalitaan daw nitong hindi tunay na anak ng aktor ang anak nila ng asawang si Ellen Adarna.

Sa kanyang Instagram Story kagabi, February 20, 2025, ibinahagi ni Derek ang screenshot ng nasabing komento ng netizen.

Kalakip nito ang larawan ni Derek habang karga-karga ang anak na si Liana, habang nasa tabi nila si Ellen na nakangiting tinitingnan ang anak.

Ayon sa netizen, nabalitang nagpa-DNA test diumano si Derek at nadiskubre nitong hindi siya ang ama ng anak nila ni Ellen.

Buong komento ng netizen: “That’s not his baby. It was on the news that he did a DNA test and he wasn’t the baby daddy.”

Sa halip na seryosohin ay idinaan na lang ni Derek sa biro ang kanyang buwelta sa netizen.

Sarkastikong caption ni Derek, kaya pala hindi niya natanggap ang resulta ng DNA test dahil sa netizen pala ito naipadala.

Buong caption niya: “Omg!!! The DNA test was sent ba to you? Kaya pala hindi ko nakuha.”

DEREK RAMSAY, ELLEN ADARNA WELCOME BABY LIANA

Isinilang ni Ellen si Liana noong October 2024.

Marami ang nagulat dahil hindi namalayan sa social media ang paglobo ng kanyang tiyan.

Sa Instagram post ni Derek, makikitang karga-karga ni Ellen ang bagong silang na anak habang nakahiga siya sa hospital bed.

Katabi ni Ellen ang panganay niyang si Elias Modesto, anak ng aktres sa dating karelasyong si John Lloyd Cruz.

Sabi ni Derek sa caption, “My world keeps getting better and better! [smiling face with hearts emojis] #houseofdragons”

Sa isa namang Instagram post ni Ellen, kung saan may mga nagtatanong kung bakit hindi nahalata ang pagbubuntis niya, nilinaw nitong hindi niya itinago ang kanyang pagbubuntis.

Alam daw ito ng kanilang mga kaibigan at kamag-anak.

Pinili raw niyang maging tahimik at mapayapa ang kanyang pagbubuntis at ayaw niyang sumawsaw rito ang publiko.

Buong komento ni Ellen, “hindi ko gusto surprise. Alam naman ng friends and family and di ko naman tinatago when i go out, crop top ako kahit malaki tyan.

“I just didnt announce because i dont need to. I want a quiet and peaceful pregnancy. Last thing i need are opinions from people i dont know and unsolicited advice.”