Mariing pinabulaanan ng aktres na si Sunshine Cruz ang mga nagkalat na tsismis sa social media tungkol sa diumano’y hiwalayan nila ng negosyanteng si Atong Ang.

Sa Facebook noong June 30, 2025, nagbahagi si Sunshine ng screenshots mula sa iba’t ibang social media pages na nagsasabing pisikal umano siyang sinaktan ng napapabalitang boyfriend.

Kaya naman sumisigaw raw siya ngayon ng hustisya.

Kalakip ng posts na ito ang larawan ni Sunshine na may mga pasa sa mukha.

May lumabas ding balitang galit na galit daw si Atong at ayaw nitong makipaghiwalay kay Sunshine.

Sa post ni Sunshine ay tinapalan niya ng “fake news” ang mga lumabas na ulat.

Makahulugang caption ng aktres: “Sharing misinformation is not advisable especially if the news comes from a questionable site. Be vigilant family and friends.”

 

SUNSHINE CRUZ SHARES QUOTE ABOUT FAKE NEWS

Nagbahagi rin ng quote si Sunshine tungkol sa pagkilatis ng mga pekeng balita.

Nakasaad dito: “Don’t believe everything you read on the Internet just because there’s a picture with a quote next to it.”

Hanggang ngayon, hindi pa rin tuwirang inaamin ni Sunshine ang relasyon nila ng gambling tycoon.

Pero, marami na silang public sightings together.

Noong March 14, 2025, ipinost ni Sunshine ang sweet picture nila ni Atong.

Sakay ng isang helicopter sina Sunshine at Atong na nakangiti at magkatabi nang kunan ang litrato.

Walang inilagay na kahit anong caption dito si Sunshine, pero mapapansin ang pagkakomportable at pagkamalapit nila ni Atong.

Iyon ang kauna-unahang pagkakataong nag-post si Sunshine ng larawan kasama si Atong.

Nangyari ito tatlong buwan mula nang maispatan nang ilang beses ang dalawa na sweet habang magkasama sa private events.

Noong December 17, 2024, umugong ang usap-usapang may relasyon ang dalawa nang kumalat sa social media ang kuhang video nina Sunshine at Atong na magkahalikan sa isang cockpit arena.

Nasundan pa ito nang maispatan muli ang dalawa na magkasamang dumalo sa kasal ng isang malapit na kaibigan ni Atong.

Noong December 19, 2024, kinumpirma ni Atong sa Bilyonaryo News Channel ang relasyon nila ni Sunshine.

At noong kalagitnaan ng Hunyo lamang, ang ex-husband ni Sunshine na si Cesar Montano ang nagkumpirmang may relasyon nga ang dating asawa kay Atong.

At boto raw siya sa relasyon ng dalawa.

Samantala, sa pagkakaalam ng publiko ay kasal pa rin si Atong sa kanyang asawa at may mga anak sila.