Iniintriga ng netizens ang relasyon nina Gerald Anderson at Julia Barretto.

Matagal-tagal na rin kasi silang hindi nakikita ng publiko na magkasama.

Sa Instagram kahapon, May 23, 2025, nag-upload ng ilang pictures at videos si Gerald na kuha sa kanyang bakasyon sa isang campsite kasama ang inang si Evangeline Opsima at ilang kaibigan.

Makikita ang pag-e-enjoy ni Gerald sa kanilang nature trip na bakasyon. May kuha pa itong naliligo sa ilog kasama ang isang aso.

Caption ni Gerald sa post: “Regroup (camping emoji)”

NETIZENS ON GERALD ANDERSON POST: “Bat waley julia?”

Hindi naman maiwasang magtsismisan ang netizens sa comments section ng post ni Gerald.

Tanong ng isa, “Ba’t waley Julia?”

Tugon ng isang netizen, “Break na sila, thank God. Malaya na si Julia.”

Saad ng isa pa, “True wala na sila from reliable source.”

Sabi ng isa pang netizen, ang patunay raw ay ang pag-unfollow kay Gerald ng kapatid ni Julia na si Claudia Barretto sa Instagram.

Ayon pa dito, “Maayos yung buhay ko huwag kang mag-alala. Totoo namang hiwalay na sila kaya nga naka-unfollow na si Claudia sa kanya. Tingnan mo kung pina-follow pa ba siya ni Claudia. Obviously, ayaw ni Claudia sa kanya for Julia. Civil na lang sila pero wala na talaga sila.”

Nag-check ang PEP.ph (Philippine Entertainment Portal) sa Instagram account ni Claudia. Hindi nga ito naka-follow kay Gerald.

Pero maaari namang hindi talaga naka-follow si Claudia kay Gerald kahit noon pa.

Samantala, sa Instagram account naman ni Gerald, makikitang naka-follow ito kay Claudia.

NETIZENS SAY GERALD AND JULIA STILL TOGETHER

Hindi lahat ng nagkomento sa post ni Gerald ay nagsasabing hiwalay na nga ang aktor at si Julia. May mga nagtatanggol sa relasyon ng dalawa.

Sabi nga ng isang nagtanggol, “Kailangan ba magkasama lagi? May kanya-kanya rin silang mga trabaho at activities bukod sa pagiging magkasintahan.”

Sabi ng isa pa, “Grabe ba parang nasa 20’s ulit, iba alagang Julia.”

Pagkontra naman dito ng isa pang nagkomento, “Parang wala na nga… Ang dami nang event sa side ni Julia na wala siya. ‘Tapos kanya-kanya silang bakasyon. Medyo matagal-tagal na din na wala silang post or kahit My Day or Stories na magkasama sila. Parang nakakapanibago lang.”

Samantala, umaasa ang isa na sa simbahan na ang tuloy ng dalawa.

Aniya, “Napaka-busy nyong dalawa ni Julia. Daming project. Which is good. God bless Ge and Juju. More blessings to come. Hopefully next year wedding bells na.”

Ang huling pagkakataong namataang nagkasama sina Gerald at Julia ay noong March 10, 2025, sa pagdiriwang ni Julia ng kanyang 28th birthday.