Hindi nakatiis ang Kapamilya TV host-actress na si Anne Curtis na palagan ang isang netizen na kumuwestiyon sa pagkakatanghal sa kanya bilang Female TV Host of the Year sa 53rd Box Office Entertainment Awards.
Sa Facebook nitong Lunes, June 30, 2025, binati ng It’s Showtime si Anne sa napanalunan nitong award.
Ipinost ng It’s Showtime ang litrato ni Anne kalakip ang nakuha niyang hosting award.
“NANALO PA NGA ANG ATE MO!! AWARD! Congratsss, Anne!” mababasa sa caption ng post ng It’s Showtime.
Kung marami ang congratulatory messages para kay Anne sa comments section, mayroon ding kinuwestiyon ang pagkapanalo niya.
Puna ng isang netizen, published as is: “Filipino awards are weird. The one who always absent got an award. It just lead to interpretation that Philippines Show or Contest are cooking show.”
Sinagot ito ni Anne.
Pagtatanggol niya sa sarili: “FYI THIS WAS BASED ON LAST YEAR! When I was in my different hair girl era. Not this year.”
Ang ibig tukuyin ni Anne, ang naging basehan ng pagbibigay sa kanya ng parangal bilang Best Female TV Host ay para noong 2024.
Hindi ngayong 2025 kung kailan madalas siyang wala sa It’s Showtime dahil sa taping niya para sa teleseryeng It’s Okay Not To Be Okay.
ANNE CURTIS Addresses Absence IN IT’S SHOWTIME, Acting Commitments
Maging sa X (dating Twitter) ay hindi rin nakapagtimpi si Anne na palagan ang nasabing netizen na pumuna sa nakuha niyang award.
Ini-repost ng It’s Showtime host ang ipinost na litrato ng isa niyang follower na nagpapakita sa naging pagsagot ni Anne sa Facebook.
Ayon kay Anne, sa susunod na taon ay hindi na siya aasang makakakuha ng hosting award dahil sa madalas niyang pag-absent sa It’s Showtime ngayong taon.
Saad ni Anne (published as is): “GIGIL NILA AKO E. Hayaan nyo, makakaasa kayo wala akong hosting award next year because I was absent for half of this year acting for 2 different projects. 1 that I have yet to finish. Happy? Right @itsShowtimeNa.”
Kamakailan lang ay naging tampulan ng tukso si Anne sa It’s Showtime dahil sa madalas nitong pagliban sa Kapamilya noontime show.
Depensa naman niya rito, dahil sa prior commitments at pag-aalaga niya sa anak na si Dahlia kung kaya’t may mga araw na hindi siya nakakapasok sa It’s Showtime.
