Hindi naitago ni Will Ashley ang kanyang pagkagulat nang hingan ng reaksiyon sa pag-amin ni Dustin Yu na may pagkakataong nagselos ito kay Will habang nasa loob sila ng Pinoy Big Brother (PBB) house.

Nagselos si Dustin dahil sa pagiging bukas ni Will na sabihing may nakaraan sila ng ka-duo at ka-loveteam ni Dustin na si Bianca de Vera at nais pa nitong mas kilalanin ang Kapamilya actress.

Sa panayam sa kanya ni Nelson Canlas sa 24 Oras nitong Martes, July 8, 2025, nahingan ng reaksiyon si Will sa naging pag-amin ni Dustin na pinagselosan niya noon ang kapwa Kapuso actor.

Read: Will Ashley reflects on his PBB Celebrity Collab journey

Gulat na reaksiyon ni Will, wala siyang ideya na nagselos si Dustin sa kanya.

Iginiit niyang anuman ang maging desisyon nina Dustin ay Bianca ay suportado niya ito.

Saad ni Will: “That, I don’t know.

“We had a talk na parang, yun nga po, na support ko sila.

“Naging honest ako dun at sinasabi kong buo na sinusuportahan ko sila.”

Bagamat nais ni Will na manumbalik ang closeness at pagkakaibigan nila ni Bianca, nirerespeto raw niya ang anumang namamagitan kina Dustin at Bianca.

Pahayag ni Will, “Masaya ako sa naging istorya nilang dalawa.

“At, yun nga, kagaya ng sinasabi ko sa mga housemates po ay sana talaga madala talaga nila sa labas po.”

Naitanong din ni Nelson kay Will ang “love triangle” na nabuo sa pagitan nila nina Dustin at Bianca.

Natatawang sagot ni Will, “Triangle? Wow, honestly, wala pong naging triangle talaga sa loob ng bahay, alam po lahat ng mga housemates yan.”

Kasama ni Will sa panayam niya sa 24 Oras ang final duo niyang si Ralph de Leon.

Ang duo nina Will at Ralph o RaWi ang hinirang na Second Big Placer sa katatapos lamang na PBB: Celebrity Collab Edition.

Dustin admits he was jealous of Will

Noong July 2 nangyari ang pag-amin ni Dustin na nagselos siya kay Will nang sumalang sila ni Bianca sa Fast Talk With Boy Abunda.

Dito ay tinanong siya ng host na si Boy Abunda kung nagselos ba siya kay Will dahil sa pagiging malapit nito kay Bianca.

Sagot ni Dustin, “Noong hindi pa sa akin clear kung ano man yung meron sila sa past, yung medyo magulo pa, of course, nagselos ako, naguguluhan ako.”

Bagamat noong una ay nakaramdam ng selos, unti-unti raw itong nawala nang magkausap sila nang masinsinan ni Will, at iparamdam ni Bianca sa kanyang wala siyang dapat ipangamba.

Pahayag ng Kapuso actor: “Noong nag-usap na kami ni Will, and nag-usap na rin kami ni Bianca na wala naman ako dapat pagselosan or intindihin or isipin or i-worry, of course, hindi ko na yun [selos] pinairal, naintindihan ko na yun.”

BIANCA AND WILL’S PAST

Hindi lingid sa kaalaman ng iba na bago pa man pumasok sa loob ng PBB house sina Will at Bianca ay magkakilala na sila.

Sa episode ng PBB: Celebrity Collab Edition noong April 9, lakas-loob hinarap at ipinagtapat ni Will kay Bianca ang kanyang nararamdaman at panghihinayang sa naudlot nilang pagkakaibigan ng Kapamilya actress, dalawang taon na ang nakararaan.

Taong 2023 nang magtambal sila sa unang collab drama series ng ABS-CBN at GMA-7, ang Unbreak My Heart.

Makalipas ang dalawang taon, nagtagpo muli ang kanilang landas nang kapwa sila maging housemates sa PBB: Celebrity Collab Edition.

Habang nasa loob ng Bahay Ni Kuya, napag-usapan nina Will at Bianca ang pagiging close nila noon, ngunit hindi napunta sa puntong nagkaaminan sa tunay nilang nararamdaman.

Will Ashley and Bianca De Vera confess to unresolved tension from their past in one of the episodes of PBB: Celebrity Collab Edition. 
Photo/s: Screengrab ABS-CBN Entertainment on YouTube

Matapos daw kasi ang taping at pag-ere ng Unbreak My Heart ay unti-unti ring nawala ang komunikasyon at pagiging malapit nina Bianca at Will, dulot na rin ng magkaiba nilang network at magkahiwalay na projects.

Dito rin nanggaling ang tawagan nilang “taping friends” sa loob ng Bahay Ni Kuya.