Inatras na nina Sharon Cuneta at Senator Kiko Pangilinan ang kasong cyberlibel laban sa showbiz talk show host na si Cristy Fermin.
Ito ang ulat ni Ogie Diaz sa ibinahagi niyang Facebook post ngayong Martes, July 8, 2025.
Kalakip nito ang litrato ni Cristy, na pinagitnaan nina Kiko at Sharon. Kuha ito sa korte sa Makati City kunsaan nagkita ang tatlo.
Nagkasundo ang magkabilang partido matapos maglabas ng public apology si Cristy, ayon kay Ogie.
Sabi pa raw ni Cristy, “Kung nakapanakit tayo ng kalooban, marunong naman tayong humingi ng tawad.”
THE CYBERLIBEL SUIT
May 10, 2024 nang magsampa ng reklamong cyberlibel sina Sharon at Kiko laban kay Cristy. Isinumite nila iyon sa Makati City Prosecutor’s Office.
October 2024 nang pormal na kasuhan si Cristy ng limang bilang ng cyberlibel. Nagpiyansa siya ng halagang PHP240,000 para pansamantalang makalaya.
Inihabla ng mag-asawang Sharon at Kiko si Cristy dahil sa “below-the-belt, malicious, and baseless” na mga impormasyong binitawan ni Cristy sa kanyang online show.
Hindi lamang daw si Sharon ang naapektuhan ng aniya’y paninira ni Cristy, kundi pati pamilya nila ni Kiko.
SHARON CUNETA ON CRISTY FERMIN’S “BELOW-THE-BELT” ATTACKS
Madalas na laman noon ng YouTube vlogs ni Cristy ang mga kuwento at pangyayari sa buhay ni Sharon at ng kanyang pamilya mula June 2023 hanggang May 2024.
Kabilang dito ang pagpuntirya ni Cristy sa diumano’y alitan sa pagitan nina Sharon at Kiko, alitan sa pagitan ng mag-inang Sharon at KC, at pagkukumpara sa mga anak ni Sharon.
“You don’t hit beyond what is acceptable. Pati mga anak namin, marriage namin, lahat na,” sabi noon ni Sharon sa panayam ng entertainment reporters, kabilang ang PEP.ph (Philippine Entertainment Portal).
Paliwanag pa ni Sharon noon: “Parang ang sama-sama namin, parang ang sama kong ina, ang sama kong tao, when buong buhay ko parang has been dedicated to really trying to raise the best kind of human beings sa mga anak namin.
“We’re very decent, very honest people. We’re not perfect but we live very honestly. Wala kaming eskandalong matatawag mo.”
Hindi rin daw hiningi ni Cristy ang panig nina Sharon at Kiko bago inilabas ang mga report ni Cristy sa kanyang online show noon.
