“Huwag! Maawa ka. Maawa ka!” ang pahayag o pakiusap ni Lucena City Mayor Mark Alcala sa Cabinet Files nang tanungin ito kung gustong magkaroon ng Part 2 ang ulat ng PEP.ph (Philippine Entertainment Portal) noong Hulyo 29, 2024.

Naiulat noon ang diumano’y kanyang panliligaw kay Kathryn Bernardo.

Nagkaroon ng pagkakataon ang Cabinet Files na makausap ang 29-year-old mayor ng Lucena City nang mag-courtesy call sa kanya noong Pebrero 18, 2025, ang television host na si Willie Revillame na kumakandidatong senador at si Atty. JP Padiernos ng GP Party-list.

Alam ni Alcala na unang lumabas sa PEP ang balita tungkol sa panliligaw niya kay Kathryn kaya nagtanong siya kung sino ang source ng Cabinet Files habang nakamasid at napapangiti ang kanyang ama, si Vice-Mayor Dondon Alcala ng Lucena City.

Nagulat si Alcala nang sabihin ng Cabinet Files na malapit sa kanya ang pinagmulan ng balita, pero nabigo siyang malaman dahil tumanggi kaming isiwalat ang katauhan ng aming “reliable source.”

Nang itanong ng Cabinet Files kung totoo ba o hindi na nanliligaw siya kay Kathryn, walang kinumpirma o itinanggi ang alkalde.

Mauunawaan ang pagiging maingat ni Mayor Mark sa pagsasalita dahil naranasan na niyang mabatikos nang unang lumabas ang balita tungkol sa kanyang panliligaw sa aktres.

Muling napag-uusapan ang diumano’y pagkakamabutihan nina Mayor Mark at Kathryn dahil sa lumitaw na balita na diumano’y may relasyon na sila simula pa noong Disyembre 2024.

Pero ayon naman sa mga nakakaalam sa kuwento, nasa “dating” stage pa lamang ang dalawa.