Mariing kinontra ni Angillyn Gorens ang mga naging sagot ng ex-partner niyang si Buboy Villar sa kanyang mga akusasyon ukol sa sustento at diumano’y pananakit ng aktor noong nagsasama pa nila.

Patutsada pa ni Angillyn, isang linggo umanong inensayo ni Buboy ang kanyang mga sinabi sa Fast Talk With Boy Abunda noong April 4, 2025, kung saan pinalabas umano ng aktor na siya ay “sinungaling at baliw.”

Sa bagong post sa Facebook ni Angillyn kahapon, April 6, 2025, bukod sa pagkontra sa mga sinabi ni Buboy ay may panibagong mabigat na paratang siya laban sa ama ng kanyang dalawang anak.

Ayon kay Angillyn, gumagamit umano noon ng ipinagbabawal na gamot si Buboy.

Buwelta ni Angillyn (published as is): “buboy villar.. 1 week ka nag practice ng script??

“ginagawa mo pako sinungaling at baliw? nakakalimutan mo na bang sinasaktan moko lalo pag wala kang marijuan4??

“galit na galit ka at wala ka sa ayos. pag wala kang ganon nag aaway tayo kasi panahon ni duterte natatakot ako na matokhAng ka. ideny mo ha?hahaha.”

ANGILLYN REFUTES BUBOY’S claim about financial support

Sa eksklusibong panayam ng PEP.ph (Philippine Entertainment Portal) kay Angillyn noong March 24, 2025, sinabi nitong walang problema sa kanya kung may bago nang pamilya si Buboy.

Ito ay matapos isapubliko ng komedyante ang relasyon nito sa bagong partner na si Khrizza Mae “Isay” Sampiano at ang pagkakaroon nila ng anak.

Ang tanging problema lang daw niya ay nababawasan na ang oras at sustento ni Buboy sa kanilang dalawang anak.

Sa panayam ni Boy Abunda kay Buboy noong April 4, isa-isa niyang sinagot ang mga akusasyon ni Angillyn, kabilang na rito ang patungkol sa ibinibigay niyang sustento sa kanilang dalawang anak na edad pito at lima.

Ayon kay Buboy, nang maghiwalay sila ni Angillyn noong 2020 pagkatapos ng apat na taon nilang relasyon ay may pag-uusap na sila kung magkanong halaga ang ibibigay ng aktor.

Sa kanilang pag-uusap, magbibigay raw si Buboy ng PHP60,000 tuwing ika-10 at 25 na araw kada buwan.

Kung susumahin, sa isang buwan ay nasa PHP120,000 ang dapat ipadalang sustento ni Buboy.

Noong una ay naibibigay naman daw ito nang buo ng aktor. Hanggang sa humina raw ang kanyang trabaho kung kaya’t unti-unti nang nabawasan ang kanyang ipinapadala.

Pahayag ni Buboy: “Wala po itong legal. Ito ay napag-usapan namin. Ayun po yung gusto ni Angillyn.

“Hindi po ako perfect diyan sa pagbibigay ng sustento po kasi bilang artista, hindi naman po ako laging may regular, alam din po yan nung ibang katrabaho ko.

“Like sa sahod ko, hindi naman po ako nakakaipon nang ganun kalaki. Like sumahod po ako ng 70 [PHP70,000], 60 [PHP60,000] po dun ang maibibigay ko.

“O kaya sumahod lang po ako ng 30 [PHP30,000], pinapangutang ko po iyon, Tito Boy, para mabuo ko po yung 60 [PHP60,000] na yun.

“Minsan po, e, nagkukulang talaga, kasi talo talaga sa trabaho. Ang naibibigay ko lang talaga [is kung magkano yung mayroon ako].”

Kapag hindi siya nakabuo ng PHP60,000 agad daw itong sinasabi ni Buboy sa mga magulang ni Angillyn.

Ang mga magulang ni Angillyn ang nag-aalaga sa dalawa niyang anak, habang si Angillyn naman ay nasa Amerika at nagtatrabaho.

Saad ni Buboy, “[Nagsasabi ako] sabi ko, ‘Mom, pagpasensiyahan niyo na po ang naipon ko lang po is 45 [PHP45,000],’ ganun.”

Pinasinungalingan ito ni Angillyn.

Hinamon din niya si Buboy na maglabas ng katibayan na nagbigay ito ng PHP120,000 kada buwan para sa kanilang dalawang supling.

Sabi ni Angillyn: “and last DAHIL NAPAKASINUNGALING MO. kelan ka nag bigay ng 120k??

“gusto ko icomment mo dito or ipost mo yung proof mo na nag bigay ka ng 120k na sustento.

“10th at 25th ng month SABI MO tag 60k binibigay mong sustento at nagkakahalagang 120k SABI MO YAN SA INTERVIEW malinaw na malinaw hahaha”

Nakalimutan din daw ni Buboy sabihin sa publiko na isa at kalahating taong wala itong ibinigay na sustento sa kanilang dalawang anak.

May utang pa raw si Buboy sa ina ni Angillyn, pero hindi na lang daw ito pinabayaran.

Pagtatapos ni Angillyn, “bakit hindi mo rin na mention na 1 and a half YEAR 0 pesos binigay mo at napakarami mong utang sa mama ko na sinasabi mo babayaran mo pero di na pinabayad sayo nagmumuka kaming pera sayo kapal ng mukha mygoodness.”

Samantala, walang sinabi si Angillyn tungkol sa pagbubunyag ni Buboy na una siyang nagkaroon ng anak sa iba bago pa man nagkaanak ang aktor sa partner nito ngayong si Isay Sampiano.

Nagpadala ang PEP.ph (Philippine Entertainment Portal) ng mensahe kay Buboy, sa pamamagitan ng direct messaging sa Instagram ngayong araw, April 7, 2025, upang kunin ang kanyang reaksiyon sa bagong paratang ni Angillyn.

Mananatiling bukas ang PEP sa panig ng magkabilang kampo kaugnay ng isyung ito.