Inamin ni Ai-Ai delas Alas, 60, na nasa recovery stage pa rin siya mula sa paghihiwalay nila ng estranged husband na si Gerald Sibayan.

Kinumpirma ni Ai-Ai ang paghihiwalay nila ni Gerald noong November 2024.

Idinaan daw ni Gerald sa Viber messaging ang pakikipaghiwalay sa kanya noong October 14, 2024.

Ang dahilan ni Gerald, gusto niyang magkaanak at hindi na raw siya masaya sa pagsasama nila.

AI-AI ADMITS WRONG DECISION TO MARRY GERALD

Ayon sa Comedy Queen, sa simula pa lamang ay alam na niyang “wrong decision” ang pakasalan si Gerald.

Sinabi ito ni Ai-Ai sa interview sa kanya ni BB Gandanghari na ipinost sa YouTube nitong March 27, 2025.

Natanong si Ai-Ai tungkol sa misconception sa kanya ng mga tao — na isa siyang mabuting ina pero tanga sa pag-ibig.

Pero pagtatama niya: “Hindi ako tanga. Nagkataon lang na napupunta ako sa hindi tamang tao para sa akin.

“Kasi kung tanga ako, hindi kami aabot ng ten years.

“Nagkataon lang siguro na hanggang dun lang and meron pala siyang ibang agenda, o meron pala siyang iba na nagustuhan, o may iba pala siyang gusto sa akin.”

Tinanong ni BB si Ai-Ai kung sa tingin niya ay hindi mali ang desisyong makipagrelasyon at kalaunan ay pakasalan si Gerald, na 30 taon ang agwat ng edad sa kanya.

Sagot ni Ai-Ai: “Wrong decision.”

Tanong muli ni BB: “From the very beginning?”

“Yes,” sagot ni Ai-Ai.

“Kumbaga, una, pinanindigan ko na lang, and parang gusto kong ipakita sa buong mundo na age doesn’t matter.

“But it matters.”

Kung makikipagrelasyon daw muli si Ai-Ai, gusto niya sa lalaking hindi ganoon kabata o kaya ay kasing-edad niya.

“Kahit siguro hindi older, pero siguro hindi ganun kalaki yung gap. Siguro ten years is okay…” sabi niya.

STILL ON RECOVERY STAGE

Limang buwan matapos nilang maghiwalay ni Gerald, sinabi ni Ai-Ai na nagre-recover pa raw.

“Nasa recovery stage pa rin, but in God’s time and in God’s grace, I’ll be okay.

“Tapos na ako sa grieving. I think acceptance na lang,” pahayag niya.

Ipinaliwanag ni BB na ang proseso ng healing ay grieving, anger, acceptance, at forgiveness.

Isiningit ni BB na sa tingin niya ay nasa anger stage na si Ai-Ai, batay sa mga kuwento nito.

Tumango naman si Ai-Ai.

“Ayokong maging in denial kasi mahihirapan akong mag-move on,” pagsang-ayon ng Comedy Queen.

AI-AI DELAS ALAS AND HER THREE WEDDINGS

Sa isang punto ng pag-uusap nila ni BB, nausisa si Ai-Ai sa tatlong beses niyang pagpapakasal.

Dito nilinaw ni Ai-Ai na, “technically,” isang beses lang siyang ikinasal, at iyon ay kay Gerald.

Paliwanag ni Ai-Ai, hindi counted ang pagpapakasal nila ng singer na si Miguel Vera dahil bigamous daw ang pagsasama nila.

Lahad niya: “Yung una, kay Miguel, kaya ako napakasal kasi tungkol sa nanay ko.

“Sabi kasi ng nanay ko dati, pumayag siyang mag-live-in [kami] ni Miguel. Ngayon, sabi niya, ‘Pag niloko mo yung anak ko, idedemanda kita.’

“So, nangarag ako nung ikakasal na siya [Miguel], baka malaman ng nanay ko. Natakot ako na ipakulong niya si Miguel. Nagpakasal ako.

“Kunyari na lang kasal kami kahit alam ko namang meron siyang ibang asawa. Para lang malaman ng nanay ko na, ‘Ah, ikinasal siya.’

“So, bigamous yun, not counted.”

Nagkaroon ng dalawang anak si Ai-Ai kay Miguel — ang pangalawang anak niyang si Nicolo at bunsong si Sofia.

Ang panganay ni Ai-Ai na si Sancho ay anak niya sa dating nakarelasyon.

April 2013 naman nang magpakasal si Ai-Ai sa businessman na si Jed Salang sa Las Vegas, Nevada, USA.

Pero wala pang isang buwan, naghiwalay ang dalawa.

Pagbabahagi ni Ai-Ai: “Yung second din naman, hindi rin maganda.

“So 29 days. We divorced. Not counted ulit.

“Twenty-nine days lang kami ikinasal. Hindi ko na kaya.”

Sinabi ni Ai-Ai sa isang interview noon na ang pananakit sa kanya ni Jed at pagkakaroon nito ng ibang babae ang dahilan kaya nakipaghiwalay siya.

Ikinasal naman si Ai-Ai kay Gerald Sibayan noong 2017 pagkatapos ng tatlong taon nilang pagiging magkasintahan.

“Kaya ito lang yung, technically, totoo. Yun yung totoong kasal.

“So, technically, isang beses pa lang talaga,” paliwanag ni Ai-Ai.