Nakahanap na ba ng bagong pag-ibig ang Kapuso actress na si Bea Alonzo?

Humigit-kumulang isang buwan na ang nakalilipas mula nang unang makarating sa PEP Troika ang impormasyong nakaka-date ni Bea ang negosyanteng si Vincent Co.

Si Vincent ay presidente ng Puregold mula 2015, base sa official website ng kilalang grocery retail chain.

Ang mga magulang niyang sina Lucio at Susan Co ang may-ari ng kumpanya. Si Lucio ang tumayong chairman mula 1998-2023. Pumalit na chairwoman si Susan mula noong 2024.

Nakasaad sa company profile ni Vincent sa website ng Puregold na siya ay nagtapos ng Entrepreneurial Management sa University of Asia and the Pacific noong 2003.

Si Vincent ay nasa early 40s, habang si Bea ay 37 taong gulang.

Sinasabing masugid sa panliligaw si Vincent kay Bea, pero low-key lamang ang dalawa noon.

Ayon sa source ng PEP Troika, noong minsang magkasakit si Bea habang nasa Siargao ay pinasundo pa ito ni Vincent via chopper para makauwi agad sa Maynila.

Patuloy raw ang magandang pagkakakilanlan ng dalawa.

Isa pang source ang napangiti nang tanungin ng PEP kung nasa dating stage sina Bea at Vincent.

“Mayaman na mabait, very polite at approachable” ang ilan sa paglalarawan ng second source kay Vincent.

Ayon naman sa isa pang source ng PEP, kumpirmadong sina Bea at Vincent na.

BEA ALONZO AND VINCENT CO TOGETHER IN SPAIN?

Nayong Lunes, May 5, 2025, kumalat sa social media ang screenshot ng pamamasyal ng isang lalake at isang babaeng nakatalikod habang magkahawak-kamay.

Base ito sa ulat ng Insiderph.com na unang naglathala ng litrato mula sa Instagram account ni Vincent.

Kuha iyon sa isang beach sa Andalucia, Spain.

Hindi tinukoy ni Vincent ang babaeng kasama niya, pero hinihinalang si Bea iyon na nagbakasyon din sa Spain kamakailan.

Noong April 21 at 24, 2025, may mga Instagram post si Bea na kuha niya sa Andalucia at Sevilla sa Spain.

This is one of Bea’s photos from her IG carousel where the location tagged is Andalucia, Spain. 
Photo/s: @beaalonzo Instagram

Nakasuot siya ng beige blazer, black skirt, at white rubber shoes.

Tugma iyon sa suot na blazer at black skirt ng nasa litrato ni Vincent. Pati ang haba ng buhok ni Bea at buhok ng nasa litrato ni Vincent ay pareho rin.

Bea Alonzo (center) shows photos with friends by the seaside in her IG carousel where the location tagged is at Sevilla, Spain. 
Photo/s: @beaalonzo Instagram

Sa kumalat na screenshot na ibinahagi ng fans ni Bea, makikitang naka-like ang aktres sa IG post ni Vincent.

Bea Alonzo likes Vincent Co’s IG post of a couple holding hands while walking by the beach in Andalucia, Spain. 
Photo/s: Vincent Co IG via @moviequeenbea Twitter

BEA ALONZO ON BEING SINGLE AFTER BREAKUP

Isang taon at tatlong buwan na ang nakalipas mula nang maghiwalay sina Bea at ang noo’y fiancé niyang si Dominic Roque.

Sa digital cover ng PEP noong August 2024, ibinahagi ni Bea na masakit ang makaranas ng heartbreak, pero pinili raw niyang kilalanin muli ang sarili at ibuhos ang panahon sa trabaho, libangan, at pakikipagkita sa mga kaibigan.

Noon ding buwang iyon, sa isang hiwalay na panayam ng PEP, inamin ni Bea na may mga manliligaw siya pero wala pa raw siyang masasabing constant date.

Sa ngayon, wala pang opisyal na pahayag si Bea tungkol sa estado ng kanyang puso.